په افغانستان کې د قطر سفیر د ترکیې سفارت د مرستیال له دندې سره د مخه‌ښې په لیدنه کې د دواړو هېوادونو د اړیکو او همکاریو په پیاوړتیا کې د هغه پر رول ټینګار وکړ.

په کابل کې د قطر سفارت ویلي، چې د دغه هېواد سفیر ډاکټر میردف بن علي القاشوطي په کابل کې د ترکیې د سفارت د ډیپلوماتیک پلاوي له مرستیال بلال امره سره د مخه‌ښۍ لیدنه کړې ده.

دغه لیدنه په افغانستان کې د ترکي ډیپلومات د دندې له پای ته رسېدا سره هم‌مهاله شوې ده.

د قطر سفیر په دې لیدنه کې د دواړو هېوادونو د اړیکو او همکاریو د پیاوړتیا په برخه کې د بلال امره له هڅو او همکاریو مننه کړې او په راتلونکو دندو کې یې ورته د بریا هیله کړې ده.

د « ډیموکراسي نو» شبکې د راپور له مخې، له امریکا څخه تر ۱۶۰ ډېر هایټیایي کډوال ایستل شوي دي؛ دا بهیر له هغې وروسته پیل شو، چې د هایټي د کډوالو د لنډمهاله خونديتوب وضعیت پای ته ورسېد.

د « ډیموکراسۍ نو» د څرګندونو له مخې، هایتي ته د کډوالو د ایستلو دا لومړنۍ الوتنه له هغې وروسته ترسره شوې، چې د امریکا سترې محکمې د ډونالډ ټرمپ حکومت ته اجازه ورکړه، چې د شاوخوا ۳۵۰ زره هایټیایي وګړو لپاره د لنډمهاله خونديتوب پروګرام پای ته ورسوي.

دغه الوتکه د پنجشنبې پر ورځ د هایټي په شمال کې د« کپ-هایټین» ښار هوايي ډګر ته کښته شوه. د دغه هېواد اصلي نړیوال هوايي ډګر، چې په پورټوپرنس کې دی؛ د وسله‌والو ډلو د تاوتریخوالي او د سیاسي بې‌ثباتۍ د زیاتېدا له کبله د دغسې الوتنو لپاره ناامنه بلل شوی دی.

د راپور له مخې، ډېری هغه کسان، چې تېره اوونۍ وایستل شول؛ د لنډمهاله خونديتوب د وضعیت لرونکي وه او له ۲۰۱۰ز. کال راپدېخوا یې په امریکا کې ژوند او کار کاوه.

د دغه وضعیت لغوه کېدا سلګونه زره هایټیایي کډوال له امریکا څخه د ایستل کېدا له ګواښ سره مخ کړي او داسې اندېښنې یې زیاتې کړې، چې هغوی به بېرته داسې هېواد ته ستانه شي، چې له سختو امنیتي او سیاسي کړکېچونو سره مخ دی.

د اسلامي امارت ویاند ذبیح‌الله مجاهد د یو شمېر ملکي او امنیتي چارواکو له تازه ګومارنو خبر ورکړی دی.

مجاهد په «ایکس» پاڼه کې لیکلي، چې د اسلامي امارت د رهبر د حکم پر بنسټ لاندې بدلونونه رامنځته شوي دي:

د کورنیو چارو وزارت پخوانی اداري مرستیال رحمت‌الله نجیب د بدخشان والي شوی دی.

د سرپل پخوانی والي احمدشاه دین‌دوست د بدخشان امنیه قومندان ټاکل شوی دی.

د ټولګټو چارو وزارت د سړکونو ساتنې او څارنې پخوانی مرستیال عبدالجبار معاون د کورنیو چارو وزارت اداري مرستیال ټاکل شوی دی.

د بدخشان پخوانی والي محمد اسماعیل غزنوي د ټولګټو چارو وزارت د سړکونو ساتنې او څارنې مرستیال شوی دی.

د لغمان پخوانی والي بختیار معاذ د سرپل والي ټاکل شوی دی.

د بدخشان پخوانی امنیه قومندان عبدالبصیر مظهري د کندهار د ټولګټو چارو رییس ټاکل شوی دی.

دغه بدلونونه په بدخشان، سرپل او کندهار ولایتونو کې د کورنیو چارو وزارت او د ټولګټو وزارت په یو شمېر ملکي او امنیتي بستونو کې رامنځته شوي دي.