نیویارک ټایمز ورځپاڼې راپور ورکړی، چې د ډیورنډ فرضي کرښې په اوږدو کې د افغانستان او پاکستان ترمنځ وروستۍ نښتې د ملکي وګړو د مرګ‌ او ژوبلې د زیاتېدا زرګونه کورنۍ بې‌ځایه کېدا ته اړ کړې دي.

د دې رسنۍ د لیکنې له مخې؛ د پاکستان هوايي بریدونه د فبرورۍ له وروستیو څخه پیل شوي او د افغانستان د ملکي ودانیزو بنسټونو تر څنګ یې ځینې پوځي سیمې هم پر نښه کړې دي.

راپور زیاته کړې؛ د پاکستان او افغانستان د غرنیو  سیمو په اوږدو کې نښتې اوس هم روانې دي او دواړه لوري یو بل ته د درندو زیانونو ادعاوې کوي. په داسې حال کې، چې د سیمې هېوادونو د تاوتریخوالي د کمولو هڅو تر اوسه څرګنده پایله نده لرلې.

د ډیورنډ کرښې د اړوند سیمو اوسېدونکي وایي؛ ګڼې کورنۍ د خپل ژوند د ژغورلو لپاره لنډمهالو کمپونو ته کډه شوي او د اوبو، خوړو او لومړنیو آسانتیاوو له کمښت سره مخ دي.

د ملګرو ملتونو د څرګندونو له مخې؛ د دغو بریدونو په پایله کې لږ تر لږه ۷۵ ملکيان وژل شوي او له ۱۱۵ زره ډېر کسان د خپلو کورونو پرېښودلو ته اړ شوي دي.

سیاسي شنونکو خبرداری ورکړی؛ د دغو نښتو دوام کولی شي په افغانستان کې بشري ناورین نور هم پراخ کړي، ځکه اوس هم میلیونونه خلک بشري مرستو ته اړتیا لري.

د افغانستان اسلامي امارت رهبر شیخ هبة‌الله آخوندزاده د کوچني اختر مبارکي افغانانو او د نړۍ مسلمانانو ته وړاندې کړې او د هېواد د اسلامي نظام لپاره یې د یووالي، زغم او له بې‌وزلو هېوادوالو د ملاتړ غوښتنه کړې ده.

دغه راز یې له الله‌پاک څخه وغوښتل، چې د روژې، تراویح، صدقې او نورو نیکو اعمالو په ګډون د روژې د مبارکې میاشتې عبادتونه قبول کړي او ټول د تقوا، اخلاص او استقامت په لاره کې ثابت وساتي.

د اسلامي امارت رهبر په خپل اختریز پیغام کې د قرآن کریم د آیتونو او نبوي احادیثو پر وړاندې کولو د روژې او لمانځه فضیلت، د فطر د صدقې برکت او د صبر او ټولنیزې خواخوږۍ ارزښت ته نغوته(اشاره) کړې ده.

شیخ هبة‌الله آخوندزاده څرګنده کړې، چې د روژې میاشت د صبر، تقوا او ټولنیزې خواخوږۍ میاشت ده او مسلمانان باید د دې میاشتې او اختر رښتینې روحیه د اسلامي اخلاقو، بښنې، شفقت او د اړمنو؛ په ځانګړي توګه یتیمانو او بې‌وزلو سره د مرستې له لارې ونمانځي.

هغه دغه راز پر مسلمانانو غږ کړی، چې بدبیني، نفرت، کینه او اختلافات یوې خوا ته کړي او خپل یووالي او پیوستون پیاوړی کړي.

د مؤمنانو رهبر ټینګار کړی، چې امنیت، یووالي او د اسلامي احکامو اطاعت، د اسلامي نظام د شرعي قوانینو مراعات او له امر بالمعروف او نهی عن المنکر وزارت سره همکاري د خلکو او چارواکو له مهمو دندو څخه دي، چې له فساد او فتنې څخه پاکه سالمه ټولنه جوړه شي.

شیخ هبة‌الله آخوندزاده همدارنګه د دیني زده‌کړو او روزنې، د هېواد د ودې او پرمختګ، د ځوانانو، ماشومانو او له کډوالۍ څخه راستنېدونکو لپاره د ملاتړ او په نړۍ کې د نورو مسلمانانو د درناوي په ارزښت او اړتیا ټینګار کړی او څرګندوي، چې اسلامي امارت له نورو اسلامي هېوادونو سره د اسلامي ورورګلوۍ پر بنسټ ښې اړیکې غواړي او د مسلمانانو د حقونو هر ډول سرغړونه کلکه غندي.

د پیغام په پای کې یادونه کوي، چې الله تعالی دې مسلمانان له هر ډول ناورینونو او ستونزو څخه وساتي، د اسلام د لارې شهیدانو ته لوړ مقام ورکړي، ناروغانو او ټپیانو ته شفا ورکړي او اسلامي ملت ته عزت، یووالي او بریالیتوب ورپر برخه کړي.

د خوړو نړیوال پروګرام (ډبلیو‌اف‌پي) څرګنده کړې، چې د افغانستان او پاکستان ترمنځ د شخړو له کبله اغېزمنو کورنیو ته د خوراکي توکو بېړنۍ مرستې وېشل پیل شوي دي.

د دې بنسټ د څرګندونو له مخې؛ د شخړو له کبله بې ځایه شوې له ۲۰زره ډېرې کورنۍ د خوراکي توکو بېړنۍ مرستې ترلاسه کوي. په لومړي پړاو کې به دغو کورنیو ته غذایي بسکټونه ووېشل شي، چې بېړنۍ خوراکي اړتیاوې یې پوره کړي او بیا به زیانمنونکې کورنۍ د دوه میاشتو لپاره خواړه یا نغدي مرسته ترلاسه کړي.

د یاد پروګرام د څرګندونو له مخې؛ د ماشومانو او همدارنګه امیدوارو او شیدې ورکوونکو میرمنو لپاره ځانګړي خوراکي توکي هم چمتو شوي، چې د خوارځواکۍ مخه پرې ونیول شي.

ټاکل شوې، چې دا مرسته د هېواد په اته ولایتونو ( په ختیځ کې نورستان، کونړ او ننګرهار او همدارنګه په جنوب کې پکتیا، خوست، پکتیکا، زابل او کندهار) کې بې ځایه شویو کورنیو ته ورسیږي.

په افغانستان کې د خوړو نړیوال پروګرام مشر جان ایلیف ویلي، چې افغانان اوسمهال د افغانستان او پاکستان ترمنځ د ډیورنډ کرښې په اوږدو کې د جګړې د زیاتوالي، د سیمه‌ییز تاوتریخوالي اغېزو او د لوږې او خوارځواکۍ خپرېدا په ګډون له ګڼو ناورینونو سره مخ دي.

نوموړي زیاته کړې؛ اوسمهال په هرو درې افغانانو کې یو یې د خوراکي توکو بېړنۍ مرستې ته اړتیا لري او شاوخوا ۱۷.۴ میلیون خلک د خوراکي توکو له سخت کمښت سره مخ دي.

دا وړاندویېنه هم کیږي، چې سږکال به په افغانستان کې شاوخوا ۳.۷ میلیون ماشومان د خوارځواکۍ درملنې ته اړتیا ولري.

د خوړو نړیوال پروګرام خبرداری ورکړی، چې د سوداګریزو لارو بندېدا او د سیمه‌ییز تاوتریخوالي زیاتوالي د اومه‌توکو د بیو د لوړېدا او په افغان بازار کې د لومړنیو توکو د کمښت خطر زیات کړی دی.