ملي دفاع وزارت خبر ورکړی، چې د ۲۰۱ خالد بن ولید رض قول اردو ځواکونو په یو لړ ځانګړو عملیاتو کې ګڼ‌شمېر وسلې او مهمات نیول شوي دي.

د ملي دفاع وزرارت د څرګندونو له مخې؛ دغه وسلې او مهمات د لغمان ولایت د علیشنګ ولسوالۍ د میل درې په اړوند سیمه کې کشف او وموندل شوې.

یاد وزارت زیاته کړې؛ په یادو وسلو او مهماتو کې ۲۲۶ بکسې د دهشکې، زیکو-۱، ام-۲۴۰ او ام -۱۶ مرمۍ او ګڼ‌شمېر بېلابېلې وسلې او پوځي تجهیزات تر لاسه شوي دي.

داعش خراسان د کابل د شهرنو په ګل‌فروشي سیمه کې پر یوه ګډ افغان او چینايي رسټورانټ د چاودنې د مسوولیت منلو تر څنګ ویلي، چې تر سره شوی برید ځانمرګی و.

دغه پېښه د دوشنبې پر ورځ مازیګر مهال( د مرغومي نهه‌ویشتمه) رامنځته شوې او کابل پولیسو ویلي، چې په دې پېښه کې د یوه مسلمان چینايي په ګډون ۷ کسانو خپل خوږ ژوند له لاسه ورکړی او ۱۳ نور د ښځو او ماشومانو په ګډون ټپيان دي.

داعش خراسان ته نږدې د یوې رسنۍ په خپره شوې خبرپانه کې راغلي: د دوی یوه ځانمرګي بریدګر د کابل په شهرنو سیمه کې د چینایانو یوه رستورانټ ته له ننوتلو وروسته؛ پر چینایي وګړو او امنیتي ساتونکو خپلو چاودېدونکو توکو ته چاودنه ورکړې ده.

د داعش خراسان څانګې دا ادعا هم کړې، چې په دې برید کې یو شمېر چینایان، ولسي وګړي او همداراز هغه ځواکونه، چې په یاده سیمه کې یې د امنیت ساتنې مسوولیت درلود؛ له مرګ او ژوبلې سره مخ کړي دي.

دغه راز دوی له سند وړاندې کولو پرته د مرګ او ژوبلې شمېر ۲۵ کسان ګنلي او د چینايي وګړو د پر نښه کولو لامل یې «له اویغور مسلمانانو سره د چین چلند» بللی دی.

کابل پولیسو ویلي؛ په دې چاودنه کې د چینايي مسلمانانو رسټورانټ پر نښه شوی او وژل شوی چینایي ایوب نومی یو مسلمان او د سینګیانګ اوسېدونکی و.

دغه ګډ رسټوراتنټ  Chinese Noodle نومېږي، چې د يوه چينايي سینکیانګي مسلمان( عبدالمجید او د ده د مېرمنې) او يوه افغان( عبدالجبار محمود ) له لوري په ګډه چلېده او دلته به د چينايي مسلمانانو لپاره خواړه تيارېدل او پلورل کېدل.

د یادونې ده، چې دې خونړۍ پېښې پر مرګ او ژوبلې سربېره د هوټل شاوخوا کورونو او دوکانونو ته هم مالي زیانونه اړولي دي.

د ایران اسلامي جمهوریت بهرنیو چارو وزیر سید عباس عراقچي او د افغانستان اسلامي بهرنیو چارو وزیر امیر خان متقي تېره شپه په یوه ټیلیفوني اړیکه کې د دواړو هېوادونو ترمنځ د اړیکو او نړیوالو پرمختګونو په اړه خبرې وکړې.

د بهرنیو چارو وزارت د خپرې شوې خبرپاڼې له مخې؛ په دې ټیلیفوني اړیکه کې پر اقتصادي او سوداګریزو اړیکو سربېره د ایران او افغانستان ترمنځ د دوه اړخیزو اړیکو د پرمختګ په اړه هم بحث او خبرې شوې دي.

دغه راز دواړو لوریو د اقتصادي اړیکو د پراخولو او د دواړو هېوادونو ترمنځ د سوداګریزو تبادلو د آسانتیاوو پر لارو چارو بحث کړی دی.

په دې خبرو کې امیرخان متقي د ترهګرۍ او بهرنۍ لاسوهنې پر وړاندې د خپلواکۍ، امنیت او ملي حاکمیت د ساتنې لپاره د ایران د ملت پر هوډ ټینګار وکړ.

متقي د سیمې د هېوادونو په چارو کې د هر راز بهرنۍ لاسوهنې غندنه وکړه، ډاډ یې څرګند کړ، چې د ایران حکومت او خلک به له ملي یووالي سره د هېواد امنیت او ملي حاکمیت خوندي کړي.