Connect with us

نړۍ

د اسرائیلو په هوایي برید کې د غزې د یوه ښوونځي ۱۶ کسان وژل شوي

د غزې عامې روغتیا وزارت ویلي، چې د اسرائیل په بریدونو کې تر دې دمه له ۳۸ زره ډېر فلسطینیان وژل شوي. د روغتیا وزارت د جنګیالیو او ناجنګیالیو ترمنځ توپیر نه‌کوي؛ خو چارواکي وايي، چې اکثره وژل شوي کسان ملکي وګړي دي.

خپور شوی

د

د فلسطین د روغتیا وزارت ویلي؛ د شنبې پر ورځ د چنګاښ شپاړلسمه د غزې په مرکزي برخه کې د بې ځایه شویو فلسطیني کورنیو پر یوه ښوونځي د اسرائیلو په برید کې لږ تر لږه ۱۶ کسان وژل شوي؛ خو اسرائیلي پوځیانو ویلي، چې په دې برید کې وسلهوال وژل شوي دي.

د فلسطین د عامې روغتیا وزارت چاوراکو رویټرز ته ویلي؛ په دې برید کې د النصیرات ښوونځی ویشتل شوی، چې له ۵۰ ډېر کسان په کې ټپيان دي.

د اسرائیلو پوځ ویلي، له ښوونځی څخه وسلوالو د پوځیانو پر ضد د بریدونو د پلان او ترسره کولو لپاره د پټنځای په توګه کار اخیست او د ملکي وګړو د خطر کمولو لپاره یې بشپړ احتیاطي تدابیر نیولي دي. حماس دا رد کړې او وایي، چې په دې برید کې ښځې او ماشومان پر نښه شوي او هلته د دوی جنګیالي نه‌ول.

د غزې د ملکي بېړنیو خدماتو ویاند محمود بصال په یوه خبرپاڼه کې ویلي، چې ښايي د مړو شمېر زیات شي؛ ځکه، چې د ډېرو ټپیانو حالت د اندېښنې وړ ښودل شوی دی.

د نوموړي  څرګندونو له مخې؛ په غزې کې د ملکیانو لپاره، چې د سرپناه په لټه کې دي د خوندیتوب هیڅ ځای نشته.

النصیرات د غزې د تړانګې د کډوالو د اته تاریخي کمپونو څخه یو دی، چې د شنبې پر ورځ اسرائیلو بمبارډ کړ.

د ډاکټرانو د څرګندونو له مخې؛ له دې مخکې په همدې کمپ کې پر یوه کور هوايي برید لږ تر لږه ۱۰ کسان ووژل او ګڼ نور یې ټپیان کړل.

په یوه ورځنۍ تازه جګړه کې د وژل شویو کسانو په اړه د غزې روغتیا وزارت ویلي، چې په تېرو ۲۴ ساعتونو کې د اسرائیلي ځواکونو په بمبارډ کې لږ تر لږه ۲۹ فلسطینیان وژل شوي او ۱۰۰ نور ټپیان دي.

 

د حماس تر مشرۍ لاندې د غزې د حکومتي رسنیو دفتر ویلي؛ د شنبې پر ورځ په بېلابېلو هوایي بریدونو کې پېنځه سیمه‌ییز خبریالان هم شته، چې د اوکتوبر له اوومې راپدیخوا د وژل شویو خبریالانو شمېر ۱۵۸ ته لوړ شو.

د غزې عامې روغتیا وزارت ویلي، چې د اسرائیل په بریدونو کې تر دې دمه له ۳۸ زره ډېر فلسطینیان وژل شوي. د روغتیا وزارت د جنګیالیو او ناجنګیالیو ترمنځ توپیر نه‌کوي؛ خو چارواکي وايي، چې اکثره وژل شوي کسان ملکي وګړي دي.

اسرائیل په غزه کې ۳۲۳ پوځیان له لاسه ورکړي او وايي لږ تر لږه یو پر درېیمه برخه فلسطینیان یې جنګیالي دي.

اسراییلو د اکتوبر پر اوومه پر اسرائیلو د حماس پر مشرۍ د برید په ځواب کې، چې د اسرائیلو د څرګندونو له مخې په کې ۱۲۰۰ کسان ووژل شول او له ۲۵۰ ډېر یرغمل شول؛ د حماس د له منځه وړلو په هدف خپل برید پیل کړ.

پر رفح بریدونه:

روغتیايي چارواکو ویلي، اسرائیلي ځواکونو، چې د مصر پولې ته څېرمه د رفح ښار په جنوب کې یې خپل یرغل ډېر کړی؛ د شنبې پر ورځ د دوی پر موټر په یوه هوايي برید کې څلور فلسطینی پولیس وژل شوي او اته نور ټپیان دي.

د حماس د کورنیو چارو وزارت له‌خوا په یوه خپره شوې خبرپاڼه کې راغلي، چې په وژل شویو کې د تل السلطان په لویدیځه رفح سیمه کې د پولیسو د ځواکونو مشر فریس عبدالال هم شته.

د اسرائیلو پوځ ویلي، چې ځواکونو یې په رفح کې د “استخباراتي بنسټ عملیاتو” ته دوام ورکړی؛ د ځمکې لاندې څو ودانۍ یې ویجاړې کړي، وسلې او تجهیزات یې نیولي او څو فلسطینیان یې وژلي دي.

اسرائیلو دا هم ویلي، چې په رفح کې یې د عملیاتو هدف د حماس وسله‌والې ډلې وروستۍ وسله‌والو له منځه وړل دي.

د اسرائیلو پوځ ویاند ویلي، چې د غزې په مرکزي ښار دیر البلاح کې یې د حماس د راکټ یو مرکز له منځه وړې، چې د بشري مرستو لپاره ټاکل شوې سیمه کې یې دننه فعالیت کاوه.

 هغه ویلي، چې له دې برید وروسته یې ډاډ ترلاسه کړ، چې ملکي خلکو ته زیان ندی رسیدلی.

د حماس او اسلامي جهاد وسله‌والو ډلې ویلي، چې جنګياليو یې د غزې په څو سیمو کې پر اسرائیلي ځواکونو د ټانک ضد راکټونو او هاوان بمونو بریدونه کړي دي.

اړوند  خبرونه:

پر رفح د برید په صورت کې به پر اسرائیلو وسلوال ملاتړ ودرول شي – جو بایډن

 

اسرائیلو پر تېروتنه د حماس په بند کې خپل درې کسان ووژل

نړۍ

ټرمپ کانګرس ته د ایران پر ضد د پوځي عملیاتو د بیا پیل خبر ورکړ

د رویټرز د راپور له مخې؛ ترمپ په هغه لیک کې، چې د جولای پر لسمه یې ترتیب کړی، ویلي:« دا پوځي کړنه مې د امریکا د وګړو، ملي امنیت او د هېواد د بهرني سیاست د ګټو د ساتنې لپاره، د خپلو اساسي مسوولیتونو په چوکاټ کې رهبري کړې ده.»

Published

on

 

د امریکا ولسمشر ډونالډ ټرمپ کانګرس ته په یوه رسمي لیک کې خبر ورکړی، چې د جولای له اوومې راپدېخوا یې د ایران پر ضد پوځي عملیات بیا پیل کړي، چې د هغه د دولت د څرګندونو له مخې، دا کړنه د کانګرس له نوې اجازې پرته د ۶۰ ورځني پوځي عملیاتو نوی پړاو پیلوي.

د رویټرز د راپور له مخې؛ ترمپ په هغه لیک کې، چې د جولای پر لسمه یې ترتیب کړی، ویلي:« دا پوځي کړنه مې د امریکا د وګړو، ملي امنیت او د هېواد د بهرني سیاست د ګټو د ساتنې لپاره، د خپلو اساسي مسوولیتونو په چوکاټ کې رهبري کړې ده.»

ټرمپ په خپل لیک کې یادونه کړې، چې د اپریل پر اوومه یې د دوه اوونیو اوربند امر کړی و، چې وروسته وغځول شو او په همدې موده کې د ډیپلوماټیک حل لپاره هم هڅې روانې وې.

هغه همداراز د جون پر اووه لسمه له ایران سره د لاسلیک شوې هوکړې یادونه کړې او ادعا کوي؛ تهران د هرمز تنګي له لارې پر تېرېدونکو سوداګریزو بېړیو له بریدونو سره دغه هوکړه ماته کړې، چې له کبله یې د ایران پر ضد د پوځي عملیاتو د بیا پیل امر شوی دی.

ټرمپ د دوشنبې پر ورځ دا هم ویلي، چې امریکا په خلیج کې د ایراني بېړیو سمندري کلابندي بېرته پيل کړې او د هرمز تنګي د پرانیستې ساتلو لپاره به اقدام وکړي.

د امریکا د اساسي قانون له مخې، یوازې کانګرس د جګړې د اعلان واک لري؛ خو د دغه هېواد ولسمشرانو تل استدلال کړی، چې د ملي امنیت د ساتنې لپاره د کانګرس له اجازې پرته هم لنډمهالي پوځي عملیات پیلولی شي.

په همدې حال کې د جګړې د واکونو قانون ولسمشر اړ کوي، چې د پوځي عملیاتو له پیل څخه په ۴۸ ساعتونو کې کانګرس خبر کړي او که د کانګرس اجازه نه‌وي؛ عملیات باید له ۶۰ ورځو ډېر دوام ونه‌کړي.

ټرمپ استدلال کړی، چې د اوربند له اعلان سره لومړۍ ۶۰ ورځنۍ موده پای ته رسېدلې وه؛ خو یو شمېر ډیموکراټ او د جګړې مخالف جمهوري‌پال قانون جوړوونکي دا تفسیر ناسم بولي او اداره د قانون په ناسم تعبیر تورنوي.

دغه راز د امریکا استازو جرګې او سنا تېره میاشت یو پرېکړه‌لیک تصویب کړ، چې له ټرمپ څخه یې وغوښتل امریکايي ځواکونه له ایران سره له پوځي ښکېلتیا وباسي. دا اقدام د جګړې د دوام په اړه د اندېښنو د زیاتېدا نښه بلل کېږي.

ټرمپ د دغه پرېکړه‌لیک له تصویب وروسته خپل منتقدان تورن کړل، چې له خپلې رایې سره یې ایران ته «ډاډ» ورکړی او د هغه د ادارې ماموریت یې نور هم ستونزمن کړی دی.

Continue Reading

نړۍ

د ایراني الوتکې د کېناستو د مخنیوي لپاره مو د صنعا هوايي ډګر ځغاست‌لیکه پر نښه کړه – د یمن پوځ

صنعا د یمن پلازمېنه د ایران پلوه حوثیانو تر واک لاندې ده؛ خو د نړیوالې ټولنې له ملاتړ برخمن حکومت، چې د سعودي عربستان او د خلیج د نورو هېوادونو ملاتړ هم ورسره دی؛ له سویل د عدن له بندري ښار څخه اداره کېږي.

Published

on

د یمن حکومت دفاع وزارت ویلي، چې ځواکونو یې د صنعا نړیوال هوايي ډګر ځغاست‌لیکه پر نښه کړې، چې د ایران د الوتکې له کېناستو مخنیوی وشي.

صنعا د یمن پلازمېنه د ایران پلوه حوثیانو تر واک لاندې ده؛ خو د نړیوالې ټولنې له ملاتړ برخمن حکومت، چې د سعودي عربستان او د خلیج د نورو هېوادونو ملاتړ هم ورسره دی؛ له سویل د عدن له بندري ښار څخه اداره کېږي.

حوثیانو سعودي عربستان تورن کړی، چې د صنعا پر نړیوال هوايي ډګر یې هوايي بریدونه کړي او خبرداری یې ورکړی، چې دغو بریدونو ته به غبرګون وښيي.

د حوثیانو پوځي ویاند یحیی سریع دا بریدونه «څرګند تېری» وباله او څرګندوي، چې دې کړنې په یمن کې د اوږدې جګړې د کړکېچ د کمېدا پړاو پای ته رسولی دی.

هغه ټینګار کړی، چې سعودي عربستان باید د دې برید پایلو ته چمتو وي او دا کړنه به یې بې‌ځوابه پاتې نه‌شي.

سعودي عربستان تر اوسه د دغو تورونو په اړه څه غبرګون نه‌دی ښودلی.

یمن له څه باندې یوې لسیزې راپدېخوا له هغې وروسته، چې حوثیانو صنعا ونیوله او قانوني حکومت یې اړ کړ، چې خپل مرکز سویل ته ولېږدوي؛ په کورنۍ جګړه او د سیمه‌ییزو قدرتونو نیابتي سیالیو کې ښکېل دی.

د یمن حکومت د اطلاعاتو وزیر معمر بن مطهر الاریاني هم ادعا کړې، چې حوثیانو د سره صلیب نړیوالې کمیټې یوه الوتکه په صنعا هوايي ډګر کې درولې؛ پیلوټ او د هغه همکار یې نیولي دي.

د یمن حکومت دفاع وزیر له دې مخکې هم ویلي وه، چې له ایران او حوثیانو سره د هغو الوتکو د درولو لپاره ډیپلوماټیکې هڅې، چې د ده پر وینا د یمن هوايي حریم نقضوي؛ کومه پایله نه‌ده ورکړې. هغه خبرداری ورکړ؛ حکومتي ځواکونه به هرې هغې الوتکې ته، چې پر دښمنۍ د یمن هوايي حریم ته ننوځي «پر ټولو شته امکاناتو» ځواب ورکړي او ایران یې د دې وضعیت مسوول وباله.

Continue Reading

نړۍ

روسیې د ناټو پر تازه پرېکړو سختې نیوکې وکړې

د روسیې بهرنیو چارو وزارت ویاندې ماریا زاخارووا ویلي، چې د ناټو لومړیتوبونه اوس هم د اروپا پوځي کول، د دفاعي وړتیاوو لوړول، له روسیې سره د احتمالي پوځي مخامخېدو لپاره چمتووالی او له اوکراین څخه پرله‌پسې ملاتړ دی.

Published

on

 

روسیې په ترکیه کې د ناټو د مشرانو په غونډه کې د شویو تازه پرېکړو، د اوکراین لپاره د پوځي مرستو د زیاتوالي او د غړو هېوادونو د دفاعي وړتیاوو د پیاوړتیا له ژمنو سره سخت مخالفت کړی او خبرداری یې ورکړی، چې دا اقدامات ښایي د نړۍ امنیت ته «ناورین‌زېږوونکې» پایلې ولري.

د روسیې بهرنیو چارو وزارت ویاندې ماریا زاخارووا ویلي، چې د ناټو لومړیتوبونه اوس هم د اروپا پوځي کول، د دفاعي وړتیاوو لوړول، له روسیې سره د احتمالي پوځي مخامخېدو لپاره چمتووالی او له اوکراین څخه پرله‌پسې ملاتړ دی.

هغې زیاته کړې، که د ناټو مشرانو په خپلو پرېکړو کې ډېر دقت کړی وی؛ نو داسې اقدامات به یې نه وی کړي، چې د هغې پر وینا؛ نه یوازې د دغه ائتلاف، بلکې د ټولې نړۍ لپاره خطرناکې پایلې لرلی شي.

د ناټو مشرانو د خپلې دوه ورځنۍ غونډې په پای کې ژمنه وکړه، چې په ۲۰۲۶ز. کال کې به اوکراین ته د ۷۰ میلیارډ یورو پوځي مرستې برابرې کړي. هغوی همداراز د ناټو تړون د پېنځمې مادې له مخې د ګډې دفاع پر اصل یو ځل بیا ټینګار وکړ او د لږ تر لږه ۵۰ میلیارډ ډالرو پر ارزښت د وسلو له تړونونو یې خبر هم ورکړ.

زاخارووا همداراز د امریکا او ناټو د ځینو غړیو ترمنځ د اختلافونو یادونه وکړه او ادعا کوي، چې واشنګټن د خپلو متحدانو د ملاتړ له کچې خوښ نه‌دی.

دغه راز د ناټو سرمنشي مارک روټه رویټرز ته ویلي، چې د غړیو هېوادونو د مشرانو ترمنځ د نظر اختلافونه د دغه ائتلاف د ډیموکراټیک ماهیت او خوځښت نښه ده او روسیه باید دا د کمزورۍ نښه ونه‌ګڼي.

Continue Reading
Advertisement

Trending

Copyright © 2025 Ariana News. All rights reserved!


Warning: Undefined array key "slug" in /var/www/vhosts/ariananews.af/httpdocs/wp-includes/class-wp-theme-json.php on line 2117

Warning: Undefined array key "slug" in /var/www/vhosts/ariananews.af/httpdocs/wp-includes/class-wp-theme-json.php on line 2117

Warning: Undefined array key "slug" in /var/www/vhosts/ariananews.af/httpdocs/wp-includes/class-wp-theme-json.php on line 2117