فرانسې په ۲۰۲۶ فوټبال نړیوال جام سیالۍ کې سنګال ته ۳ د ۱ پر توپیر له ماتې ورکولو سره سیالي پیل کړه او لوبډلمشر کیلیان امباپه نوی ریکارډ جوړ کړ.

امباپي دوه ګولونه ووهل او له دې سره یې د ملي لوبډلې لپاره د خپلو ګولونو شمېر ۵۸ ته ورساوه.

هغه د فرانسې د تاریخ د تر ټولو ډېرو ګول وهونکو د پخواني ریکارډ څښتن له شمېرې واوښت.

د ریال مادریډ دې ستوري د لوبې په دوه‌یمه نیمايي کې لومړی ګول وکړ او وروسته یې د لوبې په وروستیو شېبو کې پر یوه ښکلي ګوزار د خپلې لوبډلې بریا پخه کړه. د فرانسې بل ګول بدیل لوبغاړي براډلي بارکولا وواهه.

سره له دې، چې فرانسې پر څرګند توپیر بریا خپله کړه؛ خو په لومړۍ نیمايي کې یې ښه لوبه ونه‌کړه او د لوبې د بهیر په موندلو کې له ستونزو سره مخ وه. سنګال څو خطرناک فرصتونه رامنځته کړل او د ګول وهلو تر پولې ورسېد؛ خو نیکولاس جکسن او اسماعیل سار ونه‌توانېدل له دغو فرصتونو ګټه واخلي.

فرانسه د لوبې په دوه‌یمه نیمايي کې بشپړه بدله لوبډله ښکارېده. مایکل اولیس په دې بدلون کې مهم رول ولوباوه او د خپلو نوښتګرو لوبو پر مټ یې د فرانسې بریدونو ته تازه ساه ورکړه. امباپي پخپل رسا ګوزار د سیالې لوبډلې دروازه پرانیسته او بارکولا میدان ته له دننه‌کېدا وروسته د دواړو لوبډلو ترمنځ د ګولونو واټن زیات کړ.

سنګال په اضافي وخت کې د ابراهیم مبایه پر ګول د بېرته راګرځېدا هیله پیدا کړه؛ خو امباپي څو شېبې وروسته له لرې واټنه پر یوه ښکلي ګوزار بیا ګول وکړ او خپله یادګاري شپه یې نوره هم بشپړه کړه.

دې بریا فرانسې ته په I ګروپ کې درې اړینې نمرې ورکړې او د اتلولۍ د یوه مخکښ مدعي دریځ یې نور هم پیاوړی کړ. که څه هم د ډیډیه ډيشان لوبډلې په لومړۍ نیمايي کې ځینې کمزورۍ وښودې؛ خو په دوه‌یمه نیمايي کې یې بریدیز ځواک د لوبې برخلیک وټاکه.

تونس د ۲۰۲۶ فوټبال نړیوال جام په سیالیو کې له سویډن څخه ۵ پر ۱ درندې ماتې وروسته صبري لاموشي د روزونکي له دندې ګوښه او نامتو فرانسوی روزونکی اروه رنار یې د هغه پر ځای وټاکه.

د تونس ملي لوبډلې د جون پر څوارلسمه( یکشنبه) د نړیوال جام په لومړۍ لوبه کې له سویډن سره سیالي وکړه؛ خو ۵ د ۱ پر توپیر یې ماتې وخوړه. دا لوبه د F ګروپ په چوکاټ کې ترسره شوه؛ هغه ګروپ، چې نډرلېنډ او جاپان هم په کې دي.

د دغې ماتې له کبله تونس د خپل ګروپ د جدول وروستي ځای ته ولوېد او بل پړاو ته د دې لوبډلې د رسېدا په اړه اندېښنې زیاتې شوې. سویډن په دې لوبه کې غوره لوبه وکړه او د تونس دفاعي کمزورۍ یې څرګندې رابرسېره کړې.

د رسنیو د راپورونو له مخې، د تونس فوټبال چارواکو له دې ناهیلې کوونکې پایلې وروسته پرېکړه وکړه،  چې صبري لاموشي له دندې لرې او اروه رنار د ملي لوبډلې نوی روزونکی وټاکي.

۵۷ کلن رنار د نړۍ د فوټبال له پېژندل شویو روزونکو څخه دی. هغه په ۲۰۱۲ز.کال کې زامبیا د افریقا ملتونو جام اتلولۍ ته ورسوله او درې کاله وروسته یې له عاج ساحل څخه هم همدا اتلولي وګټله.

دې فرانسوي روزونکي د مراکش، سعودي عربستان او د فرانسې د ښځو د ملي لوبډلو روزنه هم کړې ده.

د رنار ټاکنه د دې لپاره شوې، چې د تونس لوبډلې ته د راتلونکو حساسو سیالیو مخکې بېرته روحیه، نظم او پر ځان باور ور وګرځوي.

تونس د ګروپي پړاو دوه نورې لوبې هم په مخکې لري او د بل پړاو د هیلې د ژوندي ساتلو لپاره باید ښې پایلې ترلاسه کړي. دغه لوبډله به د جون پر یوویشتمه له جاپان او د جون پر بېنځه‌ویشتمه د ګروپي پړاو په وروستۍ لوبه کې له نډرلینډ سره مخامخ شي.

له سویډن څخه دا ماتې د نړیوال جام په تاریخ کې د تونس له تر ټولو درندو ماتو څخه ګڼل کېږي او پر لوبغاړو او روزنیز پلاوي یې فشارونه زیات کړي دي.

دغه راز سویډن په‌دې بریا کې له F ګروپ څخه د بل پړاو د احتمالي لوبډلو په ډله کې خپل دریځ ښه پیاوړی کړ.

تونس اوس هیله لري، چې د اروه رنار تجربه او وړتیا به د لوبډلې حالت بدل کړي او له سیالیو څخه به یې له وخت مخکې د وتلو مخه ونیسي.

په افغانستان کې د فوټبال مینه‌وال کولی شي د نړیوال جام سیالۍ هره ورځ پر ژوندۍ بڼه د آریانا راډیو ټلوېزیون له لارې وګوري. همدارنګه د سیالیو د مهالوېش او وروستیو خبرونو د ترلاسه کولو لپاره د آریانا ټلوېزیون او آریانا نیوز ټولنیزې پاڼې وڅاري.

د اسټرالیا فوټبال ملي لوبډلې د ۲۰۲۶ نړیوال جام په سیالیو کې خپله لومړۍ لوبه بریالۍ پیل کړه او د منظمې لوبې او اغېزناکو ځوابي بریدونو پر مټ یې ترکیې ته ۲ د صفر پر توپیر ماتې ورکړه او په D ګروپ کې یې بریالی پیل ثبت کړ.

دغه لوبه د شنبې پر ورځ د کاناډا په ونکوور ښار کې ترسره شوه. په دې سیالۍ کې ۲۰ کلن لوبغاړي نیستور ایراکونونډا او کانر میټکالف ګولونه ووهل او د اسټرالیا بریا یې یقیني کړه.

په دې لوبه کې د اسټرالیا ځوان دروازه‌ساتونکي پاټریک بیچ ښه ځلېد او پر څو مهمو غبرګونونو یې د خپلې لوبډلې دروازه خوندي وساتله او د بریا پر لوري یې ښه رول ولوباوه.

د اسټرالیا روزونکي ټوني پوپوویچ د لوبډلې په لومړني ترکیب کې زړورې پرېکړې وکړې؛ هغه تجربه‌لرونکی دروازه‌ساتونکی میټیو رایان پر احتیاطي څوکۍ کېناوه او بیچ ته یې د لوبېدا فرصت ورکړ؛ هغه پرېکړه، چې په پایله کې د لوبډلې لپاره بریالۍ ثابته شوه.

سره له دې، چې ترکیه تر ډېره پر توپ واکمنه او او پرله‌پسې بریدونه یې کول؛ خو د دې لوبډلې بریدګر څو ځله د بیچ له ډاډمنو ژغورنو سره مخ شو او د ګول وهلو فرصتونه یې له لاسه ورکړل.

اسټرالیا د لوبې په اته‌ویشتمه دقیقه کې د یوه چټک ځوابي برید پر مهال لومړی ګول وواهه. دغه برید د دروازه‌ساتونکي له لوري پیل شو او په پای کې د یوه دقیق او اوږده پاس په وسیله ایراکونونډا یوازې له دروازه‌ساتونکي سره مخامخ شو او د لوبې لومړی ګول یې ثبت کړ.

وروسته ترکیې د ارډا ګولر او نورو لوبغاړو په خطرناکو شوټونو د لوبې د برابرولو هڅه وکړه؛ خو د اسټرالیا د دروازه‌ساتونکي ځلندې لوبې د مساوي ګول مخه ونیوله.

د اسټرالیا دوه‌یم ګول د لوبې په پېنځه‌اویاایمه دقیقه کې مټکالف د جزا له ساحې بهر یوه پیاوړی شوټ وواهه او د خپلې لوبډلې بریا یې یقیني کړه.

ایراکونونډا له لوبې وروسته وویل: «ډېر ښه احساس لرم. له روزنیز پلاوي او هېوادوالو له ملاتړ څخه مننه کوم.»

دغه ځوان لوبغاړی له دې ګول سره د نړیوال جام په سیالیو کې د اسټرالیا د نرینه‌وو د ملي لوبډلې په تاریخ کې تر ټولو ځوان ګول‌وهونکی شو.

د دې ګروپ په بله لوبه کې امریکا پاراګوای ته ۴- ۱ ماتې ورکړې او د جدول په سر کې ځای لري.