په سعودي عربستان کې د افغانستان سفارت شارژدافیر عبدالفتاح مولوي سخي د خلیج همکارۍ شورا له سرمنشي جاسم محمد البدیوي سره په ریاض کې د لیدنې پر مهال پر دوه اړخیزو اړیکو او سیمه‌ییزو بدلونونوبحث او خبرې کړي دي.

دغه لیدنه د یکشنبې پر ورځ د سعودي عربستان په پلازمېنه ریاض کې د خلیج د همکارۍ شورا په عمومي دارالانشا کې ترسره شوې ده.

د خلیج د همکارۍ شورا د خبرپاڼې له مخې، دواړو لوریو د افغانستان او یادې شورا ترمنځ اړیکې ارزولي او پر یو شمېر ګډو موضوعاتو یې خبرې کړې دي.

دواړو خواوو د سیمه‌ییزو او نړیوالو وروستیو بدلونونو په اړه هم د نظرونو تبادله کړې، خو د بحث شویو موضوعاتو په اړه نور جزئیات خپاره شوي نه‌دي.

په افغانستان کې د ملګرو ملتونو مرستندویه پلاوي(یوناما) په هرات ولایت کې د یو شمېر ښځو د نیولو او توقیف په اړه اندېښنه څرګنده کړې وایي، چې دغه چاره د بشري حقونو جدي اندېښنې راولاړوي.

یوناما د یکشنبې پر ورځ( د غبرګولي اووه‌لسمه ) په یوه پیغام کې ویلي، چې هرات ولایت د یو شمېر ښځو د نیولو او توقیف راپورونه ترلاسه شوي او دا موضوع له نږدې څاري.

په دې پیغام کې راغلي: « یوناما په هرات کې د هغو ګڼو ښځو د نیولو او توقیف په اړه اندېښنه لري، چې د حجاب د نه‌مراعتولو ادعا پرې شوې ده؛ دا موضوع د بشري حقونو جدي اندېښنې راولاړوي.»

د ملګرو ملتونو دې ادارې همداراز ټینګار کړی، چې ټول وګړي د تګ راتګ له آزادۍ برخمن دي او ښځې او نرینه مساوي حق لري، چې د قانون پر وړاندې له برابر چلند څخه برخمن شي.

د یوناما دا څرګندونې په داسې وخت کې وړاندې کېږي، چې د افغانستان د ښځو او نجونو د حقونو موضوع اوس هم د اسلامي امارت او نړیوالې ټولنې ترمنځ د بحث له مهمو محورونو څخه ګڼل کېږي.

نړیوالو بنسټونو څو ځله د ښځو د اساسي حقونو د رعایت غوښتنه کړې؛ خو اسلامي امارت ټینګار کړی، چې د ښځو حقونه د اسلامي شریعت په چوکاټ کې خوندي دي.

تر اوسه د یوناما د وروستیو څرګندونو په اړه د مسوولو افغان چارواکو کوم رسمي غبرګون نه‌دی خپور شوی.

د اسلامي امارت رهبر شیخ هبة‌الله آخوندزاده د جهادي مدرسو له مسوولانو، استادانو، د دیني خپرونو د ارزونې له مسوولانو، د دارالایتامونو له مسوولانو او یو شمېر دیني عالمانو سره لیدلي او د زده‌کړې، روزنې او د ټولنې په سمون کې یې د عالمانو پر رول ټینګار کړی دی.

د اسلامي امارت رهبر عالمان د انبیاوو وارثان بللي او څرګندوي، چې هغوی د دین د ساتنې، د ټولنې د سمون او خلکو ته د پوهاوي ورکولو مسوولیت پر غاړه لري.

هغه د دیني علومو پر اړتیا هم ټینګار کړی او ویلي یې دي، چې د دیني زده‌کړو له پراختیا او بیا راژوندي کولو سره د ټولنې سمون او د شریعت پلي کول شوني دي.

نوموړي د مدرسو له مسوولانو غوښتي، چې د زده‌کړې، روزنې، د دیني باورونو پیاوړتیا او د زده‌کوونکو فکري ودې ته ځانګړې پاملرنه وکړي او د اغېزمنو زده‌کړو لپاره مناسب چاپېریال برابر کړي.

د اسلامي امارت رهبر د خپلو خبرو په بله برخه کې مسوولان دې ته رابللي، چې په اداري، سیاسي، اقتصادي او پوځي چارو کې له بې‌غورۍ ډډه وکړي. هغه د ادارو ترمنځ پر همغږۍ او د متقابل باور پر پیاوړتیا هم ټینګار کړی دی.