Connect with us

تازه خبرونه

ترکیه او قطر د کابل هوايي ډګر د فعال ساتلو هڅې کوي

Published

 on

(Last Updated On: ليندۍ ۱۶, ۱۴۰۰)

د ترکیې د بهرنیو چارو وزیر مولود چاووش اوغلو او د هغه قطري سیال شیخ محمد بن عبدالرحمن ال ثاني د کابل د نړیوال هوايي ډګر  د فعال ساتلو لپاره د ګډ کار شونتیا څرګنده کړې ده.

ټي آر ټي ورلډ راپور ورکړی؛ چاووش اوغلو د دوشنبې پر ورځ یوې ګډې خبري غونډې ته په وینا کې ویلي، چې دوی به په کابل کې ګډې هڅې ترسره کوي.

شیخ محمد بن عبدالرحمن ال ثاني  ویلي: قطر او ترکیه د افغانستان له لنډمهالي حکومت سره پرلپسې هڅې کوي، چې د هوايي ډګر د پرانیستلو لپاره، چې عادي کار وکړي؛ یوې هوکړې ته ورسېږي.

چاووش اوغلو د ترکیې له ولسمشر رجب طیب اردوغان سره په دوه ورځني سفر دوحې ته تللی دی.

ترکي رسنیو څرګنده کړې؛ د اردوغان دا سفر په داسې حال کې تر سره شوی، چې ترکیه د عربي متحده اماراتو په ګډون د خلیج له بډایه هېوادونو سره د اړیکو د بیارغولو هڅه کوي.

چاوش اوغلو همداراز ویلي، چې ترکیه او قطر باید نړیوالې ټولنې لپاره افغانانو ته د بشردوستانه مرستو په رسولو کې یوه بېلګه وړاندې کړي.

هغه ویلي؛ نړیواله ټولنه باید د سیاسي انګېزو په پام کې نیولو پرته خپلې بشري مرستې افغانانو ته ورسوي.

د افغانستان لپاره د جرمني ځانګړي استازي جاسپر ویک ویلي؛ هېواد یې په پام کې لري، چې د راتلونکي کال په لومړیو کې افغانستان ته خپل یو شمېر ډیپلوماټان واستوي.

نوموړي د پروټسڼانټ اکاډمۍ په ۳۵ غونډه کې د وینا پر مهال ویلي، چې د جرمني ډیپلوماټانو راستنېدل په دې معنا ندي، چې جرمني اسلامي امارت په رسمیت پېژني.

قطر او ترکیه له هغو هېوادونو دي، چې د تېر حکومت له سقوط وروسته د کابل ویجاړ شوي هوايي ډګر د رغونې لپاره راودانګل او د بیا پرانستلو لپاره یې له اسلامي امارت سره مرسته وکړه.

تازه خبرونه

له افغانستان څخه د امریکا پر مشرۍ د ځواکونو پر بې نظمه وتلو پښېمانه نه یم – لوید آستین

Published

on

(Last Updated On: وری ۱۰, ۱۴۰۲)

د امریکا دفاع وزیر لوید آستین د ولسي جرګې د وسله‌والو خدماتو کمیتې ته د څرګندونو پر مهال ویلي؛ له افغانستان څخه د امریکایي ځواکونو د بې نظمه وتلو پر څرنګوالي هیڅ پښیمانه نه دی.

د چارشنبې پر ورځ جمهوري غوښتونکیو د ولسي جرګې د وسله‌والو خدماتو کمیتې د ناستې پرمهال د پنټاګون د ۲۰۲۴ مالي کال د بودجې بیاکتنه هم وکړه.

د یادې ناستې پر مهال آستین ویلي؛ زه د [ولسمشر بایدن] د پرېکړې ملاتړ کوم او هیڅ پښېمانه نه یم.

جمهوري غوښتونکیو وکیلانو هم له افغانستان څخه د امریکا د ملکي یا نظامي مشرانو د بې مسوولیته وتلو پر څرنګوالی نیوکه وکړه.

د هغې پوښتنې په ځواب کې، چې آیا د پنتاګون په قومندانۍ کې داسې څوک شته، چې په افغانستان کې د ۲۰ کلنې جګړې د ناکامۍ مسؤلیت ومني؛ آستین وویل: تر هغې، چې زه پوهیږم، نه!

لوید آستین له لوی درستیزانو جنرال مارک میلي سره له راڅرګندېدو وروسته وویل، چې د جګړې په بهیر کې د امریکایي سرتېرو پر ستر کار او قربانیو ویاړي.

د چهارشنبې د ورځې دغه شاهدي په داسې حال کې تر سره شوه، چې د امریکا د ولسي جرګې د بهرنیو اړیکو کمیتې مشر مایکل مک کال د امریکایي ځواکونو د بې مسوولیته وتلو په اړه څېړنې ترسره کوي.

مک کاول په وار وار له بهرنیو چارو وزارت څخه د ۲۰۲۱ ز. کال په اګست کې د وتلو اړوند مسلو په اړه د اسنادو غوښتنه کړې وه؛ خو بهرنیو چارو وزارت د اسنادو په چمتو کولو کې پاتې راغی او مک کاول د دوشنبې پر ورځ د احضاریې حکم صادر کړ.

Continue Reading

تازه خبرونه

د افغانستان په اووه ولایتونو کې ۶۴۵ کورنۍ سیلابونو ځپلي دي- اوچا

Published

on

(Last Updated On: وری ۱۰, ۱۴۰۲)

د ملګرو ملتونو د بشري چارو د همغږۍ دفتر (OCHA) څرګنده کړې؛ د افغانستان په اووه ولایتونو کې سختو بارانونو او سېلابونو شاوخوا ۶۴۵ کورنۍ زیانمنې کړې دي.

د ملګرو ملتونو د بشري چارو د همغږۍ دفتر (اوچا ) ویلي؛ مرستندویه ادارې د اغیزمنو سیمو ارزونه کوي او له اړتیاوو سره سم مرستې چمتو کوي، خو محدوده بودجه د مرستو رسولو د کچې وړتیاوې محدودوي.

د مهاجرت نړیوالې ټولنې په بلخ ولایت کې د وروستیو سیلابونو له کبله له ۵۰۰ څخه زیاتو زیانمنو شویو کورنیو سره نغدي مرسته کړې ده.

د بلخ ولایت د شولګرې ولسوالۍ یو شمېر زیانمن شوي کسان د مرستو له کموالي اندېښمن دي او وايي، چې ډېرو مرستو ته اړتیا لري.

د بلخ ولايت د شولګرې ولسوالۍ استوګن سلطان علي وايي: که زارع ولسوالۍ پوره مرسته ونه رسیږي؛ نو په راتلونکي کې به د خلکو لپاره ناوړه پايلې رامنځته شي.

د دې ولسوالۍ يو بل اوسیدونکي قادر خان ويلي: سېلاب مو څاه ګانې له خټو ډکې کړې؛ مونږ پاکې اوبه نه‌لرو.

له طبیعي پېښو سره د مبارزې وزارت ټینګار کوي، چې دوی په بېلابېلو ولایتونو کې له سېلاب ځپلیو سره یو څه مرستې کړې؛ خو ډېرو نورو مرستو ته اړتیا لیدل کیږي.

د دغه وزارت د څرګندونو له مخې؛ د ١٤٠٢ لمریز لېږدیز کال له پيل راپدیخوا د هېواد په ٢٣ ولايتونو کې د سېلابونو او زلزلو له کبله ١٠ کسان مړه شوي، ٧٦ نور ټپيان دي، ١٧٧٩ د استوګنې کورونه ويجاړ شوي او ٢٢ زره جريبه کرنيزه ځمکه سېلابونو وړې ده.

Continue Reading

تازه خبرونه

د ملګرو ملتونو امنیت شورا غړیو په افغانستان کې پر ملکي وګړیو د برید غندنه وکړه

Published

on

(Last Updated On: وری ۹, ۱۴۰۲)

د ملګرو ملتونو د امنیت شورا غړیو په ډاګه کړې؛ د کابل ښار د ملک اصغر په څلور لاري کې پرونی ځانمرګي برید وحشیانه نومولی او د هغه غندنه یې وکړه.

د دغې شورا په اعلاميه کې راغلي، چې ترهګري په هر نوم او بڼه، چې وي؛ په افغانستان او نړۍ کې د سولې او امنيت پر وړاندې تر ټولو جدي ګواښ دى.

د دې شورا غړیو څرګنده کړې؛ هر ډول ترهګریز عمل، له انګیزې پرته، په هر ځای، هر وخت او د هر چا له خوا، چې وي جنایت دی.

د دې شورا غړیو د دغه ډول بریدونو د عاملینو د محاکمې غوښتنه هم کړې ده.

د دې شورا په اعلاميه کې راغلي: د امنيت شورا د ملکي افغانانو پر وړاندې دغه تروريستي عمل په کلکه غندي.

د کابل ښار د ملک اصغر په څلور لاري کې پرون ځانمرګي برید شپږ ملکي وګړي ووژل او ګڼ نور یې ټپیان کړل.

د داعش خراسانۍ ډلې د دغه برید مسوولیت منلی دی.

Continue Reading

Trending

Copyright © 2022 Ariana News. All rights reserved!