د چین بهرنیو چارو وزارت د څرګندونو له مخې؛  دې هېواد د هغو هېوادونو پر وړاندې، چې له ایران سره سوداګریزې اړیکې لري د امریکا د ولسمشر ډونالډ ټرمپ د تعرفې له ګواښ سره خپل مخالفت څرګند کړی دی.

د چین بهرنیو چارو وزارت ویاند مائو نینګ د امریکا ولسمشر ډونالډ ټرمپ د څرګندونو په غبرګون کې ویلي؛ چین تل د نورو هېوادونو په کورنیو چارو کې د لاس‌وهنې مخالف و او د ټولو ملتونو د ملي حاکمیت او امنیت ملاتړ کوي؛ هغه څه، چې باید د نړیوالو قوانینو له مخې په بشپړ ډول خوندي وساتل شي.

د امریکا ولسمشر په دې وروستیو کې ویلي: هر هغه هېواد، چې له ایران سره سوداګري کوي له ۲۵ سلنې تعرفې سره به مخ شي.

شنونکو خبرداری ورکړی، چې د دې تعرفو لګول ممکن د سوداګرۍ پر کمولو سربېره د امریکا او نورو هېوادونو ترمنځ اقتصادي او ډیپلوماټیک کړکیچونه رامنځته کړي.

دا اقدام د ایران او د هغه د سوداګریزو شریکانو پر وړاندې د امریکا د اقتصادي فشار د پالیسۍ یوه برخه ده او کولی شي د امریکا او ایران د شریکو هېوادونو ترمنځ سوداګریزې اړیکې اغیزمنې کړي.

د امریکا ولسمشر ډونالد ټرمپ ویلي؛ غواړي، چې د ایران د انټرنیټ د بیا نښلولو په اړه له ایلان ماسک سره خبرې وکړي؛ ځکه، چې د دې هېواد چارواکو د روانو حکومتي ضد اعتراضونو پر مهال انټرنیټي خدمتونه پرې کړي دي.

ټرمپ د ایلان ماسک له سپیس‌ایکس شرکت سره د همکارۍ په اړه د یوې پوښتنې په ځواب کې ویلي: «هغه په دې ډول کارونو کې ډېر ښه دی او یو ډېر ښه شرکت لري.»

سپیس‌ایکس د سپوږمکۍ له لارې «سټارلینک» نومي انټرنیټي خدمتونه وړاندې کوي، چې له دې مخکې هم په ایران کې ترې استفاده شوې ده.

د پنجشنبې پر ورځ د حکومت ضد له ټولو پراخو اعتراضونو سره همهاله د انټرنیټ د پرې کېدا له کبله له ایران څخه د معلوماتو بهیر سخت ګډوډ شوی دی.

د ټرمپ او ماسک اړیکې لوړې ژورې لرلې دي؛ له ټرمپ سره د ټاکنیز کمپاین له همکارۍ نیولې تر د مالیاتي لایحې پر سر تر ښکاره اختلاف او په مارالاګو کې لیدنه، خو په دې وروستیو کې د اړیکو د ښه کېدا نښې لیدل کېږي.

ماسک مخکې هم په ایران کې د دولتي محدودیتونو د مخنیوي لپاره د سټارلینک له کارولو ملاتړ کړی و؛ په ځانګړي توګه د ۲۰۲۲ کال د هغو اعتراضونو پر مهال، چې د مهسا امیني له مړینې وروسته پیل شوي وه.

اوسني اعتراضونه شاوخوا دوه اوونۍ مخکې د بیو د لوړېدا په غبرګون کې پیل شول او وروسته د حاکم نظام پر وړاندې مخالفتونه پر تاوتریخوالي واوښتل.

د بشري حقونو د بنسټونو د څرګندونو له مخې؛ په دې اعتراضونو کې د لومړنیو معلوماتو له مخې سلګونه کسان ووژل شول او له ۱۰ زره ډېر نور نیول شوي، خو رسمي شمېرې اوس هم خپرې شوې ندي.

رویټرز د درې باخبره اسرائیلي سرچینو د څرګندونو له مخې راپور ورکړی، چې اسرائیلو د امریکا له‌خوا په ایران کې د هر ډول احتمالي مداخلې لپاره بشپړ امنیتي چمتووالي څرګند کړی دی.

د امریکا ولسمشر ډونالډ ټرمپ په وروستیو ورځو کې څو ځله ایران ته د برید ګواښ کړی او ایراني واکمنانو ته یې د معترضانو پر ضد د زور کارولو په اړه خبرداری هم ورکړی دی.

رویټرز د هغو سرچینو، چې د اسرائیلو په امنیتي سلا مشورو کې یې ګډون درلودلی؛ دا نده روښانه کړې، چې د اسرائیل بشپړ امنیتي چمتووالی څه معنا لري.

اسرائیل او ایران د جون په میاشت کې ۱۲ ورځنۍ جګړه کړې، چې د امریکا د هوايي بریدونو ملاتړ هم ورسره مل و.

د یوې اسرائیلي سرچینې د څرګندونو له مخې؛ د اسرائیل لومړي وزیر بنیامین نتنیاهو او د امریکا بهرنیو چارو وزیر مارکو روبیو د شنبې پر ورځ په یوه ټیلیفوني اړیکه کې پر ایران د امریکا د شوني برید په اړه خبرې کړې دي.

سره له دې چې اسرائیل د ایران د اټومي پروګرام او بالسټیک توغندیو په تړاو اندېښنې لري؛ خو تر اوسه یې په ایران کې لاسوهنې ته لېوالتیا نده ښودلې.

نتنیاهو د جمعې پر ورځ له «اکونومیسټ» مجلې سره په یوه مرکه کې ویلي؛ که ایران پر اسرائیل برید وکړي، نو له سختو او وېروونکو پایلو سره به مخ شي.

دا په داسې حال کې ده، چې ایراني چارواکي په وروستیو کلونو کې د حکومت پر ضد له تر ټولو لویو اعتراضونو سره مخ دي.