د ملګرو ملتونو د بشري چارو د همغږۍ دفتر( OCHA) ويلي، چې په افغانستان کې ماشومان زده‌کړې ته د لاسرسي په برخه کې له ډېرو خنډونو سره مخ دي.

اوچا نن( سې‌شنبه د وږي اووه‌لسمه) د سواد زده‌کړې له نړیوالې ورځې سره هممهاله په ایکس‌پاڼه کې لیکلي؛ سواد او زده‌کړه پوهې، ډېرو فرصتونو او خوندي راتلونکي ته د ماشومانو د لاسرسي لاره اواروي.

دغه بنسټ ټینګار کړی، چې د زده‌کړو په برخه کې پرله‌پسې پانګونه د دغو فرصتونو د پرانیستي ساتلو لپاره اړینه ده، چې هر ماشوم وکولی شي وده وکړي او له خپلو وړتیاوو ګټه واخلي.

اوچا زیاته کړې؛ د افغان ماشومانو لپاره د زده‌کړې او سواد برابرول د هغوی د ښې راتلونکې د جوړولو لپاره یو اړین عامل دی.

د لوړو زده‌کړو وزارت ويلي، د هېواد د لوړو زده‌کړو په نظام کې د لومړي ځل لپاره په کابل پولیتخنیک پوهنتون کې د هوافضا او پرمختللیو هوايي سیسټمونو ځانګړی پوهنځی جوړ شوی دی.

دغه پوهنځی څلور ډیپارتمنټونه لري، چې د بې‌پیلوټه الوتکو انجنیري، د الوتکو انجنیري، د هوافضا انجنیري او د رادار او اویونیک انجنیري برخې رانغاړي.

د لوړو زده‌کړو وزارت څرګنده کړې، د دې پوهنځي جوړول د هېواد په اړتیا وړ څانګو کې د مسلکي کادرونو د روزنې لپاره د دغه وزارت د پروګرامونو یوه برخه ده.

د لوړو زده‌کړو وزیر ندا محمد ندیم هم د لوړو زده‌کړو شورا په غونډه کې د اسلامي امارت د پېنځه‌کلنو لاسته راوړنو په اړه خبرې کړي او د استادانو پر ډېر ملاتړ او ورته یې د غوره زده‌کړه‌ییزو شرایطو پر برابرولو ټینګار کړی دی.

د پوځي چارو کارپوهان د دې پوهنځي جوړول د هېواد د علمي او تخنیکي وړتیاوو د لوړولو په برخه کې یو بنسټیز ګام بولي.

د دوی د څرګندونو له مخې، د هوافضا، بې‌پیلوټه الوتکو، رادار او اویونیک په برخو کې زده‌کړې کولی شي د هېواد د تخنیکي وړتیاوو او کورنیو صنعتونو د پراختیا زمینه برابره کړي.

یو شمېر زده‌کړیالانو هم د دې پوهنځي له جوړېدا هرکلی کړی او وايي، چې په نویو او تخصصي څانګو کې زده‌کړې به ځوانانو ته ډېر علمي فرصتونه برابر کړي.

د لوړو زده‌کړو وزارت مسوولان وايي؛ هڅه کوي، چې د تخصصي څانګو پر جوړولو د هېواد د اړتیا وړ مسلکي کادرونو د روزنې زمینه برابره کړي.

د افغانستان لپاره د امریکا پخواني ځانګړي استازي زلمي خلیل‌زاد ویلي، چې افغانستان د سترو نړیوالو پانګونو د جذب لپاره چمتو دی او د سعودي عربستان له نفت او ګاز شرکت سره نوی تړون د هېواد د اقتصاد لپاره یو مثبت پرمختګ بلل کېږي.

خلیل‌زاد په کابل کې د افغانستان د کانونو وزارت او سعودي دلتا شرکت ترمنځ د تړون د لاسلیک په مراسمو کې ویلي، چې دغه تړون ښيي؛ افغانستان تر بل هر وخت ډېر د سوداګرۍ او سترو پانګونو لپاره چمتو شوی دی.

هغه زیاته کړې، چې افغانستان له ډېره وخته راپدېخوا د منځنۍ آسیا د پراخو سرچینو او د سویلي آسیا د لویو او مخ پر پراختیا بازارونو ترمنځ د یوه ځمکني پُل په توګه مطرح شوی دی.

د خلیل‌زاد د څرګندونو له مخې؛ افغانستان پخپله هم د پام وړ طبیعي سرچینې لري، چې د سیمې او نړیوالو بازارونو اړتیاوې پوره او د هېواد د اقتصادي ودې لپاره نوي فرصتونه رامنځته کولی شي.

خلیل‌زاد دغه تړون« مثبت او هیله‌بښونکی پرمختګ» بللی او څرګندوي، چې افغانان له څو لسیزو جګړو وروسته اوس له پراخو اقتصادي اړتیاوو سره مخ دی.

هغه دواړو لوریو ته د دغه تړون له کبله مبارکي ورکړې او خوښ دی، چې د افغانستان د پانګونې د راتلونکي لپاره د یوه اړین پرمختګ شاهد و.