د هرات والي نور احمد اسلام جار په افغانستان کې د ټاپي پروژې له مشر بګنج عبدالله یوف او په هرات کې د ترکمنستان قونسل جنرال سره ولیدل او د دې پروژې پر پرمختګونو یې خبرې وکړې.

د هرات والي د ټاپي پروژې د پلي کولو له بهیر څخه د رضایت څرګندولو پرمهال له ترسره شویو هڅو ستاینه وکړه او څرګندوي، چې د دواړو هېوادونو پر همکارۍ پروژه هره ورځ ښه کیږي او د هغې د بشپړېدا هیله ورځ پر ورځ زیاتیږي.

په افغانستان کې د ټاپي پروژې مشر راپور ورکړی، چې تر اوسه پورې د پروژې ۹۱ کیلومټره لار د پایپ لاین ایښودلو لپاره چمتو شوې او د لارې په اوږدو کې یو شمېر کاري کمپونه جوړ شوي دي.

په هرات کې د ترکمنستان قونسل جنرال باتور یولوف هم د ټاپي پروژې د پرمختګ په برخه کې د اسلامي امارت له همکارۍ ستاینه وکړه او وایي، چې د جوړو شویو پلانونو پر بنسټ به د روان کال تر پایه پورې په هرات ولایت کې د پروژې کار بشپړ شي.

په پاکستان کې د قزاقستان سفیر یرژان کستافین په سیمه‌ییزه همکارۍ او پرمختګ کې د افغانستان د اړین رول لوبولو د وړتیا په اړه ډاډ څرګند کړی دی.

له سما ټلویزیون سره په یوه وروستۍ مرکه کې هغه ټینګار کړی، چې د افغانستان ثبات د سیمې لپاره خورا اړین او مهم دی.

کستافین د شته ستونزو د حل لپاره پر ګډو امنیتي هڅو د ټینګار تر څنګ وویل: ” امنیت د ملا تیر دی. پرته له امنیت څخه نشوو کولی پرمختګ وکړو”.

دې ډیپلوماټ له ګاونډ هېوادونو سره پلان شوې اوسپنې‌پټلۍ ته ورته نوښتونه هم د بېلګې په توګه یاد کړل، چې څنګه سیمه‌ییزې اړیکې پیاوړې کېدی شي.

هغه په سیمه‌ییزو پروژو کې د ګډون لپاره د افغانستان لېوالتیا وستایله او څرګندوي؛ “په راتلونکو ۵ کلونو کې به مونږ د سیمه‌ییزې همکارۍ یو بشپړ بل حالت ولرو.”

په پاکستان کې د قزاقستان سفیر ټینګار کړی، چې سیمه‌ییز پرمختګ او امنیت سره تړلي دي او د پاکستان، افغانستان، قزاقستان او ګاونډ هېوادونو ترمنځ همغږې هڅې د سیمې د دوامداره سولې او سوکالۍ لپاره اړینې دي.

د ملګرو ملتونو ټولنې د عمومي منشي د سولې او سیاسي چارو مرستیالې روزمري ډیکارلو کابل ته د خپل سفر پر مهال په افغانستان کې د نجونو او ښځو پر زده‌کړو او کار د لګېدلو بندیزونو د سمدستي لغوه کېدا غوښتنه کړې ده.

د ملګرو ملتونو د خبرپاڼې له مخې؛ دیکارلو د خپلو لیدنو پر مهال اسلامي امارت هڅولی، چې د دوحې په بهیر کې بشپړ ګډون وکړي او هغه نړیوالې ژمنې پوره کړي، چې د افغانستان د بیا ادغام لپاره نړیواله ټولنه ورته اړتیا لري.

دواړو لوریو هوکړه کړې، چې خبرې او تعامل به روان ساتي.

د ملګرو ملتونو دې چارواکې د سرحدونو له لارې د بشري مرستو د بې‌خنډه لېږد پر اړتیا هم ټینګار کړی او له افغان چارواکو یې غوښتي، چې د اړتیا لرونکو کسانو ته د مرستو د رسولو د آسانتیا لپاره همکاري وکړي.

همدارنګه نوموړې له افغان ښځو او د مدني ټولنې له استازو سره هم لیدلي او په هېواد کې یې د ښځو او نجونو د وضعیت په اړه د ملګرو ملتونو اندېښنه ښکاره کړې ده.