د پاکستان چارواکو راپور ورکړی، چې سلګونه افغان کورنۍ د جنوبي وزیرستان د انګور اډې له لارې له پاکستان څخه افغانستان ته ستنې شوې دي.

د سرچینو د څرګندونو له مخې؛ د ستنولو دا عملیات د سیمه‌ییزېادارې تر څارنې لاندې او د ځواکونو، پولیسو او نورو ادارو پر همکارۍ ترسره کیږي.

دغو چارواکو زیاته کړې: دغه کورنۍ له انګور اډې څخه پر پړاویزه توګه تېریږي؛ دوی ته سرپناه، خواړه، د څښاک اوبه او برښنا چمتو شوې ده. همدارنګه، د وانا په زراعتي پارک کې لنډمهاله استوګنځي ورته هم چمتو شوي، چې خیمې او د خوب سامانونه لري.

امنیتي ځواکونه په دواړو اړوند سیمو کې پر پراخه کچه ځای پر ځای شوي، چې د خلکو روان بهیر اداره او نظم وساتي.

د ملګرو ملتونو د چارواکو د څرګندونو له مخې؛ هغه موټرونه، چې افغان کورنۍ لېږدوي په منظم ډول قطار شوي او هڅې روانې دي، چې پر بشپړ درناوي له پولې تېر شي.

د ملګرو ملتونو د کډوالو عالي کمیشنرۍ (UNHCR) د څرګندونو له مخې؛ سږ کال تر دې دمه له ۱.۲ میلیون ډېر افغانان له پاکستان او ایران څخه بېرته ستنېدا ته اړ شوي او شونې ده، چې دا شمېر به د ۲۰۲۵ کال تر پایه شاوخوا ۳ میلیون کډوالو ته ورسیږي.

پاکستان د ۱.۳ میلیون ډېرو ثبت شويو افغان کډوالو کوربتوب کوي. په داسې حال کې، چې ایران د ډېر لوی شمېر افغانانو کوربتوب کوي.

د ملګرو ملتونو د کډوالو ادارې او د ملګرو ملتونو نورو ادارو د راستنېدا د کچې او سرعت په اړه خبرداری ورکړی دی.