د ۱۴۰۴ لمریز لېږدیز کال د کانکور آزموینې پایلې د یکشنبې پر ورځ(د چنګاښ نهه‌ویشتمه) د اسلامي امارت د لوړ پوړو چارواکو په شتون کې اعلان شوې.

په دې مراسمو کې د رییس الوزرا اداري مرستیال او د اسلامي امارت یو شمېر نورو چارواکو هم ګډون کړی و.

د آزموینو ملي ادارې چارسمبالي عبدالباقي حقاني د پایلو د اعلان په مراسمو کې ویلي، چې سږ کال له ټول هېواد څخه یو لک او ۵۴۸ زده‌کوونکو د کانکور په آزموینه کې ګډون کړی و، چې له ډلې یې ۵۱ زره او ۱۸۱ تنه د لوړو او نیمه لوړو زده‌کړو موسسو ته بریالي شوي دي.

د سږ کال کانکو په آزموینه کې سید موسی له کابل ولایت څخه د ۳۵۶.۵۷ نمرو پر ترلاسه کولو لومړی مقام، محمد نذیر د ۳۵۶ نمرو پر ترلاسه کولو دوه‌یم او حمزه د ۳۵۳.۵ نمرو پر ترلاسه کولو درېیم مقام خپل کړ.

ښاغلی حقاني زیاته کړې، چې د لوړو زده‌کړو په موسسو کې د جذب ظرفیت ۷۷ زره او ۱۵ تنه او په نیمه لوړو زده‌کړو موسسو کې ۳۴ زره او ۷۷۴  تنه دی.

د آزموینو ملي ادارې چارسمبالی ټینګار کوي، چې څه باندې ۶۰ زره خالي بستونه اوس هم شته او د ۳۶ زره او ۹۹۱ کسانو له ډلې، چې پر شرایطو برابر دي کولی شي د دوه‌یم ځل لپاره انتخاب وکړي.

د رییس الوزرا اداري مرستیال عبدالسلام حنفي، چې په دې مراسمو کې یې ګډون کړی ویلي؛ د ازموینو ترسره کېدا د استعدادونو د موندلو لپاره اړینه ده او له ځوانانو یې وغوښتل، چې د خپلې علمي کچې په لوړولو کې هڅه وکړي او له دې لارې خلکو او هېواد ته د خدمت جوګه شي.

د ۱۴۰۴ کال د کانکور آزموینې په داسې حال کې اعلانیږي، چې واک ته د اسلامي امارت له بیا رسېدو راپدېخوا نجونې په دې بهیر کې له ګډون څخه بې برخې شوې دي.

د شنونکو پر اند که په هېواد کې د نجونو پر وړاندې ښوونیز او تحصیلي محدودیتونه همداسې دوام وکړي د نجونو پر روحي وضعیت د منفي اغېزو ترڅنګ ټولنیز اغېز هم ولري.