د افغانستان او روسیې ډیپلوماټیکو چارواکو د دوه اړخیزو همکاریو د پراختیا او د افغانستان په ګډون د سیمه‌ییزو تعاملاتو د پیاوړتیا په اړه خبرې کړې دي.

د روسیې بهرنیو چارو وزارت د خبرپاڼې له مخې، دا غونډه د روسیې د بهرنیو چارو وزارت د آسیا د دوه‌یمې ادارې د رییس الکسي پاولفسکي او د افغانستان د بهرنیو چارو وزارت د درېیم سیاسي ریاست د رییس عبدالحی قانت ترمنځ ترسره شوې ده.

دواړو لوریو د سیاسي، اقتصادي، فرهنګي او بشري همکاریو په اړه د نظرونو تبادله کړې او د افغانستان په ګډون یې د سیمه‌ییزو تعاملاتو پر پیاوړتیا ټینګار کړی دی.

دا خبرې داسې مهال ترسره کېږي، چې افغانستان او روسیه د ډیپلوماټیکو اړیکو د پراختیا او په بېلابېلو برخو کې د همکاریو د زیاتولو هڅې روانې ساتلې دي.

په ۲۰۲۶ فوټبال نړیوال جام کې د سرو کارتونو شمېر بې‌ساری زیات شو؛ ځکه د دې پړاو لوبڅاران قوانین کلک پلي کوي.

د سیالیو له ۲۷ لوبو وروسته لوبڅارانو ۱۲ مستقیم سره کارتونه ورکړي، چې دا شمېر د قطر ۲۰۲۲ او روسیه ۲۰۱۸ د نړیوالو جامونو د ټولو سرو کارتونو له مجموعې هم زیات دی. په دغو دواړو نړیوالو جامونو کې ټولټال اته سره کارتونه ورکړ شوي وه.

په سیالیو کې د لوبغاړو د شړلو شمېر د آلمان ۲۰۰۶ نړیوال جام د ۲۸ سرو کارتونو ریکارډ ته نږدې کېږي.

د فیفا پخواني لوبڅار او د «فاکس سپورټ» د قوانینو شنونکي مارک کلاټنبرګ ویلي؛ د سرو کارتونو د زیاتوالي لامل د لوبغاړو هغه ناسمې پرېکړې دي، چې د جزا ساحې دننه او شاوخوا یې د فشار پر مهال ترسره کوي.

هغه زیاته کړې:« د لوبغاړو چلند کومه ځانګړې ستونزه نه‌لري؛ خو تر فشار لاندې ناسمې پرېکړې کوي. له بلې‌خوا، د لوبډلو په نوملړ کې د ۲۶ لوبغاړو له شاملېدا سره ځینې مدافعان آسانه تاکتیکي خطاوې کوي؛ ځکه پوهېږي، چې پر څوکیو ناست نور بدیلونه هم لري.»

په دې نړیوال جام کې یو شمېر سرو کارتونو د لوبو پر پایلو هم مستقیم اغېز کړی دی. د امریکا د ملي لوبډلې بریدګر فولارین بالوګون د بوسنیا او هرزګوینا پر وړاندې هم ګول وواهه او هم له لوبې وشړل شو. دا پېښه د ۲۰۰۶ نړیوال جام تر پایلوبې، چې زین‌الدین زیدان په کې شړل شوی و؛ د لومړي ځل لپاره په حذفي پړاو کې تکرار شوې ده.

د پاراګوای میګل آلمیرون، د اکواډور پیرو اینکاپیه او د یوروګوای اګوسټین کانوبیو هم هغه لوبغاړي وه، چې د ویډیويي مرستیال لوبڅار (VAR) له ارزونې وروسته یا د ناسپورټي چلند له کبله سره کارتونه ورکړ شول.

د سویلي افریقا او مکسیکو د پرانیستونکې لوبې پر مهال هم درې لوبغاړي وشړل شول. د سویلي افریقا هافبک تمبا زوانه، چې فیفا یې حرکت تاوتریخجن وباله؛ د سور کارت ترڅنګ د درېیو لوبو بندیز هم ترلاسه کړ.

د عراق مدافع ربین سولاکا هم د سینیګال پر وړاندې د ګول د یوه څرګند فرصت د مخنیوي له کبله د نړیوال جام د تاریخ له چټکو سره کارتونو څخه یو ترلاسه کړ. همدارنګه د بلجیم مدافع ناټان انګوي د ایران پر بریدګر مهدي طارمي د خطرناک ټکر له کبله له لوبې وشړل شو.

د سرو کارتونو زیاتوالي د سیالیو پر بهیر څرګند اغېز کړی او ګڼې لوبډلې یې اړ کړي، چې د لوبې یوه برخه پر یوه لوبغاړي ترسره کړي؛ داسې څه، چې د څو لوبو پر پایلو یې هم مستقیم اغېز کړی دی.

په وروستیو نړیوالو جامونو کې د سرو کارتونو شمېر:

۲۰۲۶: ۱۲ سره کارتونه (ټول مستقیم)

۲۰۲۲: ۴ سره کارتونه (یو مستقیم)

۲۰۱۸: ۴ سره کارتونه (دوه مستقیم)

۲۰۱۴: ۱۰ سره کارتونه (اووه مستقیم)

۲۰۱۰: ۱۷ سره کارتونه (۹ مستقیم)

۲۰۰۶: ۲۸ سره کارتونه (۹ مستقیم)

د ریاست‌الوزرا اقتصادي مرستیال ملا عبدالغني برادر پر مشرۍ یو لوړپوړی افغان پلاوی ایران ته ولاړ، چې د ایران د پخواني مذهبي رهبر آیت‌الله علي خامنه‌يي د جنازې په مراسمو کې ګډون وکړي.

د سرچینو د څرګندونو له مخې، په دې پلاوي کې د بهرنیو چارو وزیر امیرخان متقي، د بهرنیو چارو وزارت دوه‌یم سیاسي ریاست رییس ذاکر جلالي، د ملا برادر د دفتر رییس عبدالله عزام او د ریاست‌الوزراء د اقتصادي مرستیالۍ د اقتصادي برخې رییس حاجي حکمت شامل دي.

دغه سفر داسې مهال ترسره کېږي، چې ایران د اسلامي جمهوریت په تاریخ کې د تر ټولو سترې دولتي جنازې د ترسره کولو جمتووالی نیسي. دا شپږ ورځني مراسم د ایران او عراق په څو ښارونو کې ترسره کېږي.

د راپورونو له مخې د فبرورۍ پر اته‌ویشتمه د ایران او اسرائیل د شخړې پر مهال د امریکا او اسرائیل په بریدونو کې خامنه‌يي وژل شوی؛ خو د جنازې مراسم یې ځنډیني ترسره کېږي.

د مراسمو پیل به د تهران په مصلی عبادت‌ځای کې وشي او وروسته به د پلازمېنې له لارې د جنازې لوی لاریون ترسره شي. دغه مراسم به بیا د قم ښار ته وغځېږي او ورپسې به د عراق په نجف او کربلا کې هم ترسره شي. خامنه‌يي به د جولای پر نهمه د مشهد په پلرنۍ ادیره کې خاورو ته وسپارل شي.

ایراني چارواکي اټکل کوي، چې په دغو مراسمو کې به میلیونونه کسان ګډون وکړي او یوازې په تهران کې د شاوخوا ۲۰ میلیون کسانو اټکل شوی دی. د پراخو امنیتي او لوژسټیکي تدابیرو ترڅنګ، د سپاه پاسداران او نورو امنیتي ځواکونو له لوري د خلکو د کنټرول چارې پر مخ وړل کېږي.

تمه ده، چې د پاکستان په ګډونه څو نور بهرني پلاوي هم په دې مراسمو کې ګډون وکړي؛ خو د نورو سیمه‌ییزو او نړیوالو مشرانو د ګډون جزئیات تر دې دمه تائید شوي نه‌دي.

د افغان پلاوي دا سفر د کابل او تهران ترمنځ د روانو ډیپلوماټیکو اړیکو ښه نښه ګڼل کېږي، چې په وروستیو کلونو کې یې د سیاسي، اقتصادي او سیمه‌ییزو موضوعاتو په اړه نږدې تماسونه ساتلي دي.