د ریاست‌الوزرا د مقام دفتر اعلان کړی، چې د ریاست‌الوزرا د مقام لوی رییس ډاکټر عبدالواسع په ارګ کې د افغانستان لپاره د قطر له سفیر مردف بن علي القاشوطي سره لیدلي او پر دوه اړخیزو اړیکو یې بحث او خبرې کړې دي.

د خپرو شویو معلوماتو له مخې؛ د قطر سفیر د افغانستان او قطر اړیکې تاریخي او ټینګې بللې او څرګندوي، چې د خپلې دندې پر مهال به د دواړو هېوادونو د اړیکو د پراخولو لپاره هڅې وکړي.

هغه همداراز په افغانستان کې د قطر د پراختیایي او مرستندویه پروژو یادونه کړې او زیاتوي، چې د شته امنيتي وضعیت په رڼا کې دوحه هڅه کوي خپلې همکارۍ په بېلابېلو برخو کې روانې وساتي.

د قطر سفیر د افغانستان او پاکستان ترمنځ روانې مثبتې اړیکې د اقتصاد، امنیت او سیمه‌ییز ثبات لپاره مهمې بللې او وایي، چې قطر هڅه کوي د دواړو هېوادونو ترمنځ د ستونزو د حل لپاره مناسبې لارې چارې وموندل شي.

دغه راز ډاکټر عبدالواسع د افغانستان او قطر اړیکې مهمې بللې او څرګندوي، چې قطر په تېرو دوه لسیزو کې د یوه ورور او اسلامي هېواد په توګه په افغانستان کې د سولې او ثبات د ټینګښت لپاره ډېرې هڅې کړې دي.

هغه په افغانستان کې د قطر له لوري پلې شوې پروژې ګټورې بللې او د دواړو هېوادونو ترمنځ یې د همکاریو د پراختیا غوښتنه کړې ده.

د ریاست‌الوزرا د مقام لوی رییس ټینګار کړی، چې اسلامي امارت له ګاونډ هېوادونو، سیمې او نړۍ سره د متقابل احترام، د افغانستان د ملي ګټو او شرعي اصولو پر بنسټ مثبتې اړیکې غواړي.

د قرغزستان ولسمشر صدیر جباروف ویلي، چې د افغانستان ثبات او له نړیوالې ټولنې سره د دغه هېواد تدریجي یوځای کېدل به د ملګرو ملتونو د امنیت شورا د غړیتوب په صورت کې د قرغیزستان له مهمو لومړیتوبونو څخه وي.

جباروف د ۲۰۲۶ ز.کال د جون میاشتې د امنیت شورا د غیر دایمي غړو له ټاکنو څخه مخکې د نړۍ مشرانو ته په خپل پیغام کې ویلي، چې د منځنۍ آسیا امنیت د افغانستان له ثبات سره تړلی او که بیشکک امنیت شورا ته لار پیدا کړي؛ د افغانستان وضعیت ته به ځانګړې پاملرنه وکړي.

د قرغزستان ولسمشر زیاته کړې؛ هېواد به یې د افغانستان خلکو، په ځانګړي توګه ښځو او ماشومانو ته بشري مرستې روانې ساتي او د افغانستان له تدریجي اقتصادي او سیاسي ادغام څخه ملاتړ کوي.

هغه د نړۍ اوسنی وضعیت د اندېښنې وړ بللی او ویلي یې دي، چې د جیوپولیټیک سیالیو زیاتوالی، په اروپا، منځني ختیځ او افریقا کې جګړې او د نړیوالو قوانینو کمزوري کېدل، نړیوال نظام له جدي ننګونو سره مخ کړی دی.

جباروف همداراز ټینګار کړی، چې کوچني او په وچه کې راګیر هېوادونه په ملګرو ملتونو امنیت شورا کې بشپړ استازیتوب نه‌لري او د قرغزستان نوماندي د همدې هېوادونو د متوازن او عادلانه حضور د پیاوړتیا لپاره وړاندې شوې ده.

د نوموړي د څرګندونو له مخې؛ قرغیزستان به د امنیت شورا د غړیتوب په صورت کې له مخنیوي کوونکې ډیپلوماسي، سوله‌ییزو حل‌لارو او نړیوالو کړکېچونو کمولو ملاتړ وکړي.

هغه دا هم ویلي، چې د قرغیزستان ټولې سرحدي شخړې له ګاونډ هېوادونو سره د خبرو اترو او سوله‌ییزو لارو حل شوې دي.

ټاکل شوې، چې د ملګرو ملتونو د امنیت شورا د غیر دایمي غړو ټاکنې به د ۲۰۲۶ ز.کال د جون پر درېیمه په نیویارک کې ترسره شي.

د افغانستان کانونو او پټرولیم وزارت اعلان کړی، چې د کانونو او پټرولیم وزیر هدایت‌الله بدري ترکمنستان ته د خپل سفر پر مهال له ترکمن‌باشي بندر څخه لیدنه کړې او د هرات برخې لپاره د ټاپي پروژې اړینو پایپونو او تجهیزاتو د لېږد بهیر یې له نږدې ارزولی دی.

د یاد وزارت د معلوماتو له مخې؛ د افغانستان په هرات کې د ټاپي پروژې عملي چارې منظمې او چټکې روانې دي او د پروژې په بېلابېلو برخو کې د پام وړ پرمختګونه شوي دي.

د کانونو او پټرولیم وزارت زیاته کړې؛ تر اوسه ۶۳ کیلومټره نل غځول شوی او د نورو ۱۲۵ کیلومټرو نلونو د نصب د دوام لپاره چمتو شوی دی.

همدارنګه شاوخوا ۵۱ کیلومټره نلونه له بهر څخه د پروژې سیمې ته رالېږدول شوي دي.

د دې وزارت د څرګندونو له مخې، د ټاپي پروژې عملي بهیر اوس د پخوا پر پرتله چټک شوی او هره ورځ په دې پروژه کې نږدې ۵۰۰ مټره نوي نلونه ویلډ کېږي.

ټاپي پروژه د سیمې له سترو ګاز لېږدونکو پروژو څخه ګڼل کېږي، چې د ترکمنستان ګاز به د افغانستان له لارې پاکستان او هند ته ولېږدوي.