تېره شپه یوې نسبتاً قوي زلزلې د افغانستان د شمالي سیمو ځینې برخې؛ په ځانګړي توګه سمنګان او بلخ ولایتونه ولړزول او درانده ځاني او مالي زیانونه یې واړول.

د لومړنیو معلوماتو له مخې؛ په سمنګان ولایت کې له ۲۰ څخه ډېر کسان شهیدان او له ۲۰۰ څخه ډېر نور ټپیان شول.

دغه راز د بلخ ولایت سرچینې وايي، چې د دې پېښې له کبله اته کسان شهیدان شوي او له ۱۱۰ څخه ډېر نور ټپیان دي.

د دې زلزلې مرکز د سمنګان ولایت په خلم ولسوالۍ کې ثبت شوی دی.

سیمه ییز چارواکي تائیدوي، چې تر اوسه پورې په دې سیمه کې له ۷۰ څخه ډېر کورونه ویجاړ شوي دي.

د جي‌اف‌زید زلزلې پېژندنې مرکز د څرګندونو له مخې؛ زلزله د رښتر پر کچه ۶.۳ درجې وه او د هندوکش غرونو ختیځ ته د ۱۰ کیلومټره په ژوروالي کې رامنځته شوې ده.

سیمه ییز چارواکي خبرداری ورکوي، چې په لرې پرتو سیمو کې د ځاني زیانونو د زیاتوالي شونتیا ډېره ده.

د عامې روغتیا وزارت ویاند شرافت زمان امرخیل ويلي: د تېرې شپې په زلزله کې، چې سمنګان او بلخ ولایتونه یې ولړزول؛ لږ تر لږه ۲۰ کسان مړه شوي او ۳۲۰ نور ټپیان دي.

د هغه په ​​وینا، طبي ټیمونه د پېښې ځای ته رسېدلي او د عامې روغتیا وزارت ټولو نږدې روغتونونو ته امر شوی، چې په بشپړ ډول چمتو وي او د ټپیانو درملنه وکړي.

ژغورونکي ځواکونه او طبي کارکوونکي زمونږ د خلکو د ژوند ژغورلو لپاره کار کوي.