د افغانستان اسلامي امارت ملي دفاع وزارت نن (دوشنبه د سلواغې اووه‌ویشتمه) په یو لړ مراسمو کې د هېواد د دفاعي ځواکونو نوې یونیفورم پېژندنې ته وړاندې کړ.

 دغه یونیفورم، چې د کمانډو، سرحدي ځواکونو او ملي اسلامي اردو لپاره ټاکل شوی؛ د ملي دفاع وزارت په تالار کې نندارې ته وړاندې شو.

په دې مراسمو کې، چې د وسله‌والو ځواکونو لوی درستیز محمد فصیح‌الدین فطرت، ملي دفاع وزارت یو شمېر رییسانو او مسوولانو او د مرکزي قطعاتو قومندانانو په کې ګډون کړی و؛ د وسله‌والو ځواکونو په لیکو کې د نظم، انضباط او واحد هویت پر ارزښت ټینګار وشو.

محمد فصیح‌الدین «فطرت» په خپلو خبرو کې ویلي، چې نظامي یونیفورم د نظم او انضباط د ټینګښت او د ځواکونو ترمنځ د ګډ هویت د رامنځته کولو لپاره وېشل کېږي او د هغې بشپړ مراعات د ټولو دفاعي ځواکونو لپاره بنسټیز اصل دی.

هغه زیاته کړې؛ نوی یونیفورم د وسله‌والو ځواکونو د یووالي او پیوستون نښه ده او هغه کسان، چې د پوځ لیکو ته داخلېږي باید د هېواد دفاع خپل مسوولیت او ژمنتیا وبولي.

دغه راز د ملي دفاع وزارت د اطلاعاتو او سټراټېژیکو نشراتو رییس عنایت‌الله خوارزمی هم ټینګار کړی،  چې هر نظامي باید له ځواکمنې ارادې او لوړ فکر لرونکی وي؛ پوځي اصول او نظم مراعت کړي.

نوموړي ویلي، چې پوځیان باید د هېواد د دښمنانو پر وړاندې پرېکنده، ټینګ او خلکو ته له اخلاقو، مسوولیت‌پالنې او ښه چلند برخمن پاتې شي.

ویل کیږي، چې د دې نوي یونیفورم پېژندنه د هېواد د دفاعي ځواکونو د انسجام، انضباط او واحد هویت د پیاوړتیا پر لوري یو اړین ګام دی.

په کراچۍ کې د افغانستان اسلامي امارت قونسلګرۍ څرګنده کړې: د هېواد ۱۰۵ وګړي، چې په کې ۲ ښځې او ۱۰ ماشومان هم دي؛ د پاکستان له زندانونو خوشې او افغانستان ته لېږدول شوي دي.

د قونسلګرۍ د خبرپاڼې له مخې؛ دغه کسان شاوخوا یوه میاشت مخکې د سند او بلوچستان ایالتونو پر لارو نیول شوي او بنديان شوي وه.

په خبرپاڼه کې دا هم راغلي، چې له دې وړاندې هم د بېلابېلو هېوادونو په زندانونو کې سلګونه افغان وګړي، د ډیپلوماټیکو هڅو په پایله کې آزاد شوي او هېواد ته راستانه شوي دي.

د پاکستان له زندانونو څخه خوشې شوي کسان د چمن – سپین بولډک له لارې هېواد ته ولېږدول شول.

قونسلګرۍ په بهر کې د افغانانو د حقونو د ساتنې او هېواد ته د دوی د خوندي راستنېدا د آسانتیا لپاره د هڅو په لړ کې خپله ژمنه بیا تائید کړه.

د ایران بهرنیو چارو وزارت مرستیال ویلي: که واشنګټن د بندیزونو د لرې کولو په اړه خبرو ته چمتو وي؛ نو ایران هم چمتو دی، چې له امریکا سره اټومي تړون ته د رسېدا لپاره جوړجاړی وښيي.

د ایران بهرنیو چارو وزارت مرستیال مجید تخت‌روانچی له بی‌بی‌سی سره په تهران کې د مرکې پر مهال ویلي، چې «توپ د امریکا په ډګر کې دی» او که امریکا رښتینې وي؛ نو د تړون لار به اواره شي.

دې ایراني چارواکی دا څرګندونې په داسې حال کې کړي، چې امریکايي چارواکو څو ځله ټینګار کړی؛ دا ایران دی، چې د خبرو بهیر یې ورو کړی دی.

له دې مخکې د امریکا بهرنیو چارو وزیر مارکو روبیو ویلي: ډونالډ ټرمپ غوره ګڼي، چې یوې هوکړې ته ورسېږي؛ خو دا کار له ایران سره «ډېر ستونزمن» دی.

تخت‌روانچي تائید کړې، چې د ایران او امریکا ترمنځ غیرمستقیمې خبرې د عمان پر منځګړیتوب روانې دي او ټاکل شوې، چې بل پړاو یې د سې‌شنبې پر ورځ په ژنیو کې ترسره شي.

هغه دغه خبرې «په ټولیز ډول مثبتې؛ خو د وروستۍ پرېکړې لپاره وختي» یادې کړې.

د نوموړي د څرګندونو له مخې: د ایران وړاندیزدادی، چې د ۶۰ سلنه بډایه شوي یورانیمو کمول، د تهران د جوړجاړي چمتووالی ښيي؛ خو ټینګار یې وکړ، چې د «صفر بډاینې» موضوع د ایران له نظره له اجنډا وتلې او سره کرښه ګڼل کېږي.

د ایران بهرنیو چارو وزارت مرستیال د دې هېواد د توغندويي پروګرام په اړه هر ډول خبرې رد کړي او څرګندوي؛ د ایران دفاعي وړتیا د خبرو موضوع نده.

هغه دا خبرداری هم ورکړی، چې پر ایران هر ډول پوځي اقدام کولی شي سیمه له پراخ بحران سره مخ کړي.

دا په داسې حال کې ده، چې ایران او امریکا دواړه د ډیپلوماټیک حللارې ملاتړ کوي؛ خو متقابل ګواښونه او بې‌باوري اوس هم د خبرو پر بهیر دروند سیوری غوړولی دی.