د اسلامي امارت بهرنیو چارو وزیر امیرخان متقي له بي‌بي‌سي سره په خبرو کې ویلي، چې له سیمه‌ییزو هېوادونو سره د افغانستان اړیکو په سیاسي او اقتصادي برخو کې پرمختګ کړی او له اروپايي هېوادونو سره یې اړیکې هم د پراخېدا په حال کې دي.

امیرخان متقي د ښځو او نجونو د وضعیت په اړه هم ویلي، چې ښځې د سوداګرۍ په برخه کې فعالیت کوي او نجونې په ښوونځیو کې تر شپږم ټولګي پورې خپلې زده‌کړې کوي.

ویل کیږي، چې اوس‌مهال له درې میلیون ډېرې نجونې په ښوونځیو کې پر زده‌کړو اخته دي.

د ازبکستان ولسمشر شوکت میرضیایوف له شانګهای همکاریو ټولنې وغوښتل، چې له افغان استازو سره منظمې خبرې اترې بېرته پیل کړي.

میرضیایوف د شانګهای همکارۍ ټولنې د مشرانو د بیشکیک په پېنځه‌ویشتمه غونډه کې ویلي، چې په افغانستان کې د سولې او ثبات ساتل د سیمې د امنیت او تلپاتي پرمختګ د ټینګښت لپاره بنسټیز شرط دی.

هغه وړاندیز کړی، چې د شانګهای همکاریو ټولنې او افغان استازو ترمنځ منظمې خبرې اترې بېرته پیل شي، څو د سیمې د امنیتي اندېښنو، د افغانستان د اقتصادي پرمختګ او د سیمه‌ییزو همکاریو په میکانیزمونو کې د افغانستان د شاملېدو په اړه بحث وشي.

د ازبکستان ولسمشر ټینګار وکړ، چې په افغانستان کې ثبات کولی شي د منځنۍ او سویلي اسیا ترمنځ د ترانزیټي لارو، سوداګرۍ او انرژۍ په برخه کې د همکاریو له پراختیا سره مرسته وکړي.

د آلمان حکومت د دوشنبې پر ورځ ویلي؛ د اسلامي امارت د استازو یوې ډلې ته یې دې هېواد ته د لنډمهاله ننوتلو اجازه ورکړې، چې افغانستان ته د افغان وګړو د ایستلو د بهیر د زیاتولو لپاره همغږي وکړي.

د آلمان بهرنیو چارو وزارت ویاند ویلي؛ د تخنیکي ملاتړ یوې ډلې ته د لنډمهاله ننوتلو اجازه ورکړ شوې، چې موخه یې افغانستان ته د ایستل کېدونکو کسانو د شمېر زیاتول دي.

د سرچینې د څرګندونو له مخې، په جرمني کې د شاوخوا ۴۵۰ زره افغان وګړیو لپاره د قونسلي خدمتونو وړاندې کول او د هغوی د بېرته ستنېدا له بهیر سره مرسته د آلمان پر ګټه ده.

د جرمني چارواکو ویلي، د پلاوي غړي له امنیتي ارزونو تېر شوي؛ په دې هېواد کې د رسمي ډیپلوماټانو له اعتبار برخمن نه‌دي او له لنډې مودې وروسته به آلمان پرېږدي.

برلین په وروستیو کلونو کې د ډېرو پناه‌غوښتونکو او کډوالو له منلو وروسته خپله د کډوالۍ تګلاره سخته کړې ده. د صدراعظم فریډریش مرټس حکومت ويلي: افغانستان ته به د کډوالو په ایستلو کې پر هغو کسانو تمرکز وشي، چې جرمي سابقه لري؛ خو تېره اوونۍ داسې ۲۳ افغان نرینه له آلمان ایستل شوي وه، چې په هغوی کې ځینې پر هیڅ جرم محکوم شوي نه ول.