د افغانستان اسلامي امارت د بهرنیو چارو وزارت د فلسطینیانو د بې ځایه کیدو او په نورو هېوادونو کې د هغوی د میشتېدو په اړه د امریکا د ولسمشر ډونالډ ټرمپ څرګندونې له نړیوالو قوانینو ښکاره سرغړونه بللې ده.

د بهرنیو چارو وزارت نن (چارشنبه) په یوه خبرپاڼه کې لیکلي، چې هیڅوک د فلسطین د خلکو د برخلیک پرېکړه نشي کولی.

په دې خبرپانه کې راغلي: «اسلامي امارت باور لري، چې دا ډول پلانونه نه یوازې د صهیونیسټي رژیم د ناوړو موخو ښکارندویي کوي، بلکې د مسلمانانو د کرکې او په سیمه کې د کړکېچ د زیاتولو سبب هم ګرځي».

د خبرپاڼې له مخې؛ اسلامي امارت له نفوذ لرونکو او عدالت غوښتونکو هېوادونو څخه غواړي، چې د دا ډول دسیسو پر وړاندې متحد، عملي او پخپل وخت دریځ غوره کړي.

دا په داسې حال کې ده، چې د امریکا ولسمشر ډونالډ ټرمپ د اسرائیلو له لومړي وزیر بنیامین نتانیاهو سره په یوه ګډه خبرې ناسته کې ویلي، چې امریکا د غزې تړانګې د "اوږدمهاله مالکیت" په لټه کې ده او غواړي، چې د غزې فلسطیني اوسیدونکي اردن، مصر یا نورو هېوادونو ته ولاړ شي او په دې هېوادونو کې ښکلي استوګنځایونه ولري.

د قطر لومړي وزیر د یکشنبې پر ورځ له اسرائیلو او حماس څخه وغوښتل، چې سمدلاسه د غزې د اوربند پر دوه‌یم پړاو خبرې پیل کړي؛ ځکه، چې د دې خبرو اترو د پیل د وخت په اړه کوم روښانه پلان هم نشته.

شیخ محمد بن عبدالرحمن آل ثاني د یکشنبې پر ورځ د قطر په پلازمېنه دوحه کې د ترکیې د بهرنیو چارو له وزیر سره په یوه ګډه خبري غونډه کې ویلي: "مونږ له حماس او اسرائیلو غواړو، چې سمدلاسه د تړون له مخې ګامونه پورته کړي."

د اوربند له مخې: د تړون د دوه‌یم پړاو د پلي کولو لپاره خبرې اترې باید د اوربند د لومړي پړاو له شپاړسمې ورځې څخه مخکې، چې دوشنبه ده؛ پیل شي.

اسرائیل او حماس تېره میاشت یو پېچلی درې پړاویزه تړون لاسلیک کړ، چې په غزه کې یې جګړه ودروله. حماس تر اوسه پورې د اسرائیلو په زندانونو کې د سلګونه فلسطینیانو د خوشې کولو په بدل کې ۱۸ یرغمل شوي کسان خوشې کړي دي.

رویټرز راپور ورکړی، چې په غزه کې اوس هم له ۷۰ څخه زیات یرغمل کسان ساتل کېږي.

تمه ده، چې د تړون د دوه‌یم پړاو له مخې؛ ټول یرغمل شوي خوشې شي، دښمني د تل لپاره پای ته ورسیږي او اسرائیلي ځواکونه له غزې بشپړ ووځي.

شیخ محمد وایي: " تر دې دمه په دې اړه کوم ځانګړی پلان نشته، چې چیرته او کله به دا خبرې ترسره شي."

هغه ویلي، چې "منځګړي له حماس او اسرائیلو سره د ټیلیفون له لارې خبرې اترې لري او قطر د خبرو اترو د راتلونکي پړاو لپاره اجنډا هم ټاکلې ده. مونږ هیله من یوو؛ په راتلونکو څو ورځو کې یو څه حرکت وګورو. دا ډېره اړینه ده، چې مونږ هرڅه همدا اوس پیل او له دوه‌‌څلوېښتمې ورځې مخکې یوتړون ته ورسیږو."

د اسرائیلو د لومړي وزیر بنیامین نتانیاهو دفتر اعلان کړی، چې نوموړی به د دوشنبې پر ورځ په واشنګټن کې د تړون د دوه‌یم پړاو خبرو په اړه د امریکا له ولسمشر ډونالډ ټرمپ، د منځني ختیځ لپاره د دې هېواد له استازي سټیو ویټکاف سره خبرې اترې پیل کړي.

ویل کیږي، چې نتانیاهو به له ویتکاف سره د خپلې لیدنې په بهیر کې د اوربند او د اسرائیلو د دریځونو په اړه بحث وکړي. ویټکاف به بیا له مصري او قطري چارواکو سره خبرې وکړي، چې د واشنګټن پر ملاتړ له تېرو ۱۵ میاشتو راپدېخوا د اسرائیلو او حماس ترمنځ منځګړیتوب کوي.

د سوریې واکمن احمد الشرع د چارشنبې پر ورځ د هېواد لنډمهاله ولسمشر وټاکل شو.

رویټرز راپور ورکړی، چې د بشارالاسد پر حکومت د برید د رهبري کوونکي پوځي قومندانۍ د خبرپاڼې له مخې؛ احمد الشرع د انتقالي پړاو لپاره د لنډمهالې مقننه شورا د جوړولو واک هم په لاس کې واخیست او د سوریې اساسي قانون وځنډول شو.

دا پرېکړې د هغو پوځي قومندانانو په غونډه کې شوي، چې د اسد د رژیم په نسکورولو کې یې برخه اخیستې وه.

احمد الشرع په غونډه کې د وینا پر مهال ویلي؛ په سوریه کې ترټولو مهم لومړیتوب دا دی، چې په حکومت کې تشه "په قانوني او مشروع ډول" ډکه شي.

هغه دا هم ویلي، چې مدني سوله باید د انتقالي عدالت او د غچ اخیستنې د مخنیوي له لارې وساتل شي؛ دولتي ادارې، د پوځي او امنیتي ادارو پر مشرۍ باید بیا جوړې شي او اقتصادي بېخبنا( زیربنا ) باید پراختیا ومومي.

احمد الشرع ژمنه کړې؛ د سیاسي لېږد بهیر به پیل کړي، چې په کې یو ملي کنفرانس، یو ټولګډونه حکومت او په پای کې ټاکنې شاملې دي.

هغه ویلي، چې د ټاکنو ترسره کول ممکن څلور کاله وخت ونیسي.

د چارشنبې ورځې په اعلان کې دا ندي ویل شوي، چې کله به یو نوی مقننه ارګان وټاکل شي یا د سیاسي لېږد د مهال‌وېش لپاره نوي توضیحات وړاندې شوي ندي.

د قطر حکومت په یوه خبرپانه کې د سوریې له وروستۍ هڅې هرکلی کړی دی.