د افغانستان په چارو کې د روسیې د ولسمشر ځانګړي استازي ضمیر کابلوف ویلي، چې مسکو تمه لري د افغانستان لپاره د ملګرو ملتونو د مرستندویه پلاوي(یوناما) ماموریت له ځانګړو شرطونو سره وغځول شي.

کابلوف له یوې روسۍ ورځپاڼې «ایزوستیا» سره په مرکه کې ویلي، چې د یوناما د فعالیتونو د اغېزمنتیا په اړه ځینې پوښتنې موجودې دي.

هغه ویلي: «هو! البته ماموریت به وغځول شي، خو له ځانګړو شرطونو سره؛ ځکه د دې ماموریت د فعالیتونو په اړه پوښتنې شته. مونږ هیله لرو، چې دا ټولې برخې په پام کې ونیول شي.»

د ملګرو ملتونو امنیت شورا د روان کال په مارچ میاشت کې د یوناما ماموریت د یو کال پر ځای د درې میاشتو لپاره وغځاوه. دغه اقدام وروسته له هغې وشو، چې واشنګټن د اسلامي امارت تر واک لاندې افغانستان ته د مرستو د بیا ارزونې غوښتنه وکړه.

د یوناما د راتلونکي په اړه بحثونه داسې مهال وړاندې کېږي، چې افغانستان اوس هم له بشري ناورین سره مخ دی.

د ملګرو ملتونو د څرګندونو له مخې، میلیونونه افغانان د خوړو له کمښت، بې‌کارۍ او روغتیايي خدمتونو او لومړنیو آسانتیاوو ته د لاسرسي له کمېدا کړېږي.

روسیې له اسلامي امارت سره د خپلو اړیکو پراخېدا ته پام رااړولی دی او د سیمې د نورې بې‌ثباتۍ او امنیتي ګواښونو د مخنیوي لپاره یې له افغانستان سره د نړیوال تعامل له روان ساتلو ملاتړ کړی دی.

مسکو ټینګار کوي، چې د افغانستان له اوسنیو چارواکو سره د اړیکو ساتل د بشري ننګونو د حل او د داعش په څېر ډلو پر ضد مبارزې لپاره اړین دي؛ هغه ډله، چې روسیه یې د سیمې لپاره ستر امنیتي ګواښ ګڼي.

دغه راز د افغانستان لپاره د روسیې ځانګړي استازي ویلي، چې مسکو افغانستان ته د بشري مرستو د وړاندې کولو اجازه ترلاسه کړې او که کابل رسمي غوښتنه وکړي؛ دغه مرستې به برابرې شي.

روسیې د روان کال په اپریل میاشت کې افغانستان ته نږدې ۴۰۰۰ ټنه د غنمو اوړه هم لېږلي دي.

په مسکو کې د افغانستان اسلامي امارت د سفارت فرهنګي اتشې فضل‌الهادي حمزه د بهرنیو ډیپلوماټانو د هنري او خلاقه آثارو په « د نړۍ رنګونه» نومي نندارتون کې ګډون وکړ.

دغه نندارتون د روسیې بهرنیو چارو وزارت له لوري د ترتیاکوف ګالرۍ په ودانۍ کې جوړ شوی او د روسیې د بهرنیو چارو وزارت د دولتي پروتوکول د څانګې او د دغه هېواد د فرهنګ وزارت  پر ملاتړ او همکارۍ پرانیستل شوی دی.

یاد نندارتون د دوه‌یم پرله‌پسې کال لپاره د «انټر‌موزیم» نړیوال فسټیوال په چوکاټ کې جوړېږي او د درې ورځو لپاره به د لیدونکو پر مخ پرانیستی وي.

په دې نندارتون کې روسیې مېشتي افغان انځورګر ذبیح پیکان هم خپل هنري آثار نندارې ته وړاندې کړل، چې د لیدونکو له پراخ هرکلي سره مخ شول. د نندارتون مسوولانو د دغه افغان هنرمند آثار د غوره آثارو په توګه وستایل.

ذبیح پیکان د افغانستان اسلامي امارت د سفارت د فرهنګي اتشې له‌خوا په دې نندارتون کې د ګډون لپاره ورپېژندل شوی و.