نن سې‌شنبه(د لیندۍ څلورمه) په یوه خبري کنفرانس کې د افغانستان برښنا شرکت اجرائیوي رییس عبدالباري عمر خلکو ته د برښنا د پرچاوې اصلي لاملونه څرګند کړل.

د عبدالباري عمر د څرګندونو له مخې، د برښنا پرچاوي درې بنسټیز علتونه لري:

۱. هېواد ته د کډوالو پراخه راستنېدا

۲. د صنعتي او استوګنیزو ښارګوټو پراختیا او زیاتوالی

۳. د هېوادوالو له‌خوا د برښنا ډېر لګښت

هغه ټینګار کړی، چې د دې ننګونو حل کول د انرژۍ د لګښت ښه مدیریت او د خلکو او دولتي ادارو همکارۍ ته اړتیا لري.

د افغانستان برښنا شرکت اجرائیوي رییس د څرګندونو له مخې؛ د هېواد برښنا له پیل څخه غیر معیاري او کمزورې جوړه شوې او د برښنا د اوسنیو غوښتنو پوره کولو وس نلري.

هغه ټینګار کړی، چې د وچکالۍ له کبله د اوبو برښنا په تولیدي سرچینو کې د اوبو کچه راټیټه شوې، چې  د برښنا نسبي کمښت یې رامنځته کړی دی.

عبدالباري عمر ویلي: “مونږ لږ تر لږه لس کاله اړتیا لرو، چې وکولی شو  ۲۰ زره میګاواټه برښنا پر کور دننه تولید او ټولنې ته وړاندې کړو.”

هغه دا هم ویلي، چې د برښنا شرکت سږکال د سب سټیشنونو په ګډون د شبکو لپاره د ۴۷ میلیارډ افغانیو بودجه پلان کړې ده.

د عبدالباري عمر د څرګندونو له مخې؛ د هېواد د برښنا پر تولیدي سرچینو چټک کار روان دی، چې په کې له ۷۱۹ میلیون ډالرو څخه ډېره پانګونه شوې ده.

هغه ویلي: “مونږ یوازې د برښنا د تولید او د شبکو پر پراختیا کار ندې کړی، بلکې د اداري سیسټمونو پر عصري کولو هم کار شوی دی او د برښنا رسولو یو عصري سیسټم به ډېر ژر پرانستل شي.”

نوموړی وایي، چې په افغانستان کې د لومړي ځل لپاره مونږ له بادي انرژي څخه د پاکې برښنا تولیدي نوښت پلي کړاو پر دې سربېره مو له لمریزې او ګازي انرژۍ څخه د برښنا د تولید لپاره پر پروژو هم کار روان کړی دی.

ویل کیږي، چې د برښنا کمښت او برښنا ته د لاسرسي نشتوالی تل د افغانانو لپاره یوه ستونزه وه. د افغانستان برښنا شرکت د څرګندونو له مخې؛ یوازې ۳۸ سلنه افغانان برښنا ته لاسرسی لري.