د بهرنیو چارو وزارت ویلي، چې د افغانستان په چارو کې د روسیې ځانګړی استازی ضمیر کابلوف پر رسمي سفر کابل ته راغلی دی.

د دغه وزارت د معلوماتو له مخې؛ ټاکل شوې، چې ضمیر کابلوف نن( سې شنبه د غویي اتمه) د بهرنیو چارو له وزیر امیر خان متقي او د اسلامي امارت له ځینو لوړپوړو چارواکو سره لیدنې او خبرې اترې وکړي.

ویل کېږي، چې د دغو خبرو اترو اصلي محورونه به سیاسي اړیکې، اقتصادي همکاري، سوداګري، سیمه‌ییز بدلونونه او د افغانستان او روسیې ترمنځ نور ګډ مسایل وي.

دا سفر په داسې حال کې ترسره کېږي، چې دواړو خواوو په وروستیو کلونو کې پر بېلابېلو برخو لکه پانګونو، ودانیزو جوړښتونو او سیمه‌ییز امنیت په اړه ډیپلوماتیکې او عملي اړیکې پراخې کړې دي.

په کونړ ولایت کې ځایي سرچینو آریانا نیوز ته تأیید کړې، چې د پاکستاني ځواکونو د راکټي بریدونو له کبله ګڼ‌شمېر ملکي وګړي «شهیدان» او ټپیان شوي دي.

د سرچینو د څرګندونو له مخې؛  نن(دوشنبه د غویي اوومه) د پاکستاني پوځیانو په برید کې ۴ کسان«شهیدان» شوي او ۴۵ نور ټپیان دي.

سرچینو زیاته کړې، چې ډېری ټپیان ښځې او ماشومان دي، چې دا چاره په دې سیمه کې د بشري وضعیت په اړه اندېښنې زیاتوي.

ځایي سرچینو همدارنګه ویلي، چې پاکستاني پوځیانو یو ځل بیا د دې ولایت د مرکز د یارګل اړوند سیمه هم پر نښه کړې ده.

د دغو سرچینو د څرګندونو له مخې، په دې بریدونو کې د کونړ ولایت د پوهنتون لیلیه هم زیانمنه شوې ده.

دا په داسې حال کې ده، چې پاکستاني پوځیانو تېره شپه او نن غرمه هم په سپین بولډک کې یو ماشوم «شهید» کړ او پر ملکي سیمو یې توغندیز بریدونه وکړل، چې د افغان ځواکونو په ځوابي بریدونو کې ۶ پوځیان وژل شوي او لسګونه وسلې هم تر لاسه شوي دي.

د افغانستان اسلامي امارت د غویي اوومې او اته‌مې د کلیزې پر مناسبت یوه خبرپاڼه خپره کړې، چې په کې یې د افغانستان د خلق ډیموکراټیک ګوند له‌خوا د محمد داوود خان د حکومت پر وړاندې پوځي کودتا غندلې او د مجاهدینو د بریا ورځ یې ویاړلې بللې ده.

اسلامي امارت ویلي، چې د ۱۳۵۷ لمریز لېږدیز کال د غویي اوومې کودتا په افغانستان کې بهرنۍ لاسوهنې ته لار هواره کړه.

اسلامي امارت څرګنده کړې، چې د افغانستان خلکو د ۱۴ کلنې وسله‌والې مبارزې له لارې د بهرني حضور پر وړاندې ټینګار او مقاومت وکړ او په پای کې یې د ۱۳۷۱ لمریز لېږدیز کال د غویي پر اتمه خپله خپلواکي ترلاسه کړه.

دغه راز اسلامي امارت دا یادونه هم کړې، چې د جهاد له پای وروسته افغانستان له کورنیو اختلافاتو او تنظیمي جګړو سره مخ شو، چې د یوه سوچه شرعي نظام د جوړېدا هیلې یې پر ناهیلۍ واړولې.

په اعلامیه کې ټینګار شوی، چې اسلامي امارت د ګډوډۍ د پای ته رسولو، د یووالي د ترویج او د شرعي نظام د نافذولو لپاره رامنځته شوی او دغه موخې تر لاسه شوې دي.

اسلامي امارت همدارنګه د اوسني نظام د ساتنې پر اړتیا ټینګار کړی او له افغانانو یې غوښتي، چې په هېواد کې د ثبات ساتلو او د حکومتي جوړښتونو د پیاوړتیا لپاره یو موټی او ژمن پاتې شي.