Connect with us

تازه خبرونه

په تېر یو کال کې کابو ۴۰۰۰ پوځي وسایط رغېدلي – دفاع وزارت

خپور شوی

د

(Last Updated On: وری ۲۲, ۱۴۰۲)

ملي دفاع وزارت په تېر یو کال کې کابو ۴۰۰۰ پوځي وسایط رغولي او د امنیتی ځواکونو په واک کې یې ورکړي دي.

اسلامي امارت د امنیتی او دفاعي ځواکونو د ملاتړ، پیاوړتیا او سمبالیدو لپاره پرلپسې هڅه کوي.

په زرګونه هغه پوځي وسایط، چې په پخواني حکومت کې له کاره غورزېدلي وه او یا هم بهرنیو ځواکونو د وتلو پر مهال زیانمن کړي وه؛ اوس بېرته رغول شوي او د امنیتي او دفاعي ارګانونو په واک کې ورکړ شوي، چې شمېر یې ۴۰۰۰ ته رسیږي.  

د ملي دفاع وزارت د امنیتي او حمایوي لوا قومندان محمدعیسی یاسین ویلي؛ د نورو زرګونه نقلیه وسایطو په رغونه کار روان دی، چې په راتلونکیو څو میاشتو کې له رغونې وروسته به د امنیتي او دفاعي ارګانونو په واک کې ورکړ شي.

د دفاع وزارت د څرګندونو له مخې؛ په دې پوځي نقلیه وسایطو کې ټانګونه، زرهي موټر، رینجرې او د بار وړلو موټر شته، چې د ملي دفاع وزارت په دوه رغنځیو کې د تخنیکي ډلو له لوري رغول شوي دي. 

له دې مخکې هم د ملي دفاع وزارت له لوري په لسګونه هغه چورلکې او جنګي الوتکې، چې بهرنیو ځواکونو د وتلو پرمهال ویجاړې کړې وې؛ بېرته رغولي او د هوايي ځواک په واک کې ورکړ شوي دي.

دغه راز د جګړې د کلونو پرمهال پر زرګونه پوځي وسایط د ماین چاودنو، نښتو او بېلا بېلو پېښو له کبله زیانمن او یا هم له منځه تللي دي.

د دې ترڅنګ د ملي دفاع وزارت مسوولین وايي؛ د افغانستان اردو به تر ۲۰۰ زره پورې ورسول شي، چې د هېواد امنیت او ځکمني بشپړتیا د ساتنې لپاره به پر پرمختللیو وسلو او تجهزاتو سمبال وي.

تازه خبرونه

چینايي او امریکايي پانګوالو ته د پانګونې د جلب او جذب بهیر وړاندې شو

Published

on

(Last Updated On: ليندۍ ۹, ۱۴۰۲)

د افغانستان د صنایعو او سوداګرۍ وزارت څرګنده کړې؛ نن (چارشنبه د لیندۍ ۸ نېټه ) له چینايي او امریکايي پانګوالو سره یوه غونډه جوړه شوه، چې په کې په افغانستان کې د ترانزیتي پانګونې د جلب او جذب بهیر دغو پانګوالو ته تشریح شو.

د سوداګرۍ او صنایعو وزارت د پانګونې رییس صبغت‌الله اخوندزاده ویلي: په افغانستان کې عمومي امنیت برابر شوی او پانګوال کولی شي په دې هېواد کې اسانه پانګونه وکړي.

دغه وزارت زیاته کړې، ورپسې د صنعت او سوداګرۍ وزارت د پانګونې ریاست په هېواد کې د پانګونې د جلب او جذب د بهیر په اړه پریزنتیشن وړاندې شو او په افغانستان کې د پانګونې فرصتونه او شته پروژې یې له هغوی سره شریکې کړې.

په پای کې د چینایي او امریکايي پانګوالو تخنیکي پوښتنو ته، چې غوښتل یې په انرژۍ، کانونو او ساختماني برخو کې پانګونه وکړي؛ ځواب ورکړ شو.

Continue Reading

تازه خبرونه

زوی مې له ۱۷ کلونو راپدیخوا د ګوانتانامو په زندان کې بندي دی – بي بي صفورا

Published

on

(Last Updated On: ليندۍ ۹, ۱۴۰۲)

په کابل کې یوه کورنۍ ادعا کوي، چې د دې کورنۍ یو غړی له تېرو ۱۷ کلونو راپدیخوا په ګوانتانامو زندان کې بندي دی.

د دغې کورنۍ غړي وايي، چې د دوی د کورنۍ دغه غړی محمد رحیم نومېږي او له اووه‌لس کلونو راپدیخوا په ګوانتانامو زندان کې بندي دی.

دوی له اسلامي امارت غواړي، چې د محمد رحيم د خلاصون لپاره له امريکا سره خبرې اترې وکړي، چې نوموړی خوشې شي.

د محمد رحیم مور بي بي صفورا ادعا کوي، چې زوی یې اووه‌لس کاله مخکې د پاکستان له لاهور ښاره نیول شوی او د ګوانتانامو زندان ته لېږدول شوی دی.

بي بي صفورا وايي؛ محمد رحيم شات پلورل او تر څنګ یې ديني درسونه زده‌کول.

هغه د دې کار پړه پر پاکستان اچوي.

نوموړې ويلي؛ د سره صلیب له لارې له خپل زوی سره په اړیکه کې دي او ځینې وختونه دوی د لیکونو له لارې د یو او بل پوښتنه کوي.

د دې کورنۍ نورو غړيو هم ادعا کړې؛ محمد رحیم د اسلامي امارت په لومړي پېر کې د نشه‌يي توکو پر وړاندې د مبارزې په څانګه کې کار کړی او دا مهال په ګوانتانامو زندان کې وروستی افغان بندي دی.

دوی له امریکا غواړي، چې محمد رحیم خوشې کړي.

د دې کورنۍ بله هیله دا ده، چې اسلامي امارت باید د دوی د زوی د خلاصون لپاره کار وکړي.

د اسلامي امارت ویاند ذبیح الله مجاهد ويلي؛ دا موضوع تعقیبوي او له امریکایانو سره یې په لیدنو کې هم مطرح کړې ده.

محمد داوود؛ د محمد رحیم کشر زوی دی، چې د پلار له نیول کېدو وروسته دوه کلن شو. داوود اوس لوی شوی دی؛ خو هیله لري، چې یوه ورځ خپل پلار د خپلې کورنۍ په ګرمه غېږ کې وویني.

دا په داسې حال کې ده، چې څه وخت مخکې د اسلامي امارت غړی بشر نورزی له ګوانتانامو زندانه خوشې شو.

Continue Reading

تازه خبرونه

د منځنۍ آسیا هېوادونه دې د افغانستان په اړه همکاري زیاته کړي – قرغزستان

Published

on

(Last Updated On: ليندۍ ۸, ۱۴۰۲)

د قرغزستان بهرنیو چارو وزیر د منځنۍ آسیا له هېوادونو وغوښتل، چې د افغانستان په اړه همکاري او همغږي زیاته کړي.

د منځنۍ آسیا د هېوادونو د بهرنیو چارو وزیرانو په کلنۍ غونډه کې د قرغزیستان د بهرنیو چارو وزیر جنبیک کولوبایف ویلي، چې په افغانستان کې سوله او ثبات د سیمې د امنیت او سوکالۍ لپاره اړین دي.

د قرغزستان د بهرنیو چارو وزارت د خبرپاڼې پر بنسټ، کولوبایف د دې ناستې پر مهال په افغانستان کې د یوناما له فعالیتونو ملاتړ څرګند کړ.

په دې غونډه کې، چې د دوشنبې او سې شنبې پر ورځو د قرغزستان په پلازمېنه بشکیک کې جوړه شوې وه؛ د اسلامي امارت هیڅ چارواکي ګډون نه درلود، خو د یوناما مشرې روزا اوتونبایوا په کې ګډون وکړ او په افغانستان کې یې د یوناما د فعالیتونو په اړه معلومات وړاندې کړل.

Continue Reading

Trending

Copyright © 2022 Ariana News. All rights reserved!