د بشري حقونو څار بنسټ په خپل تازه راپور کې څرګنده کړې، چې پاکستانیو چارواکو له افغانستان سره د نښتو له زیاتېدا وروسته د افغان کډوالو خپل‌سرې نیونې، چاپې او جبري ایستل ډېر کړي دي.

د یاد راپور له مخې؛ زرګونه افغان کډوال په ځانګړي توګه ښځې او ماشومان روغتیايي خدمتونو، زده‌کړې او نورو بنسټیزو اړتیاوو ته د لاسرسي له ستونزو سره مخ دي.

په دې بنسټ کې د افغانستان د چارو شنونکې فرشتې عباسي ویلي: « پاکستانيو چارواکو د افغان کډوالو د ملاتړ پر ځای د وېرې فضا رامنځته کړې او دا وضعیت د دې لامل شوی، چې ډېری یې خوړو او روغتیايي خدمتونو ته له لاسرسي تېر شي.»

راپور زیاته کړې، چې د پاکستان پولیسو په بېلابېلو ښارونو کې کور پر کور عملیات، شپنۍ تلاشي او له حکم پرته نیونې ترسره او افغان کډوال پر نښه کړي دي. ان داسې کسان هم نیول شوي، چې د باور وړ ویزې یې لرلې.

دې بنسټ زیاته کړې؛ یوازې په ۲۰۲۶ ز.کال کې له پاکستان څخه له ۱۴۶ زره ډېر افغان کډوال ایستل شوي او دا بهیر د اپرېل له پیل راپدېخوا نور هم چټک شوی دی.

په راپور کې له کډوالو څخه د رشوت اخیستو پېښوته هم نغوته شوې او ویل کیږي: هغه کسان، چې د پیسو ورکولو وس نه‌لري نیول کېږي او جبري ایستل کېږي.

د بشري حقونو د څار دې بنسټ خبرداری ورکړی، چې ډېری بېرته ستنېدونکي؛ په ځانګړي توګه خبریالان، د بشري حقونو هڅاند او د پخواني حکومت اړوند کسان له څارنې، ځورونې او امنیتي ګواښونو سره مخ دي.

دې بنسټ ټینګار کړی؛ د کډوالو جبري ایستل ان له نړیوالو ژمنو څخه د پاکستان سرغړونه ګڼل کېدی شي او له دې هېواده یې غوښتي، چې ژر تر ژره دا لړۍ ودروي.

د جمهوري نظام پخواني ولسمشر حامد‌ کرزي له شپېګل مجلې سره  ه یوه مرکه کې ویلي، چې د افغانستان خلک له څلورو لسیزو جګړو وروسته نور د نوې شخړې او د اسلامي امارت پر وړاندې د وسلوال مقاومت لېوالتیا نه‌لري.

هغه ټینګار کړی: خلک سوله، ثبات او داسې حکومت غواړي، چې د ولس پر اراده ولاړ وي؛ خو په عین وخت کې له اقتصادي بېوزلۍ کړېږي او نه غواړي هېواد یو ځل بیا ګډوډۍ ته ولاړ شي.

حامد کرزي د اسلامي امارت دننه وضعیت ته په نغوته(اشاره ) کې ویلي، چې د نظر اختلاف شته؛ خو باید د ړنګېدا هیله یې ونه‌شي.

هغه زیاته کړې؛ افغانستان د پرمختګ لپاره اقتصادي ودې، سیاسي مشارکت او د ټولو لوریو همکارۍ ته اړتیا لري.

پخواني ولسمشر یو ځل بیا د ښځو پر زده‌کړو او کار بندیزونه «زیانمن» وبلل او څرګندوي، چې دا محدودیتونه د هېواد راتلونکی کمزوری کوي.

هغه د خپلو خبرو په یوه بله برخه کې پاکستان تورن کړ، چې له تېرو څلور لسیزو د افغانستان په کورنیو چارو کې لاسوهنه کوي؛ خو اوس د خپلو سیاستونو له پایلو سره مخ شوی دی.

د سره صلیب نړیوالې کمیتې څرګنده کړې، چې د نورستان ولایت جګړه ځپلو سیمو ته د مرستو رسولو څو ورځني بېړني عملیات پیل شوی، چې له تېرو شپږ اوونیو څخه یې بنسټیزو اړتیاوو ته پوره لاسرسی نه‌درلود.

د راپور له مخې، دا اقدام د افغاني سرې میاشتې ټولنې او د خوړو نړیوال پروګرام پر همکارۍ د دې ولایت په کامدېش او برګ‌مټل ولسوالیو کې پیل شوی؛ شاوخوا ۱۳۶ زره کسان، چې نږدې ۱۷ زره کورنۍ کېږي د خوراکي توکو، روغتیايي مرستو او نورو اړینو توکو له سخت کمښت سره مخ ول.

یادو بنسټونو ویلي، چې د اپرېل له پیل راپدېخوا له ښکېلو لورو سره پرله‌پسې خبرې روانې وې، چې دغو سیمو ته خوندي او بې‌پرې لاسرسی برابر شي او اوس عملاً د مرستو د لېږد بهیر پیل شوی دی.

په لومړي پړاو کې به د خوراکي توکو وېش، روغتیايي وسایل او نور اړین توکي لومړیتوب ولري. له نورستان سره د لارو پر بیا پرانیستل کېدا بازارونه ورو ورو بېرته خلاصیږي او د ناروغانو د درملنې لپاره هم د لېږد زمینه برابره شوې ده.

د سره صلیب نړیوالې کمیټې ټینګار کړی، چې اړتیاوې اوس هم پراخې دي؛ په ځانګړي توګه د خوړو د خوندیتوب، روغتیايي مرستو او بنسټیزو آسانتیاوو ته د لاسرسی په برخو کې له سیمه‌ییزو استازو سره د اړتیاوو د پېژندلو لپاره همکاریو ته اړتیا لیدل کیږي.

په راپور کې راغلي؛ ټول فعالیتونه د بې‌پرې، خپلواکۍ او ناپېیلتوب د اصولو پر بنسټ ترسره کېږي او له ټولو خواوو غوښتنه شوې، چې زیانمنو ټولنو ته د خوندي او دوامدار لاسرسي زمینه برابره کړي.