Connect with us

سوداگري

په بلخ ولایت کې د یوه صنعتي پارک د بنسټ ډبره کېښودل شوه

خپور شوی

د

(Last Updated On: ليندۍ ۶, ۱۴۰۲)

د یکشنبې پر ورځ (د لیندۍ ۵ نېټه) د بلخ د صنعتي پارک د بنسټ ډبره د دغه ولایت د دولتي چارواکو او خصوصي سکتور د استازیو په شتون کې کېښودل شوه.

د صنعت او سوداګرۍ وزارت له لوري په دې مناسبت جوړو شویو مراسمو کې د بلخ مرستیال والي نورالهادي ابو ادریس له خصوصي سکتور سره د اسلامي امارت پر ملاتړ د ټینګار ترڅنګ څرګنده کړه: د ستونزو د حل لپاره هڅې کیږي او دا ډول پروژې د هېواد د پرمختګ لپاره پلي کیږي.

د سوداګرۍ او صنایعو وزارت د صنعتي پارکونو عمومي رییس سید محمد نعیم محمدي د دغه پارک د ځمکې د سپارلو او د دغه پارک د جوړېدو د پیل له کبله له مسوولینو د مننې ترڅنګ له سوداګرو او پانګوالو وغوښتل، چې په دغه پارک کې پانګونه وکړي.

د افغانستان د سوداګرۍ او صنایعو وزارت ويلي، په بلخ ولایت کې د صنعتي پارک د جوړولو لپاره د دغه وزارت له‌خوا څه باندې څلور زره جریبه ځمکه ځانګړې شوې او په لومړي پړاو کې به د دغه وزارت له‌خوا په ۲۴۴ جریبه ځمکه کې یو صنعتي پارک جوړ شي. د دغه صنعتي پارک د بنسټ ډبره د ۲۰ میلیون افغانیو پر لګښت د ۳ اعشاریه ۶ کیلومتره استنادي دیوالونو او ۱۰ کیلومتره سړک د جوړولو لپاره کېښودل شوه، چې چارې به یې په راتلونکیو شپږ میاشتو کې بشپړې شي.

دغه راز د صنعت او سوداګرۍ وزارت چارسمبالي نورالدین عزیزي په هلمند ولایت کې دوه صنعتي ښارګوټي پرانستي دي.

د صنعت او سوداګرۍ وزارت مطبوعاتي دفتر د یوې خبرپاڼې پر خپرولو څرګنده کړې، چې نورالدین عزیزي د دغو ښارګوټو د پرانیستلو په مراسمو کې د افغانستان پر صنعتي کېدو ټینګار وکړ.

په هلمند ولایت کې پر ۱۷۵ جریبه ځمکه د بست صنعتي ښارګوټي او پر دوه زره جریبه ځمکه ملي صنعتي ښارګوټي جوړیږي.

د صنایعو او سوداګرۍ وزارت چارسمبالي زیاته کړې: په هېواد کې د صنعتي ښارګوټو پرانیستل، د افغانستان له وارداتي اقتصاد څخه پر صادراتي انحصاري اقتصاد بدلول د اسلامي امارت د اقتصادي سیاست له لومړیتوبونو څخه دي.

دا په داسې حال کې ده، چې له دې مخکې د صنعت او سوداګرۍ وزارت چارسمبالي کندهار ولایت ته سفر کړی او هلته یې له تولیدي فابریکو لیدنه کړې ده.

 

سوداگري

یوه شرکت د جګدلک د یاقوت پر کان‌کېندنه ۲۷ اعشاریه ۵ میلیون ډالر پانګونه کوي

Published

on

(Last Updated On: کب ۴, ۱۴۰۲)

د کانونو او پټرولیم وزارت څرګنده کړې، چې آریانا هایلنډ شرکت به د کابل ولایت د جګدلک پر یاقوت کان ۲۷ اعشاریه ۵ میلیون ډالره پانګونه وکړي.

د دغه وزارت د جمعې دورځې په خبرپاڼه کې راغلي؛ د یاد کان د بلې داوطلبۍ غونډه د آریانا هایلنډ او میرزا سلطاني شرکتونو په ګډون جوړه شوه، چې په پایله کې آریانا هایلنډ شرکت د افغانستان اسلامي امارت ته د ۴۴ سلنې ونډې پر منلو داوطلبي وګټله.

د خبرپاڼې د څرګندونو له مخې، دغه راز د آریانا هایلنډ شرکت په ټولنیزو خدماتو کې هم پېنځه میلیون امریکایي ډالرو لګوي.

د يادونې ده، چې د جګدلک یاقوت کان د کابل ولایت د سل کيلومټرۍ سروبي ولسوالۍ په سویل لویديځ کې موقعيت لري او مساحت يې هم ۹ اعشاریه ۶ کيلومټره مربع دى.

Continue Reading

سوداگري

د افغان – ټرانس پروژې د تخنیکي – اقتصادي څېړنو د پیل هوکړه لیک لاسلیک شو

Published

on

(Last Updated On: کب ۱, ۱۴۰۲)

د افغانستان اوسپنېپټلۍ ادارې د افغان – ټرانس اوسپنې‌پټلۍ پروژې د تخنیکي – اقتصادي څېړنو د پیل هوکړه لیک لاسلیک کړ.

یادې ادارې څرګنده کړې؛ ازبکستان ته د دې ادارې چارسمبالي بخت‌الرحمن شرافت او ورسره مل پلاوي په خپل سفر کې د افغانستان، ازبکستان او عربي متحده اماراتو د چارواکو تر منځ د افغان – ټرانس اوسپنې‌پټلۍ پروژې د تخنيکي او اقتصادي مطالعاتو د پيل اړین هوکړه ليک لاسليک کړ.

دغه هوکړه ليک د افغانستان استازي بخت‌الرحمن شرافت، د ازبکستان استازي او د هغه هېواد د ټرانسپورټ وزير ميرزا مئين اوغلي او د عربي متحده اماراتو استازي او د (ADL Ulanish) شرکت مشر الانش لاسليک کړ.

دغه شرکت د افغان – ټرانس اوسپنېېپټلۍ تخنیکي، ټولنیزې او اقتصادي څېړنې په‌خپل مالي لګښت تر سره کړي، چې وروسته به د دغو څېړنو پایلې د افغانستان، ازبکستان او پاکستان له مالي بنسټونو، هېوادونو او سوداګرو سره د پانګونې د جلبولو لپاره شریکې شي.

په دې مراسمو کې همدا راز پرېکړه وشوه، چې د افغانستان، ازبکستان او عربي متحده اماراتو پلاوى به د چارشنبې پر ورځ (د کب دوه‌يمه) په تاشکند کې له قطري او پاکستاني چارواکو سره د دې پروژې په اړه انلاين غونډه تر سره کړي.

د افغان ـ ټرانس اوسپنې‌پټلۍ پروژه د افغانستان له خاورې تېریږي؛ منځنۍ او جنوبي اسیا نښلوي( دا پروژه له مزارشریف څخه پیلېږي او ۶۴۷ کیلومټره د سمنګان، بغلان، بامیان، میدان وردګ، لوګر او پکتیا ولایت د ډنډ پټان ولسوالۍ له لارې له پاکستان سره نښلیږي).

دا پروژه له ډېرو کلونو راپدیخوا تر بحث لاندې وه؛ د اسلامي امارت له بیا واکمنېدو وروسته یې لومړنۍ سروې د افغانستان، ازبکستان او پاکستان د اوسپنې‌پټلۍ د تخنیکي ډلو له لوري بریالۍ ترسره او د غځېدا لار یې د اسلامي امارت کابینې پر یو کلن عملي پلان تصویب شوه، چې د پلي کېدا لپاره یې د افغانستان اوسپنې‌پټلۍ ادارې او اسلامي امارت ژمنتیا پوره روښانه ده.

د افغانستان اوسپنې‌پټلۍ اداره یو ځل بیا له هېوادونو، مالي بنسټونو او سوداګرو څخه وغوښتل، چې د افغانستان د اوسپنې‌پټلۍ په پروژو کې پانګونه وکړي او دا اداره خپله دنده ګڼي، چې پانګوالو ته د پانګونې لپاره لازمې اسانتیاوې برابرې کړي.

Continue Reading

سوداگري

د کانونو او پټرولیم وزارت چارسمبالي له روسي پانګوال سره وکتل

Published

on

(Last Updated On: سلواغه ۳۰, ۱۴۰۲)

د کانونو او پټرولیم وزارت چارسمبالي شهابالدین دلاور د یکشنبې پر ورځ (د سلواغې نهه‌ویشتمه) له روسي پانګوال سره وکتل.

د کانونو او پټرولیم وزارت د خبرپاڼې له مخې؛ په دې کتنه کې د روسیې پانګوال د خپل شرکت د کاري تجربې او فعالیتونو په اړه د معلوماتو د وړاندې کولو ترڅنګ ویلي: زمونږ شرکت په ایران، عراق، سوریه او تاجکستان کې د ۱۲۰ کلونو کاري تجربو او پرمختللیو او عصري وسایلو پر درلودلو په افغانستان کې همکارۍ او کار پیلولو ته چمتو دی.

د کانونو او پترولیم وزارت ویاند همایون افغان ویلي؛ په افغانستان کې د المان او روسيې دوه سترې کمپنۍ غواړي، چې د تېلو د پروسس او د انرژۍ د تولید په برخه کې پانګونه وکړې.

په دې کتنه کې نوموړي له کثافاتو څخه د ۱۵۰ میګاواټه برښنا د تولید په اړه هم خبرې وکړې او څرګندوي؛ زمونږ شرکت چمتو دی، چې د کثافاتو د ستونزې د حل او له هغو څخه د برښنا په تولید کې همکاري وکړي.

دغه روسي شرکت د تېلو او ګاز په سکتور کې د خپلو اسانتیاوو او تجهیزاتو او له ګاز څخه د برښنا د تولید په اړه هم معلومات وړاندې او په اړوند سکتور کې یې د پانګونې په اړه د ملاتړ غوښتنه.

د دغه وزارت په خبرپاڼه کې راغلي، چې؛ د دغه وزارت چارسمبالي د هېواد د تېلو او ګاز په سکتورونو او له کثافاتو څخه د برښنا د تولید په برخه کې د دوی طرحې او نظریات وستایل او په‌دې اړه وایي؛ افغانستان له امنیت څخه برخمن دی او د بهرنیو سوداګرو د پانګونې لپاره مناسب چاپېریال برابر شوی دی.

ویل کیږي، چې په دې کتنه کې شهاب الدین دلاور سوداګرو ته د پانګونې ډاډ ورکړ او څرګندوي؛ بهرني او کورني پانګوال کولی شي له کومې اندېښنې پرته د افغانستان په بېلابېلو برخو کې پانګونه وکړي.

Continue Reading

Trending

Copyright © 2022 Ariana News. All rights reserved!