ترکي رسنۍ «قیصه دالغا» د پاکستان د بلوڅستان ایالت د داعش خراسان د تبلیغاتي شبکې یو ترکي وګړی احمد کازانجي، چې د دغې ډلې د رسنیو په څانګه کې یې د ترکي ژبې تبلیغاتي توکي خپرول او تېره اوونۍ په پاکستان کې نیول شوی؛ د فعالیتونو په اړه نوي جزئیات خپاره کړي دي.

د راپور له مخې، احمد کازانجي، چې تازه په پاکستان کې د داعش خراسان څانګې ته د منسوب فعالیت په تور نیول شوی، څېړونکو ته ویلي، چې د بلوڅستان په غرنیو سیمو کې یې د دغې ډلې لپاره پر ترکي ژبه پوسټرونه او نور تبلیغاتي توکي چمتو کول.

په راپور کې راغلي، چې کازانجي له ۲۰۲۴ز. کال راوروسته له قونیې ښار څخه داعش ته ور اوښتی و او وروسته له هغې، چې په ناقانونه توګه د ایران له لارې پاکستان ته تللی؛ د بلوڅستان په سیمه کې یې د داعش خراسان د رسنیو له څانګې سره کار پیل کړی و.

احمد کازانجي، چې د «ابو عبیده» او «ابو ابراهیم» پر مستعارو نومونو هم پېژندل کېده، ترکي چارواکو ته ویلي، چې په جګړه‌ییزو فعالیتونو کې یې برخه نه‌ده اخیستې؛ بلکې په خپله خوښه یې د رسنیو په دفتر کې کار کاوه.

د «قیصه دالغا» د راپور له مخې، بلوڅستان د داعش خراسان د فعالیتونو له مهمو سیمو څخه بلل کېږي او د مستونګ، کلات، خضدار، بولان او سِبي سیمې څو ځله د دغې ډلې د کمپونو او بنسټونو اړوند په امنیتي او خبري راپورونو کې یادې شوې دي.

راپور د اوزګور آلتون، چې په «ابو یاسر الترکي» مشهور و؛ دوسیې ته هم اشاره کړې ده. نوموړی تېر کال د ترکیې د ملي استخباراتو په عملیاتو کې د ډیورنډ کرښې ته نږدې نیول شوی و.

امنیتي سرچینو دغې رسنۍ ته ویلي، چې آلتون د داعش خراسان د ترکي ژبې تبلیغاتي فعالیتونو، د غړو د جذب او سیمې ته د کسانو د لېږد د لارو چارو په برابرولو کې مهم رول درلود.

کازانجي څېړونکو ته ویلي، چې له آلتون سره یې هېڅکله مخامخ لیدنه نه‌ده کړې او اړیکه یې یوازې د ټیلیګرام له لارې ورسره وه.

هغه همداراز ویلي، چې تر یوه وخته وروسته یې د سیمې له شرایطو سره ځان برابر نه‌شو کړی او پرېکړه یې وکړه، چې له دغې ډلې ووځي.

د نوموړي د څرګندونو له مخې، غوښتل یې د ایران له لارې بېرته ترکیې ته ستون شي.

د راپور له مخې، د ترکیې ملي استخباراتو کازانجي هغه مهال وپېژاند، چې د بلوچستان په غرنیو سیمو کې د تګ په حال کې و او وروسته یې ترکیې ته ولېږداوه.

ویل کېږي، د څېړنو له بشپړېدا وروسته نوموړی زندان ته لېږل شوی دی.