د اسلامي امارت رهبر شیخ هبةالله آخوندزاده ويلي؛ استخبارات مکلف دي، چې د اسلامي نظام د دښمنانو ټول پټ او ښکاره پلانونه له منځه یوسي.

شیخ هبة‌الله آخوندزاده د استخباراتي چارواکو لپاره په یوه ورځني سیمینار کې ویلي؛ د اسلامي نظام استخبارات مکلفیت لري ټول هغه پټ او ښکاره پلانونه شنډ کړي، چې د اسلامي نظام دښمنان یې پلانوي او غواړي د اسلامي رژیم پر وړاندې یې پلي کړي.

د اسلامي امارت رهبر استخباراتي ادارې د حکومت د ملا تیر ګڼلی او څرګندوي؛ هیچا ته باید اجازه ورنکړ شي، چې په ښکاره یا پټه دیني او اسلامي ارزښتونو سپکاوی وکړي.

د اسلامي امارت رهبر زیاته کړې؛ استخباراتي اداره باید هیچا ته اجازه ورنکړي، چې په ښکاره یا پټه دیني او اسلامي ارزښتونو ته سپکاوی وکړي او باید د شرعي قانون د پلي کولو او د خلکو د پوهاوي د لوړولو لپاره له نورو ادارو سره ګډ کار وکړي.

شیخ هبة‌الله آخوندزاده له استخباراتي ادارو وغوښتل، چې له خلکو سره ښه چلند وکړي؛ په شکمن ډول څوک ونه نیسي او له بندیانو سره له ظلم څخه ډډه وکړي او محرمیت وساتي.

په کابل کې د افغانستان، پاکستان او چین ترمنځ د سوداګریزو اړیکو د پیاوړتیا او پراختیا لپاره په جوړه شوې درې اړخیزه غونډه کې د دغو هېوادونو لوړ پوړو چارواکو د پانګونې د جلبولو او د ګډو پروژو د پیلولو لپاره د سټراټیژیو په اړه بحث وکړ.

دا غونډه د افغانستان د صنایعو او سوداګرۍ وزارت د چارسمبالي نورالدین عزیزي، د پاکستان ځانګړي استازي محمد صادق او د چین ځانګړي استازي یو شیاوینګ په شتون کې ترسره شوه.

په دې غونډه کې د افغانستان لپاره د ګډو صنعتي پارکونو جوړول، د ځانګړو اقتصادي زونونو جوړول او د ګډو صادراتي پروسس مرکزونو د پیل په څیر اړینو مسلو بحث او خبرې وشوې.

سربېره پردې د درې اړخیزو سوداګریزو نندارتونونو جوړول او په افغانستان کې د کوچنیو او منځنیو تشبثاتو لپاره د ملاتړ مرکزونو جوړول هم د بحث نورې موضوعګانې وې.

همدارنګه د درې هېوادونو ترمنځ د بانکي اړیکو آسانتیا د اقتصادي همکارۍ د پیاوړتیا لپاره  یوه بنسټیزه اړتیا وړاندې شوه.

د افغانستان د صنایعو او سوداګرۍ وزارت ویلي؛ دا غونډه د ګډون کوونکو هېوادونو د جدي هوډ ښکارندویي کوي، چې په سیمه کې سوداګریزې او اقتصادي همکارۍ پراخې کړي او هیله لري، چې د دې خبرو اترو مثبتې پایلې به ټولو خواوو ته ګټه ورسوي.