د ایټالیا لومړۍ وزیرې جورجیا ملوني د اورلګونې د هغې پېښې په غبرګون کې، چې له کبله یې د درې افغانانو په ګډون څلور کسان ووژل شول ویلي؛ دې پېښې سخته ووېروله او دا «غونی‌ځیږوونکی جنایت» ګڼي.

ملوني د چارشنبې پر ورځ( د غبرګولي دیارلسمه ) په ايکس‌پاڼه کې لیکلي، چې ایټالیا به د تاوتریخوالي او وحشت پر وړاندې شاتګ ونه‌کړي.

هغې د دې پېښې د هر اړخیزو څېړنو غوښتنه کړې او ټینګار یې کړی، چې ټول ښکېل کسان باید د قانون منګولو ته وسپارل شي.

د ایټالیا لومړۍ وزیرې د قربانیانو له کورنیو سره خپله خواخوږي او خواشیني هم څرګنده کړې ده.

دا په داسې حال کې ده، چې د افغانستان اسلامي امارت د بهرنیو چارو وزارت له ایټالیايي چارواکو غوښتي، چې د هغې پېښې عاملان د قانون منګولو ته وسپاري، چې د ایټالیا په سویل کې د کالابریا ولایت د امیندولارا سیمې په یوه پمپ‌سټېشن کې یې درې افغان کډوال د موټر د قصدي سوځولو له کبله ووژل.

د افغانستان د سولې لپاره د امریکا پخواني استازي زلمي خلیلزاد ویلي، چې د منځنۍ او سویلي آسیا ترمنځ د لېږد رالېږد، اړیکو او انرژۍ په برخو کې د نښلېدنې پراخېدا کولی شي دواړه سیمې له بدلونونو سره مخ کړي.

خلیلزاد په ایکس‌پاڼه کې لیکلي، چې دا چاره کولی شي د دواړو سیمو هېوادونو ته د نور ډېر امنیت او هوساینې زمینه برابره کړي.

هغه دا څرګندونې د ترمذ خبرو اترو د دوه‌یم پړاو د جوړېدا په غبرګون کې کړې، چې ټاکل شوې سبا (پنجشنبه د غبرګولي څوارلسمه) په ازبکستان کې پیل شي.

ټاکل شوې د افغانستان د سوداګرۍ او پانګونې خونې عمومي رییس هم په دې غونډه کې ګډون وکړي.

د امریکا بهرنیو چارو وزیر مارکو روبیو ویلي، چې لږ تر لږه پېنځه هېوادونو په قطر کې د مېشتو افغان پناه‌غوښتونکو د منلو لپاره لېوالتیا ښودلې ده.

روبیو د سې‌شنبې پر ورځ د قانون جوړوونکو په شتون کې ویلي، چې حکومت نه غواړي د دوحې په السیلیه کمپ کې مېشت افغانان بېرته افغانستان ته ستانه کړي او د هغوی د بیا مېشتېدا لپاره یې له څو هېوادونو سره خبرې کړې دي.

هغه وایي: « مونږ اوس د هغو لارښوونو له مخې عمل کوو، چې متحده ایالتونو ته د افغانانو ننوتل منع کوي.»

نوموړي زیاته کړې؛ چارواکي هره ورځ په درېیمو هېوادونو کې د دوی د بیا مېشتېدا د لارو چارو د موندلو لپاره هڅې کوي.

اوس‌مهال له ۱۱۰۰ څخه ډېر افغانان د دوحې په السیلیه کمپ کې ژوند کوي.

د امریکا د استازو جرګې غړې ګریس منګ په استماعیه غونډه کې د هغو راپورونو په اړه اندېښنه څرګنده کړې؛ ښايي یو شمېر افغانان هغو هېوادونو ته ولېږدول شي، چې له امنیتي یا بشري ستونزو سره مخ دي، لکه کانګو.

روبیو په ځواب کې وویل، چې د ده په اند له یادو هېوادونو هیڅ یو د جګړې سیمه نه‌ده؛ خو ټینګار یې وکړ، چې ښايي یو هېواد په یوازې ځان ټول افغانان ونه‌مني.

هغه ویلي: « فکر نه‌کوم یو هېواد به ټول زر کسان ومني.»

نوموړي زیاته کړې؛ امریکا د هغو هېوادونو لټه کوي، چې د مسوولیت په وېش کې ونډه واخلي او افغان پناه‌غوښتونکو ته د بیا مېشتېدو د منلو وړ لارې برابرې کړي.