په کندهار او هلمند ولایتونو کې د وروستیو ورښتونو او سېلابونو له کبله خلکو ته درانده مالي زیانونه اوښتي دي.

د کندهار له پېښو سره د مبارزې او چمتووالي ریاست ویلي؛ په دې ولایت کې شاوخوا ۲۵۰ کورونه نسبي یا بشپړ ویجاړ شوي او نږدې ۲۰۰ کورنۍ اړ شوي، چې خپلې مېنې پرېږدي.

دغه راز د کندهار په ارغنداب ولسوالۍ کې ۱۵، دامان ولسوالۍ کې ۱۵۰ او ژېړۍ ولسوالۍ کې ۱۷۰ کورنۍ زیانمنې شوې دي.

همداراز، یوازې د تېرې شپې (چارشنبې) د اورښتونو او سېلابونو له کبله د ولایت په مرکز او یو شمېر ولسوالیو کې لسګونو کورنیو ته مالي زیانونه اوښتي دي.

په هلمند ولایت کې هم د سختو سېلابونو له کبله پراخ زیانونه اوښتي دي.

د هلمند د امنیې قومندانۍ د څرګندونو له مخې؛ د دغه ولایت په ګرمسیر ولسوالۍ کې شاوخوا ۳۰۰ کورونه ویجاړ شوي دي.

د اړوند چارواکو د څرګندونو له مخې؛ زیانمنو کورنیو ته د مرستو رسولو هڅې روانې دي؛ خو په کندهار او روزګان ولایتونو کې وروستیو اورښتونو کرنیزو چارو ته هیلې زیاتې کړې دي.

د کندهار کرنې ریاست وایي، په تېرو دوه ورځو کې شاوخوا ۲۴ ملي مټره باران شوی او د روان کال ټول اورښت ۱۷۹ ملي مټرو ته رسېدلی؛ خو اوس هم د وچکالۍ د بشپړ مهار لپاره نورو اورښتونو ته اړتیا ده.

په همدې حال کې د روزګان د اوبو او انرژۍ ریاست مسوولین وايي؛ په دې ولایت کې وروستي اورښتونه ۲۳.۱۸ ملي مټره ثبت شوي، چې د سږني کال ټوله کچه ۱۷۲.۱۶ ملي مټرو ته رسېدلې ده.

ویل کیږي، چې د یوه سمسور کال لپاره له ۲۵۰ تر ۳۰۰ ملي مټرو باران ته اړتیا ده.

د ملي تدارکاتو کمیسیون په نوبتي غونډه کې، چې د ریاست‌الوزراء د اقتصادي  مرستیال ملا عبدالغني برادر پر مشرۍ جوړه شوې وه؛ له یو ميلیارډ څخه د ډېرو افغانیو پر ارزښت د ۱۷ پروژو منظوري ورکړ شوه.

د ریاست الوزراء د رسنیزې خبرپاڼې له مخې؛ په دې غونډه کې ۴۲ پروژې د منظورۍ لپاره وړاندې شوې، چې له یو میلیارډ څخه د ډېرو افغانیو پر ارزښت ۱۷ پروژې منظورې او  ۱۴ نورې پروژې له تعدیلاتو سره مخ شوې.

په تصویب شویو او تعدیل شویو پروژو کې د پنجشېر پوهنتون د لیلیې ودانۍ جوړول، د بدخشان پوهنتون د طب پوهنځي ودانۍ جوړول، د کونړ- نورستان سړک د لومړي او دوه‌یم پړاو بشپړول، د غزني په ګیرو او بندر فاریاب، د ننګرهار سپین غر ولسوالیو کې د عامه روغتونونو جوړول او همدارنګه په بېلابېلو ولایتونو کې د برښنا رسولو او وېش پروژې شاملې دي.

د یادونې ده، چې د دغو پروژو لګښت د افغانستان اسلامي امارت له‌خوا ورکول کیږي.