د آزموینو عمومي ادارې د اسلامي امارت د یو شمېر لوړپوړو چارواکو په حضور کې د یوې غونډې پر مهال د ۱۴۰۵ل.ل کال د کانکور لس مخکښان وستایل.

د آزموینو عمومي ادارې رییس عبدالباقي حقاني په دې غونډه کې ویلي؛ دې ادارې تل هڅه کړې، چې د آزموینو بهیر روڼ ترسره شي او هر چاته خپل حق ورسېږي.

هغه ټینګار کړی، چې افغانستان هم عصري لوړو زده‌کړو او هم دیني زده کړو ته اړتیا لري.

دغه راز د ریاست‌الوزراء اداري مرستیال عبدالسلام حنفي ویلي، چې اسلامي امارت د پوهنې او لوړو زده‌کړو د ودې لپاره له خپلو ټولو امکاناتو ګټه اخیستې ده. هغه له محصلانو وغوښتل، چې د هېواد د آبادۍ لپاره ژمن پاتې شي.

د یادونې ده، چې د ۱۴۰۵ل.ل کال کانکور په آزموینه کې شاوخوا ۱۱۷ زره کسانو ګډون کړی و، چې له دې څه باندې ۷۴ زره یې د لوړو زده‌کړو بنسټونو ته بریالي شوي دي.

د هند حکومت د هند د کلتوري اړیکو شورا(آی‌سي‌سي‌آر) د ۲۰۲۶ ـ ۲۰۲۷ ښوونیز کال لپاره افغان ځوانانو ته زر آنلاین تحصیلي بورسونه ځانګړي کړي دي.

د دغو بورسونو پروګرام د e-VidyaBharati (e-VB) پروژې په چوکاټ کې د i-Learn پورتل له لارې وړاندې کېږي. ګډونوال کولی شي، چې په مدیریت، سوداګرۍ، کمپیوټر ساینس، هنرونو او نورو څانګو کې د هند په معتبرو پوهنتونونو کې آنلاین زده‌کړې وکړي.

د اعلان له مخې، غوښتونکي باید د افغانستان تابعیت ولري، عمر یې د ۱۸ او ۳۵ کلونو ترمنځ وي او خپل غوښتنلیکونه د ۱۴۰۵ل. کال د چنګاښ له څلیریشتمې څخه د وږي تر اوه‌یمې پورې د i-Learn پورتل له لارې ثبت کړي. د زده‌کړو اسناد، تذکره یا معتبر پاسپورټ او انځور هم د نوم‌لیکنې له شرطونو څخه دي.

د پروګرام د تنظیموونکو د څرګندونو له مخې، دغه بورسونه د زده‌کړو ټول لګښت، د نوم‌لیکنې فیس، د آزموینو لګښت او د فراغت سند لګښت په بشپړه توګه پر غاړه اخلي. محصلین به په آنلاین ډول درسي سرچینو، ښوونیزو ویډیوګانو او آزموینو ته هم لاسرسی ولري.

د دې پروګرام د تدریس ژبه انګلیسي ده او د غوښتونکو وروستی غوراوی به د اسنادو له ارزونې او په کابل کې د هند سفارت له لوري د هویت له تائید وروسته ترسره شي.