د فیفا ۲۰۲۶ فوټبال نړیوال جام سیالۍ د پنجشنبې پر شپه د کوربه هېواد مکسیکو او جنوبي افریقا ترمنځ پر پرانیستونکې لوبه پیل کېږي. دا لوبه د مکسیکو په آزتکا لوبغالي کې ترسره کېږي.

دا سیالي د A ګروپ برخه ده او د نړیوال جام د تاریخ تر ټولو ستر پړاو پیلوي، چې په کې ۴۸ لوبډلې د درې کوربه هېوادونو؛ امریکا، کاناډا او مکسیکو ترمنځ د ۳۹ ورځو په اوږدو کې تر سره کیږي.

دا لوبه د ۲۰۱۰ز. کال د نړیوال جام د پرانیستې لوبې یاد هم تازه کوي؛ هغه وخت مکسیکو او جنوبي افریقا په جوهانسبرګ کې ۱-۱ مساوي شوي وه، چې د افریقا په وچه کې لومړنی نړیوال جام و.

تمه ده، چې له ۸۰ زره ډېر نندارچیان په آزتکا لوبغالي کې حضور ولري. دا لوبغالی به لومړی داسې لوبغالی وي، چې درې ځله د نړیوال جام د پرانیستې لوبې کوربه‌توب کوي؛ مخکې هم د ۱۹۷۰ او ۱۹۸۶ کالونو پرانیستې لوبې په کې شوې وې.

مکسیکو، چې د نړۍ په درجه بندۍ کې څوارلسم مقام لري؛ د A ګروپ له قوي لوبډلو څخه ګڼل کېږي او غواړي د کوربه‌توب له امتیازه پر ګټه اخیستنې د سیالیو پیل پر بریا وکړي. دا لوبډله په وروستیو ۸ لوبو کې ماتې شوې نه‌ده او د ګانا، استرالیا او سربیا پر وړاندې یې روزنیزې لوبې ګټلې دي.

دغه راز جنوبي افریقا له ۲۰۱۰ز.کال وروسته بېرته نړیوال جام ته راستنه شوې او دا یې څلورم ګډون دی. که څه هم دا لوبډله د نړۍ په درجه بندۍ کې شپېتمه ده؛ خو روزونکی هوګو بروس باور لري، چې لوبغاړي یې کولی شي کوربه لوبډله له ننګونې سره مخ کړي.

هغه ویلي: «زمونږ لپاره دا یوه ډېره ښه تجربه ده. اړینه ده، چې د لوبې پر پلان ولاړ پاتې شو او په لوبغالي کې پر پېښو راوڅرخیږو.»

د جنوبي افریقا چمتووالی د ویزو د ځنډ له کبله یو څه اغېزمن شوی؛ خو لوبډله هیله لري، چې ۱۶ کلونو مخکې ته ورته دا ځل هم مکسیکو ته ستونزې جوړې کړي.

جنوبي افریقا په تېرو څلور مخامخ سیالیو کې مکسیکو دوه ځله ګټلې؛ یوه بریا یې ترلاسه کړې او یوه لوبه مساوي پای ته رسېدلې ده.

دا پرانیستونکې لوبه د کابل پر وخت د شپې ۱۱:۳۰ پیلېږي او په افغانستان کې به پر ژوندۍ بڼه د آریانا ټلویزیون او آریانا FM راډیو له لارې خپرېږي.

د لوبو مینه‌وال کولی شي د شپې له ۱۰:۳۰ څخه د لوبې ځانګړی پیلیز پروګرام وګوري.

د ۲۰۲۶ فیفا نړیوال جام ته د فوټبال لوبډلو د لوبغاړو د لارموندلو وروستی نوملړ اعلان شو او له زر څخه ډېر لوبغاړي د دې لوبې په تاریخ کې د دغو سیالیو تر ټولو ستر پړاو ته چمتووالی نیسي.

دغه سیالۍ به د امریکا، کاناډا او مکسیکو پر ګډ کوربه‌توب ترسره شي او د لومړي ځل لپاره به په کې ۴۸ ملي لوبډلې برخه واخلي.

په دې پړاو سیالیو کې هرې لوبډلې ته اجازه ورکړ شوې، چې له ۲۳ څخه تر ۲۶ لوبغاړو پورې نوملړ وړاندې کړي، چې درې ګول‌ساتونکي هم په کې وي.

د ارجنټاین ملي لوبډله، چې د تېر پړاو اتله ده، یو ځل بیا د خپل تجربه‌لرونکي لوبډلمشر لیونل میسي پر مشرۍ سیالیو ته ورځي او هیله لري له هغې اتلولۍ دفاع وکړي، چې په قطر کې یې خپله کړې وه.

برازیل هم له ستورو لوبغاړو لکه نیمار، وینیسیوس جونیور، مارکینیوش او الیسون سره سیالیو ته ورودانګي.

د انګلستان په نوملړ کې هم پېژندل شوي لوبغاړي لکه هري کین، جوډ بلینګهم، بوکایو ساکا او مارکوس راشفورډ شامل دي.

فرانسه د خپلې درېیمې نړیوالې اتلولۍ د ګټلو لپاره پر کیلیان امباپه، عثمان ډیمبلي او اوریلین شوامني تکیه کوي.

د کوربه هېوادونو لوبډلو هم خپل وروستي نوملړونه اعلان کړي دي. مکسیکو به له راول خیمنیز او سانټیاګو خیمنیز سره سیالیو ته وردانګي. د کاناډا لوبډله د الفونسو ډیویس او جوناټان ډېوېډ ځلېدو ته هیله‌منه ده او امریکا به د کریسټین پولیسیک، ویسټون مک‌کیني او ټایلر اډمز په ګډون سیالیو کې برخه واخلي.

سویلي افریقا هم له کلونو وروسته یو ځل بیا نړیوال جام ته راستنېږي. دغه لوبډله به د لوبډلمشر رونوین ویلیمز پر مشرۍ او د کورني لیګ او اروپایي سیالیو د لوبغاړو په ګډون سیالیو ته ورشي.

د دغو سیالیو په نورو ستورو کې د اسپانیا لامین یامال، د ناروې ارلینګ هالنډ، د پرتګال کریسټیانو رونالډو ، د بلجیم کیوین ډي بروینه او د یوروګوای فیډریکو والورډه له نامتو لوبغاړو څخه دي.

د ۲۰۲۶ فیفا نړیوال جام به د غبرګولي پر یویشتمه(د جون پر یوولسمه) پیل او د چنګاښ پر اته‌ویشتمه (د جولای پر نولسمه) پای ته ورسېږي. تمه ده د سیالیو نوی جوړښت، چې زیاتې لوبډلې او ډېر لوبغاړي په کې برخه لري؛ د نړیوال جام له تر ټولو پراخو او زړه‌راکښونکو پړاوونو څخه یو وي.

د لوبغاړو د وروستي نوملړ له اعلان وروسته اوس د مینه‌والو سترګې د پرانیستونکې لوبې او د نړۍ د تر ټولو معتبر جام د ګټلو سیالۍ ته اوښتې دي.

رویال چلنجرز بنګلور د ۲۰۲۶هند غوره لیګ(ای‌پي‌ال) په پایلوبه کې زړه‌راکښونکې لوبه ترسره کړه او ګجرات ټایټنز ته یې د پېنځه ویکټو پر توپیر ماتې ورکړه.

دغه لوبه د یکشنبې پر ورځ په نریندرا مودي لوبغالي کې ترسره شوه.

بنګلور د ۱۵۶ منډو هدف په ۱۸ آورونو کې د ۵ لوبغاړو پر سوځېدا ۱۶۱ منډې جوړې کړې او د دوه آورونو له پاتې کېدا سره یې اتلولي خپله کړه.

له دې بریا سره رویال چلنجرز بنګلور د ای‌پي‌ال په تاریخ کې له چینای سوپر کینګز او ممبي انډینز وروسته درېیمه لوبډله شوه، چې پرله‌پسې اتلولي ګټي.

د لوبې په پیل کې د بنګلور لوبډلمشر راجات پاټیډار پچه وګټله او د توپ اچونې پرېکړه یې وکړه؛ هغه پرېکړه، چې ژر یې مثبته پایله ورکړه. د بنګلور چټکو او اغېزناکو توپ اچوونکو د ګجرات توپوهونکي تر سخت فشار لاندې راوستل او د ویکټو پرله‌پسې لوېدا ته یې لاره هواره کړه.

جاش هیزلووډ او بهوونشور کومار د شبمن ګېل او سای سدرشن په ژر سوځولو سره ګجرات ته سخت ګوزار ورکړ. وروسته د بنګلور توپ اچوونکو په لنډو توپونو د ګجرات ډېری لوبغاړي وسوځول.

د برید د کرښې له نړېدا سره ـ سره  واشنګټن سندر د ۵۰ ناسوځېدلو منډو پر جوړولو هڅه وکړه، چې خپله لوبډله په سیالۍ کې وساتي او د منلو وړ هدف وټاکي.

راشد خان د ۶ توپونو پر مټ ۱۵ منډې جوړې کړې او د راهول ټېواټیا او جېسن هولډر لنډو؛ خو ګټورو لوبو د ګجرات منډې ۱۵۵/۸ ته ورسولې.

د هدف په ځواب کې بنګلور توپاني پیل وکړ. ویراټ کوهلي او ونکټېش ایر خپلې لوبډلې ته د ای‌پي‌ال د پایلوبو په تاریخ کې تر ټولو چټکې ۵۰ منډې جوړې کړې او یوازې په ۳.۳ آورونو کې یې دغه پړاو بشپړ کړ.

ونکاټش ایر د ۱۶ توپونو پر مټ ۳۲ منډې جوړې کړې او د لوبډلې په چټک پیل کې یې مهم رول ولوباوه؛ خو وروسته محمد سراج وسوځاوه. ورپسې کاګیسو رباډا هم ډیوډټ پډیکال له ډګره بهر کړ او ګجرات ته یې لنډه هیله پیدا کړه.

د ویراټ کوهلي ځلېدونکې لوبې د سیالۍ برخلیک وټاکه. نوموړي د ۴۲ توپونو پر مټ ناسوځېدلې ۷۵ منډې جوړې کړې، خپله نیمه سلیزه یې په ۲۵ توپونو بشپړه کړه او لوبډله یې تر بریا ورسوله.

جیټش شارما هم له کوهلي سره په ډاډمنې لوبې بنګلور هدف ته ورساوه او د دغې لوبډلې مینه‌والو ته یې د اتلولۍ جشن ورپر برخه کړ.

ویراټ کوهلي د لوبې د غوره لوبغاړي جایزه وګټله او رویال چلنجرز بنګلور د هند غوره لیګ دوه‌یمه اتلولي پخپل نوم ثبت کړه.