تونس د ۲۰۲۶ فوټبال نړیوال جام په سیالیو کې له سویډن څخه ۵ پر ۱ درندې ماتې وروسته صبري لاموشي د روزونکي له دندې ګوښه او نامتو فرانسوی روزونکی اروه رنار یې د هغه پر ځای وټاکه.

د تونس ملي لوبډلې د جون پر څوارلسمه( یکشنبه) د نړیوال جام په لومړۍ لوبه کې له سویډن سره سیالي وکړه؛ خو ۵ د ۱ پر توپیر یې ماتې وخوړه. دا لوبه د F ګروپ په چوکاټ کې ترسره شوه؛ هغه ګروپ، چې نډرلېنډ او جاپان هم په کې دي.

د دغې ماتې له کبله تونس د خپل ګروپ د جدول وروستي ځای ته ولوېد او بل پړاو ته د دې لوبډلې د رسېدا په اړه اندېښنې زیاتې شوې. سویډن په دې لوبه کې غوره لوبه وکړه او د تونس دفاعي کمزورۍ یې څرګندې رابرسېره کړې.

د رسنیو د راپورونو له مخې، د تونس فوټبال چارواکو له دې ناهیلې کوونکې پایلې وروسته پرېکړه وکړه،  چې صبري لاموشي له دندې لرې او اروه رنار د ملي لوبډلې نوی روزونکی وټاکي.

۵۷ کلن رنار د نړۍ د فوټبال له پېژندل شویو روزونکو څخه دی. هغه په ۲۰۱۲ز.کال کې زامبیا د افریقا ملتونو جام اتلولۍ ته ورسوله او درې کاله وروسته یې له عاج ساحل څخه هم همدا اتلولي وګټله.

دې فرانسوي روزونکي د مراکش، سعودي عربستان او د فرانسې د ښځو د ملي لوبډلو روزنه هم کړې ده.

د رنار ټاکنه د دې لپاره شوې، چې د تونس لوبډلې ته د راتلونکو حساسو سیالیو مخکې بېرته روحیه، نظم او پر ځان باور ور وګرځوي.

تونس د ګروپي پړاو دوه نورې لوبې هم په مخکې لري او د بل پړاو د هیلې د ژوندي ساتلو لپاره باید ښې پایلې ترلاسه کړي. دغه لوبډله به د جون پر یوویشتمه له جاپان او د جون پر بېنځه‌ویشتمه د ګروپي پړاو په وروستۍ لوبه کې له نډرلینډ سره مخامخ شي.

له سویډن څخه دا ماتې د نړیوال جام په تاریخ کې د تونس له تر ټولو درندو ماتو څخه ګڼل کېږي او پر لوبغاړو او روزنیز پلاوي یې فشارونه زیات کړي دي.

دغه راز سویډن په‌دې بریا کې له F ګروپ څخه د بل پړاو د احتمالي لوبډلو په ډله کې خپل دریځ ښه پیاوړی کړ.

تونس اوس هیله لري، چې د اروه رنار تجربه او وړتیا به د لوبډلې حالت بدل کړي او له سیالیو څخه به یې له وخت مخکې د وتلو مخه ونیسي.

په افغانستان کې د فوټبال مینه‌وال کولی شي د نړیوال جام سیالۍ هره ورځ پر ژوندۍ بڼه د آریانا راډیو ټلوېزیون له لارې وګوري. همدارنګه د سیالیو د مهالوېش او وروستیو خبرونو د ترلاسه کولو لپاره د آریانا ټلوېزیون او آریانا نیوز ټولنیزې پاڼې وڅاري.

د اسټرالیا فوټبال ملي لوبډلې د ۲۰۲۶ نړیوال جام په سیالیو کې خپله لومړۍ لوبه بریالۍ پیل کړه او د منظمې لوبې او اغېزناکو ځوابي بریدونو پر مټ یې ترکیې ته ۲ د صفر پر توپیر ماتې ورکړه او په D ګروپ کې یې بریالی پیل ثبت کړ.

دغه لوبه د شنبې پر ورځ د کاناډا په ونکوور ښار کې ترسره شوه. په دې سیالۍ کې ۲۰ کلن لوبغاړي نیستور ایراکونونډا او کانر میټکالف ګولونه ووهل او د اسټرالیا بریا یې یقیني کړه.

په دې لوبه کې د اسټرالیا ځوان دروازه‌ساتونکي پاټریک بیچ ښه ځلېد او پر څو مهمو غبرګونونو یې د خپلې لوبډلې دروازه خوندي وساتله او د بریا پر لوري یې ښه رول ولوباوه.

د اسټرالیا روزونکي ټوني پوپوویچ د لوبډلې په لومړني ترکیب کې زړورې پرېکړې وکړې؛ هغه تجربه‌لرونکی دروازه‌ساتونکی میټیو رایان پر احتیاطي څوکۍ کېناوه او بیچ ته یې د لوبېدا فرصت ورکړ؛ هغه پرېکړه، چې په پایله کې د لوبډلې لپاره بریالۍ ثابته شوه.

سره له دې، چې ترکیه تر ډېره پر توپ واکمنه او او پرله‌پسې بریدونه یې کول؛ خو د دې لوبډلې بریدګر څو ځله د بیچ له ډاډمنو ژغورنو سره مخ شو او د ګول وهلو فرصتونه یې له لاسه ورکړل.

اسټرالیا د لوبې په اته‌ویشتمه دقیقه کې د یوه چټک ځوابي برید پر مهال لومړی ګول وواهه. دغه برید د دروازه‌ساتونکي له لوري پیل شو او په پای کې د یوه دقیق او اوږده پاس په وسیله ایراکونونډا یوازې له دروازه‌ساتونکي سره مخامخ شو او د لوبې لومړی ګول یې ثبت کړ.

وروسته ترکیې د ارډا ګولر او نورو لوبغاړو په خطرناکو شوټونو د لوبې د برابرولو هڅه وکړه؛ خو د اسټرالیا د دروازه‌ساتونکي ځلندې لوبې د مساوي ګول مخه ونیوله.

د اسټرالیا دوه‌یم ګول د لوبې په پېنځه‌اویاایمه دقیقه کې مټکالف د جزا له ساحې بهر یوه پیاوړی شوټ وواهه او د خپلې لوبډلې بریا یې یقیني کړه.

ایراکونونډا له لوبې وروسته وویل: «ډېر ښه احساس لرم. له روزنیز پلاوي او هېوادوالو له ملاتړ څخه مننه کوم.»

دغه ځوان لوبغاړی له دې ګول سره د نړیوال جام په سیالیو کې د اسټرالیا د نرینه‌وو د ملي لوبډلې په تاریخ کې تر ټولو ځوان ګول‌وهونکی شو.

د دې ګروپ په بله لوبه کې امریکا پاراګوای ته ۴- ۱ ماتې ورکړې او د جدول په سر کې ځای لري.

د فیفا ۲۰۲۶ فوټبال نړیوال جام سیالۍ د پنجشنبې پر شپه د کوربه هېواد مکسیکو او جنوبي افریقا ترمنځ پر پرانیستونکې لوبه پیل کېږي. دا لوبه د مکسیکو په آزتکا لوبغالي کې ترسره کېږي.

دا سیالي د A ګروپ برخه ده او د نړیوال جام د تاریخ تر ټولو ستر پړاو پیلوي، چې په کې ۴۸ لوبډلې د درې کوربه هېوادونو؛ امریکا، کاناډا او مکسیکو ترمنځ د ۳۹ ورځو په اوږدو کې تر سره کیږي.

دا لوبه د ۲۰۱۰ز. کال د نړیوال جام د پرانیستې لوبې یاد هم تازه کوي؛ هغه وخت مکسیکو او جنوبي افریقا په جوهانسبرګ کې ۱-۱ مساوي شوي وه، چې د افریقا په وچه کې لومړنی نړیوال جام و.

تمه ده، چې له ۸۰ زره ډېر نندارچیان په آزتکا لوبغالي کې حضور ولري. دا لوبغالی به لومړی داسې لوبغالی وي، چې درې ځله د نړیوال جام د پرانیستې لوبې کوربه‌توب کوي؛ مخکې هم د ۱۹۷۰ او ۱۹۸۶ کالونو پرانیستې لوبې په کې شوې وې.

مکسیکو، چې د نړۍ په درجه بندۍ کې څوارلسم مقام لري؛ د A ګروپ له قوي لوبډلو څخه ګڼل کېږي او غواړي د کوربه‌توب له امتیازه پر ګټه اخیستنې د سیالیو پیل پر بریا وکړي. دا لوبډله په وروستیو ۸ لوبو کې ماتې شوې نه‌ده او د ګانا، استرالیا او سربیا پر وړاندې یې روزنیزې لوبې ګټلې دي.

دغه راز جنوبي افریقا له ۲۰۱۰ز.کال وروسته بېرته نړیوال جام ته راستنه شوې او دا یې څلورم ګډون دی. که څه هم دا لوبډله د نړۍ په درجه بندۍ کې شپېتمه ده؛ خو روزونکی هوګو بروس باور لري، چې لوبغاړي یې کولی شي کوربه لوبډله له ننګونې سره مخ کړي.

هغه ویلي: «زمونږ لپاره دا یوه ډېره ښه تجربه ده. اړینه ده، چې د لوبې پر پلان ولاړ پاتې شو او په لوبغالي کې پر پېښو راوڅرخیږو.»

د جنوبي افریقا چمتووالی د ویزو د ځنډ له کبله یو څه اغېزمن شوی؛ خو لوبډله هیله لري، چې ۱۶ کلونو مخکې ته ورته دا ځل هم مکسیکو ته ستونزې جوړې کړي.

جنوبي افریقا په تېرو څلور مخامخ سیالیو کې مکسیکو دوه ځله ګټلې؛ یوه بریا یې ترلاسه کړې او یوه لوبه مساوي پای ته رسېدلې ده.

دا پرانیستونکې لوبه د کابل پر وخت د شپې ۱۱:۳۰ پیلېږي او په افغانستان کې به پر ژوندۍ بڼه د آریانا ټلویزیون او آریانا FM راډیو له لارې خپرېږي.

د لوبو مینه‌وال کولی شي د شپې له ۱۰:۳۰ څخه د لوبې ځانګړی پیلیز پروګرام وګوري.