د اسلامي امارت ویاند څرګنده کړې، چې د انرژۍ او اوبو پخوانی وزیر عبداللطیف منصور د کلیو د پراختیا او بیارغونې او د کلیو د پراختیا او بیارغونې پخوانی وزیر محمد یونس آخوندزاده د انرژۍ او اوبو نوي وزیران ټاکل شوي دي.

همدارنګه د ټولګټو چارو وزارت مالي او اداري پخوانی مرستیال عبدالحق همکار د افغانستان برښنا شرکت د عمومي رییس په توګهاو  د اطلاعاتو او کلتور وزارت د ځوانانو چارو پخوانی مرستیال قاري محمد یونس رشید د ټولګټو چارو وزارت د مالي او اداري مرستیال په توګهټاکل شوي دي.

 د افغانستان برښنا شرکت پخوانی عمومي رییس ډاکټر عبدالباري عمر؛ د بهرنیو چارو وزارت د تشریفاتو د رییس په توګه ټاکل شوی دی.

د یادونې ده، چې دغه ټاکنې د اسلامي امارت د رهبر د حکم له مخې رامنځته شوې دي.

د ژغورنې نړیوالې کمیټې (آی‌آر‌سي) د خواشینۍ د وړاندې کولو تر څنګ په افغانستان کې د خپل یوه کارکوونکي مړینه تائید کړې او وایي، چې دې کارکوونکي د هرات ولایت د اسلام‌کلا په اړوند سیمه کې د دندې له ځایه د ستنېدا پر مهال د یوې ټرافیکي پېښې له کبله خپل ژوند له لاسه ورکړی دی.

د دې بنسټ د خبرپاڼې له مخې؛ په دې پېښه کې د آی‌آر‌سي دوه نور کارکوونکي هم سخت ټپیان شوي او د درملنې لپاره روغتون ته لېږدېدلي دي.

د ژغورنې نړیوالې کمیټې ویلي، چې د لومړۍ کرښې کارکوونکي د دې بنسټ د ماموریت اساسي برخه جوړوي او اړمنو خلکو ته د رسېدا لپاره اړینې هڅې تر سره کوي. په ځانګړي توګه په افغانستان کې، چې ډېری خلک په لرو پرتو او ستونزمنو سیمو کې ژوند کوي.

دې بنسټ زیاته کړې؛ د وژل شوي کارکوونکي له کورنۍ، ټپیانو او د هغوی له کورنیو او همدارنګه له خپلې کاري ډلې سره په دې سختو او ستونزمنو شرایطو کې همکاريو او ملاتړ ته ولاړ دي.

د ژغورنې نړیواله کمیټې له ۱۹۸۸ میلادي کال راپدېخوا په افغانستان کې خپل فعالیتونه پیل کړي او دا مهال د هېواد په نهه ولایتونو کې له زرګونو کلیو سره همکاري لري. دا بنسټ په بېلابېلو برخو کې فعالیت کوي، چې د لومړنیو روغتیایي خدمتونو وړاندې کول، په کلیوالو سیمو کې د ښوونیزخوندي چاپېریال رامنځته کول، د نغدو مرستو وېشل، د بېړنیو سرپناوو برابرول، د څښاک اوبو او حفظ‌الصحې خدمتونه وړاندې کول، د معیشتي فرصتونو رامنځته کول او د زیانمنو خلکو لپاره د ډاډ رامنځته کولو د پیاوړتیا پروګرامونه رانغاړي.

د افغانستان بهرنیو چارو وزیر امیر خان متقي له خپل عماني سیال بدر بن حمد البوسعیدي سره په ټلیفوني خبرو کې د دوه اړخیزو اړیکو ترڅنګ، د سوداګریزو، ټرانزيټي او ټرانسپورټي همکاریو د غځولو پر لارو چارو خبرې کړې دي.

د افغانستان بهرنیو چارو وزارت د خبرپاڼې له مخې؛ امیرخان متقي د چارشنبې پر ورځ (د مرغومي اووه‌لسمه) د عمان سلطنت د بهرنیو چارو له وزیر بدر بن حمد البوسعیدي سره په ټلیفوني خبرو کې د دوه اړخیزو اړیکو پر زیاتېدا خبرې کړې دي.

امیر خان متقي عمان ته خپل وروستی سفر ګټور ګڼلی او د دواړو هېوادونو د پلاویو تبادله یې د همکارۍ د پراختیا په برخه کې اړینه بللی او خپل عماني سیال ته یې کابل ته د سفر بلنه ورکړه.

په خبرپاڼه کې راغلي؛ د عمان بهرنیو چارو وزیر ویلي، چې په نږدې ورځو کې به د عمان د هوايي چلند تخنیکي پلاوی کابل ته سفر وکړي.

نوموړي دا هیله هم ښودلې، چې کابل ته د سفر پر مهال به د دوه اړخیزو همکاریو د پراختیا په اړه هر اړخیزې خبرې تر سره شي.