د عدلیې وزارت ویلي، چې د بېرته ستنېدونکو کډوالو لپاره د مرستو راټولولو، جلبولو او وېش د پلاوي کړنلاره د اسلامي امارت د رهبر له توشیح وروسته په رسمي جریده کې خپره شوې ده.

د یاد وزارت د څرګندونو له مخې؛ دا کړنلاره یو پیلیزه، درې بابه، څلور فصلونه او ۱۴ مادې لري او د مرکزي او ولایتي پلاویو له‌خوا به د بېرته ستنېدونکو کډوالو لپاره د مرستو د جلب، راټولولو او وېش په برخه کې عملي کېږي.

په دې سند کې د مرکزي او ولایتي پلاویو جوړښت او صلاحیتونه، د مرستو د جلب، راټولولو، ثبت، ساتنې او وېش طریقې، د نغدي، غیرنغدي او خدماتي مرستو څرنګوالی، د مرستو د وېش د څارنې میکانیزم او د مرستو د ترلاسه کولو او وېش په برخه کې ممنوع موارد روښانه شوي دي.

د کړنلارې له مخې، مرکزي پلاوی اړ شوی، چې د مرستندویانو او د بېرته ستنېدونکو کډوالو د اړتیاوو نوملړ جوړ کړي او د نورو مرستو د جلب لپاره له کورنیو مرستندویانو او بهر مېشتو افغانانو سره رسمي خبرې وکړي.

عدلیې وزارت زیاتوي، چې په دې کړنلاره کې د مرستو د جلب لارې چارې هم تشریح شوې دي او له رسمي لارو پرته د بهرنیو یا کورنیو مرستو راټولول د اسلامي امارت د قوانینو او اصولو خلاف او منع شوي دي.

په همدې خپرونه کې د اسلامي امارت د رهبر هغه فرمان هم خپور شوی، چې له مخې یې د چارو ادارې اړوند د کورونو د څېړنې ریاست لغوه شوی او مسوولیتونه یې سترې محکمې ته سپارل شوي دي.

د افغانستان بانک لومړي مرستیال صدیق‌الله خالد د افغانستان او امریکا د ګډې سوداګرۍ خونې له مشر جف ګریکو سره په کتنه کې د افغانستان د سوداګریزو بانکونو د بانکي اړیکو پر پراختیا، د سوداګرۍ پیاوړتیا، د پانګونې فرصتونو زیاتوالي او بانکي ثبات خبرې کړې دي.

د افغانستان بانک د خبرپاڼې له مخې؛ صدیق‌الله خالد ویلي، چې مرکزي بانک د باثباته او پیاوړي بانکي نظام د رامنځته کولو ترڅنګ د خصوصي سکټور ملاتړ او د سوداګرۍ پراختیا ته ژمن دی او له کورنیو او نړیوالو بنسټونو سره د همکاریو او رغنده اړیکو د پراخولو لپاره هڅې کوي.

هغه زیاته کړې: « مونږ باور لرو، چې د بانکي سکټور پیاوړتیا او د خصوصي سکټور وده د اقتصادي پرمختګ او د هېواد د تلپاتې هوساینې اړین بنسټونه دي.»

دغه راز جف ګریکو هم د بانکي او سوداګریزو اړیکو د پراختیا، اقتصادي ودې، د سوداګریزو فعالیتونو د آسانتیا او د خصوصي سکټور د ملاتړ په برخه کې پر ګډو همکاریو ټینګار کړی دی.

د افغانستان بانک د څرګندونو له مخې، په دې غونډه کې د سوداګرو د بانکي ستونزو حل، برښنايي بانکدارۍ، د پیسو نړیوال لېږد، د مالي خدمتونو ښه‌والی او د افغانستان د اقتصادي فعالیتونو پیاوړتیا هم تر بحث او ارزونې لاندې نیول شوي دي.