د اسلامي امارت ویاند ذبیح‌الله مجاهد په بدخشان ولایت کې د امنیتي ځواکونو او وسله‌والو مخالفانو ترمنځ د وروستیو نښتو په اړه ویلي، چې ځینې استخباراتي کړۍ دغه پېښې له خپلې اړوند کچې لویوي. په داسې حال کې، چې ورته امنیتي پېښې د نړۍ په ډېرو هېوادونو کې رامنځته کېږي.

مجاهد، چې د حکومت د رسنیو په مرکز کې د« حکومت د رسنیو په هېنداره کې» پروګرام د پرانیستې مراسمو ته د وینا پر مهال زیاته کړې؛ دغه پېښې د اندېښنې وړ نه‌دي، ځکه امنیتي ځواکونه د هر ډول پوځي خوځښت د ځپلو لپاره قوي هوډ لري او خلک هم د نظام د ساتنې لپاره هر ډول قربانۍ ته چمتو دي.

د حکومت د رسنیو مرکز دغه پروګرام د اسلامي امارت د یو شمېر چارواکو په ګډون پیل کړی دی.

د مسوولانو د څرګندونو له مخې؛ د دې پروګرام موخه د همغږۍ پیاوړتیا، د دولتي فعالیتونو انعکاس او د بېلابېلو ادارو د رسنیز پوښښ ارزونه ده.

په همدې حال کې د اطلاعاتو او کلتور وزیر شېر احمد حقاني ټینګار کړی؛ رسنۍ او حکومت باید په ګډه کار وکړي، چې واقعیتونه خلکو ته سم او کره ورسېږي.

هغه د بدخشان د نښتو په اړه هم ویلي، چې د دغو پېښو په تړاو د خپرېدونکو مطالبو ډېره برخه اوازې دي او له واقعیتونو سره سمون نه‌لري.

دغه راز یو شمېر چارواکو د اسلامي امارت د لاسته راوړنو په ځلولو کې د رسنیو پر رول ټینګار وکړ او څرګندوي، چې په اوسني عصر کې رسنۍ د حکومت او خلکو ترمنځ د اړیکو تر ټولو مهمه وسیله ده او اسلامي امارت د رسنیو ملاتړ ته ژمن دی.

دا څرګندونې په داسې وخت کې کېږي، چې رسنۍ او خبریالان د حکومتي مسوولانو له لوري معلوماتو ته پر بشپړ او پر وخت لاسرسي ټینګار کوي.

 د افغانستان د اماني ځانګړي صندوق (STFA) غړي انورالحق احدي ویلي، چې په سویس کې د افغانستان د ساتل شویو ملي شتمنیو ارزښت د پانګونې له عوایدو وروسته ۴.۲ میلیارډ ډالرو ته رسېدلی دی.

انوارالحق احدي د ۲۰۲۶ز. کال د زمري پر څلورمه / د جولای پر شپږویشتمه د افغان پوهانو او څانګوالو(متخصصانو) ټولنې د اویایمې انلاین غونډې پر مهال ویلي، چې یاد صندوق شاوخوا ۷۰۰ میلیون ډالره عاید ترلاسه کړي او تر اوسه ترې هیڅ ډول ګټه اخیستل شوې نه‌ده.

نوموړي زیاته کړې، دا شتمني به تر هغې خوندي وساتل شي، چې شرایط برابر او د افغانستان بانک ته ولېږدول شي.

دا غونډه د« د افغانستان اقتصادي او سیاسي وضعیت؛ واقعیتونه او راتلونکی لید» تر سرلیک لاندې جوړه شوې وه.

احدي ټینګار کړی، چې د صندوق له جوړېدا راپدېخوا له دغو شتمنیو څخه هیڅ لګښت نه‌دی شوی او دا پیسې د افغانانو د ګټې لپاره خوندي ساتل کېږي.

هغه په امریکا کې د کنګل شویو ۳.۵ میلیارډ ډالرو افغان شتمنیو په اړه ویلي، چې تر اوسه دوه امریکایي محکمو د افغانستان پر ګټه پرېکړې کړې دي.

د نوموړي د څرګندونو له مخې، تمه ده درېیمه او وروستۍ محکمه هم د دغو شتمنیو د آزادېدا حکم وکړي، چې د افغانانو ملي شتمنۍ خوندي پاتې شي.

په سویس کې جوړ دغه اماني صندوق د افغانستان د بهرنیو ملي شتمنیو د یوې برخې د ساتنې لپاره رامنځته شوی دی. په داسې حال کې، چې په امریکا کې د پاتې نیمو کنګل شویو زېرمو د حقوقي وضعیت د حل لپاره هم هڅې روانې دي.