د بشري مرستو بنسټ (IHH) ویلي، د افغانستان او پاکستان ترمنځ د نارسمي خبرو اترو د بهیر (Track 1.5) دوه‌یمه غونډه د جون پر اتمه او نهمه د ترکیې په استانبول ښار کې ترسره شوې ده.

د دې بنسټ د څرګندونو له مخې؛ دا نوښت د دوه ورونو او ګاونډ هېوادونو ترمنځ د متقابلې همغږۍ د پیاوړتیا، د باور د ټینګښت او د سیمې د ثبات او هوساینې د پراختیا لپاره پیل شوې او هیله ده، چې مثبتې پایلې ولري.

قطر او ترکیې هم د دغو خبرو اترو په آسانتیا کې ونډه لرلې ده.

د IHH بنسټ ټینګار کړی، چې د ورته غونډو د لړۍ روان ساتل کولی شي د کړکېچونو د کمېدا، د همکاریو د پیاوړتیا او د دواړو هېوادونو ترمنځ د خبرو اترو د پراختیا لپاره زمینه برابره کړي.

دا خبرې اترې داسې مهال ترسره شوي، چې د پاکستان د پوځ په وروستیو بریدونو کې د افغانستان د ۳ ولایتونو ۱۳ ملکي وګړي د ماشومانو او یوې ښځې په ګډون وژل شوي شوي او ۱۴ نور ټپیان دي.

د افغانستان کرکټ ملي لوبډلې چټک توپ‌اچوونکی محمد سلیم ساپی د هند پر وړاندې د درې یو ورځنیو سیالیو د لړۍ لپاره لوبډلې ته غوره شو. ټاکل شوې، چې دا سیالۍ د راتلونکې اوونۍ د شنبې پر ورځ د هند په درمسالا ښار کې پیل شي.

سلیم په لومړي سر کې یوازې د هند پر وړاندې د ټسټ لوبې لپاره غوره شوی و؛ خو د هغه ښې لوبې دې ته لاره هواره کړه، چې یو ورځنۍ لوبډلې ته هم وبلل شي.

نوموړي په ټسټ لوبه کې شپږ لوبغاړي وسوځول او سره له دې، چې د لوبغالي شرایط د چټکو توپ‌اچوونکو پر ګټه نه ول؛ خو په ساعت کې نږدې ۱۴۰ کیلومټره چټکه توپ‌اچونه وکړه.

دغه راز د ESPNcricinfo اوبپاڼې د راپور له مخې؛ د افغانستان مخکښ سپینر راشد خان او تجربه‌لرونکی آل‌راونډر محمد نبي په موهالي کې د لوبډلې د وروستۍ روزنې ګډونوال نه‌ول.

 د راپور له مخې، تمه ده راشد خان په درمسالا کې له لوبډلې سره یوځای شي؛ خو محمد نبي له ناروغۍ د رغېدا په حال کې دی.

د افغانستان کرکټ ملي لوبډلې روزونکي ریچارډ پایبَس د محمد سلیم له ټسټ لوبې ستاینه کړې او هغه یې «ځانګړی» بللی دی.

پایبَس ویلي: «هغه په سخته ګرمي او د پیاوړو توپوهونکو پر وړاندې شپږ لوبغاړي وسوځول؛ دا نه یوازې د ده، بلکې د ټولې لوبډلې لپاره ستره لاسته‌راوړنه ده.»

د افغانستان روزونکي زیاته کړې، د لوبډلې له روزنې وروسته اوس هم د لوبغاړو وړتیاوې او ترکیب ارزوي.

هغه همدارنګه ویلي، چې سلیم پخوا د بدني چمتووالي له ځینو کوچنیو ستونزو سره مخ و او د روزونکي پلاوي له پرله‌پې پاملرنې به بې برخې پاتې نه‌شي.

د یادونې ده، چې د افغانستان او هند ترمنځ د یو ورځنیو سیالیو لړۍ د راتلونکې اوونۍ د شنبې پر ورځ پیلېږي او لوبې به یې د آریانا راډیو ټلوېزیون له لارې په ژوندۍ بڼه خپرې شي.

د افغانستان اسلامي امارت د بهرنیو چارو وزارت په کابل کې د پاکستان سفارت شارژدافیر احضار کړی او د افغانستان د هوايي حریم د نقض او د بې ګناه ملکي وګړو پر کورونو د بمبارډ په تړاو یې خپل شديد او قاطع اعتراض ورته وړاندي کړ.

پاکستاني پوځیانو  دچارشنبې پر شپه د غبزرګولي شلمه یو ځل بیا د افغانستان هوايي حریم ښکاره نقض کړ او د خوست، پکتیکا او کونړ ولايتونو په ځينو سيمو کې یې د ملکي افغانانو کورونه بمبارډ کړل، چې له کبله یې ۱۱ ماشومان، یوه میرمن او یو سپینږیری «شهیدان» او ۱۴ کسان نور ملکي وګړي، چې ښځې او ماشومان په کې دي ټپیان شوي دي.

 اسلامي امارت دغه« تېری» او «بشري جنایت» له نړیوالو اصولو او قوانینو ښکاره نقض بولي, غندي او یو ځل بیا ټینګار کوي، چې د خپلې خاورې دفاع او د ولس  امنیت تأمینول خپل شرعي مسووولیت ګڼي.

ویل کیږي، چې پاکستاني لوری باید دا درک کړي، چي نیابتي سیاستونو د تطبیق پر ځاى دي خپلو داخلي ستونزو ته بنسټیز حل ومومي.