د افغانستان اسلامي امارت ویاند ذبیح الله مجاهد د سې شنبې پر ورځ په افغانستان کې د محاکمو د فعالیتونو او د شرعي احکامو د پلي کېدو په اړه د ملګرو ملتونو د مرستندویه پلاوي (یوناما) ادعاوې رد کړې.

مجاهد په یو لړ تویتونو کې ویلي، چې د یوناما ادعاوې بې بنسټه دي او حقیقت نه څرګندوي.

ذبیح الله مجاهد څرګندوي: حقیقت دا دی، چې په افغانستان کې قضايي نظام د پخوا پر پرتله ډېر پیاوړی شوی او عدالت خوندي دی او د هېوادوالو حقوق د اسلامي احکامو له مخې په پام کې نیول شوي دي.

هغه زیاته کړې، چې د پرمختګ او لاسته راوړنو له پامه غورزول غیر عادلانه دي.

هغه په ډاګه کړې: افغانان پوهیږي، چې دلته مثالي عدالت شته؛ امنیت خوندي دی، روڼ قضايي سیستم شته او د پیاوړتیا لپاره یې هم هڅې روانې دي.

هغه دا هم ویلي، چې د افغانستان قضايي سیستم لاسته راوړنې د نړیوال امنیت په برخه کې هم مرسته کړې ده.

مجاهد په ډاګه کړې: که پرمختګونه او لاسته راوړنې بيا هم له پامه غورزول شي؛ دا به کفر وي، نو دا بې انصافي ده.

د یوناما راپور د بشري حقونو بېلابېلې سرغړونې مستندې کړي، چې په کې غیر قضایي وژنې، خپلسري توقیفونه او د بیان او غونډې پر آزادۍ محدودیتونه د پاملرنې وړ دي.

راپور همدارنګه د اسلامي امارت لخوا د ځینو شرعي احکامو پلي کولو په اړه اندېښنې راپورته کړي. لکه د ادعا شويو اخلاقي جرمونو لپاره مجازات، چې پرې نیوکه شوې.