په کابل کې د روسیې سفیر د بهرنیو چارو وزارت له چارسمبالي امیرخان متقي سره په کتنه کې هغه ته بلنه ورکړه، چې د مسکو په راتلونکې غونډه کې ګډون وکړي.

په دې کتنه کې، چې د چارشنبې پر ورځ (د وږي اته‌ویشتمه) ترسره شوې؛ دیمیتري ژیرنوف ویلي؛ روسیه د افغانستان له اسلامي امارت سره خپلو اړیکو ته ډېر اهمیت ورکوي او له همدې کبله هڅه کوي، چې د سیمې او نړۍ په ګډون د روسیې پر کوربتوب په ټولو غونډو کې د دوی پلاوي ګډون وکړي.

د بهرنیو چارو وزارت چارسمبالي له دې بلنې څخه د مننې تر څنګ یادونه وکړه، چې اسلامي امارت د مسکو غونډه رغنده او ګټور نوښت ګڼي او د دې بهیر په غونډو کې یې فعاله ونډه اخیستې ده.

امیر خان متقي د مسکو راتلونکې غونډه د روسیې له لوړ پوړیو چارواکو او د سیمې د هېوادونو له استازو سره د علاقې وړ او دوه اړخیزو همکاریو په اړه د رغنده خبرو اترو لپاره یو ارزښتناک فرصت وباله.

دغه راز د بهرنیو چارو وزارت چارسمبالي اعلان کړی، چې د مسکو غونډه به په دوه اوونیو کې دننه جوړه شي.

دا په داسې حال کې ده، چې امیرخان متقي نن (پنجشنبه) د دې وزارت د اداري د تېر کال لاسته راوړنو د بیانولو په پروګرام کې ویلي؛ په دې غونډه کې به د اسلامي امارت یو لوړ پوړی پلاوی ګډون وکړي.

د افغانستان اسلامي امارت رهبر د هېواد شمالي ولایتونو ته د خپل سفر په لړ کې د تخار ولایت له سیمه‌ییزو چارواکو او علماوو سره وکتل.

په دې کتنه کې هغه ویلي، چې اوسنی نظام د قرآن او شریعت پر بنسټ ولاړ دی او قوانین مو د شریعت پر بنسټ جوړېږي.

د اسلامي امارت رهبر پر نړیوالو قوانینو نیوکه کړې او څرګندوي، چې دا قوانین د انساني غوښتنو پر بنسټ جوړ شوي دي.

هغه زياته کړې؛، د هېواد قوانين پخوا له اروپايي، امريکايي او بریټانوي سرچينو څخه تدوین شوي او اوس دغه قوانين د "کتاب الله، فقهې او حديث پر بنسټ تدوینیږي.

د افغانستان لپاره د ملګرو ملتونو ځانګړې استازې روزا اوتونبایوا او د ملګرو ملتونو د ښځو د چارو مشره به سبا د وږي پر ۲۸ / د سپټمبر ۱۸ د افغانستان د وضعیت په اړه امنیت شورا ته راپور وړاندې کړي.

په امنیت شورا کې به د افغانستان په اړه یو پرانیستې او توجیهي ناسته او له هغې وروسته به د افغانستان په اړه نظرونه وړاندې شي.

په افغانستان کې د ملګرو ملتونو د مرستندویه پلاوي (یوناما) ځانګړې استازې روزا اوتونبایوا او د ښځو لپاره د دې ټولنې اجرائیه رییسه سیما باهوس به د افغانستان پر وضعیت خپل راپور وړاندې کړي.

له دې غونډې مخکې د ملګرو ملتونو عمومي منشي د افغانستان په اړه خپل درې میاشتنی راپور خپور کړی دی. په دې راپور کې راغلي؛ د تېر کال د همدې مودې پر پرتله امنیتي پېښې زیاتې شوي، پر ښځو محدودیتونه ډېر شوي او تر ۲۴ میلیون ډېر کسان اوس هم بشري مرستو ته اړتیا لري.

د ملګرو ملتونو عمومي منشي دا هم ویلي، چې د اګست تر دېرشمې له افغانستان سره د اړتیا وړ ۲ اعشاریه ۹ میلیارډ ډالرو مرستو یوازې ۲۴ اعشاریه ۹ سلنه مرستې شوې دي.

د ښځو د حقونو یو شمېر فعالان له دې غونډې تمه لري، چې د ښځو بشري وضعیت به ښه شي.

اسلامي امارت تمه لري، چې د اوتنبایوا راپور به د افغانستان واقعیتونه منعکس کړي او د کوچنیو مسایلو له توجیه کولو به ډډه وکړي.