د افغانستان اسلامي امارت بهرنیو چارو وزیر امیر خان متقي د ازبکستان جمهوریت له بهرنیو چارو وزیر بختیار سعیدوف سره په ټیلیفوني اړیکه کې د دوه اړخیزو اړیکو پر پرمختګونو او سیمه‌ییزې همکارۍ فرصتونو بحث او خبرې وکړې.

د هېواد بهرنیو چارو وزارت د رسنیزې خبرپاڼې له مخې؛ په دې خبرو اترو کې دواړو خواوو د افغانستان او ازبکستان ترمنځ د اړیکو پرمختګ ارزولی او د سیاسي، اقتصادي او ډیپلوماټیکو تعاملاتو د پیاوړتیا پر لارو چارو یې بحث کړی دی.

امیر خان متقي ټینګار کړی، چې افغانستان او ازبکستان  ګاونډ او وروڼه هېوادونه دي، چې په دوه اړخیزو او سیمه‌ییزو چارو کې ګڼ‌شمېر ګډې ګټې او فرصتونه لري.

هغه له دې فرصتونو څخه د ګټې اخیستنې لپاره د ګډو هڅو پر اړتیا ټینګار د ټینګار ترڅنګ هیله من شو، چې سږکال به په بېلابېلو کچو کې مشورې، اقتصادي همکارۍ او ګډ نوښتونه نور هم پراخه شي.

بختیار سعیدوف د کابل او تاشکند ترمنځ د اړیکو له پرمختګ هرکلی وکړ.

هغه له افغانستان سره د اړیکو د ژورولو لپاره د ازبکستان پر ژمنې ټینګار څرګند کړ او د سوداګریزو اړیکو په برخه کې یې له پام وړ پرمختګ څخه یادونه وکړه.

سعیدوف ویلي؛ تمه ده، چې د افغان ټرانس اوسپنې‌پټلۍ پروژې د امکان سنجۍ مطالعات ډېر ژر پیل شي.

د افغانستان اسلامي امارت ملي دفاع وزارت ویلي، چې د یکشنبې پر ورځ( د کب درېیمه ) د پاکستان پوځ یو ځل بیا د افغانستان هوايي حریم نقض کړ او په ننګرهار او پکتیکا ولایتونو کې یې هوايي بریدونه ترسره کړي دي.

د ملي دفاع وزارت د خپرې شوې خبرپاڼې له مخې؛ یاد بریدونه پر یوه دیني مدرسه او د ملکي وګړو پر څو کورونو شوي، چې له کبله یې د ښځو او ماشومانو په ګډون ملکي تلفات اوښتي دي.

ملي دفاع وزارت دغه هوايي بریدونه پر سختو ټکو غندلي او دا یې د افغانستان له ملي حاکمیت ښکاره سرغړونه بللې ده.

همدارنګه یې دا کار د نړیوالو قوانینو، اسلامي اصولو او د ګاونډیتوب د اړیکو د نورمونو خلاف عمل ګڼلی دی.

اعلامیه زیاتوي، چې د هېواد د حاکمیت ساتنه او د خلکو دفاع کول د افغانستان د دفاعي ځواکونو دیني او ملي وجیبه ده.

وزارت خبرداری ورکړی، چې په مناسب وخت کې به د حکومت له لوري “سنجول شوی او مناسب غبرګون” وښودل شي.

وزارت دا هم ویلي، چې پر ملکي سیمو او دیني بنسټونو بریدونه د پاکستان د استخباراتي او امنیتي ادارو ناکامۍ څرګندوي او دا ډول اقدامات د اسلامآاباد کورنۍ ستونزې نشي پټولی.

د افغانستان د صنایعو او سوداګرۍ وزیر نورالدین عزیزي پرون په خپل دفتر کې له هندي سوداګر انکوش سټانا او مل پلاوي سره د همکاریو پر پیاوړتیا خبرې وکړې.

د یاد وزارت د خبرپاڼې له مخې؛ په دې لیدنه کې، سټانا د افغانستان د قیمتي ډبرو د نندارتون د تالار او د درملو په سکټوور کې د افغان او هندي سوداګرو ترمنځ د همکارۍ د پیاوړتیا لپاره خپله علاقه څرګنده کړه.

هغه زیاته کړې؛ جرمني داسې پرمختللې ټکنالوژي ترلاسه کړې، چې کولی شي د کارول شوي پلاستیک څخه د پام وړ ډیزلو تېل تولید کړي. مونږ چمتو یوو، چې دا ټکنالوژي افغانستان ته راولېږدول شي.

د صنایعو او سوداګرۍ وزیر له دې وړاندیز څخه د هرکلي ترڅنګ خپل بشپړ ملاتړ اعلان کړ او افغانستان یې د پانګونې فرصتونو لرونکی هېواد وباله.

هغه ټینګار وکړ، چې د افغانستان خصوصي سکټور فعال دی او له بهرنیو پانګوالو سره همکارۍ ته چمتو دی.

ویل کیږي، چې دا لیدنه د افغانستان او ګاونډ هېوادونو ترمنځ د پانګونې او اقتصادي همکارۍ د پراختیا پر لوري یو اړین ګام دی.